ដោយៈ មុនីរ័ត្ន,រ៉ាម៉ន/ភ្នំពេញៈ រដ្ឋបាលរាជធានីភ្នំពេញ មិនអនុញ្ញាតឲ្យសមាគមស្ត្រីដើម្បីសង្គមធ្វើការហែក្បួនដាក់ញ្ត្តិនៅ ខុទ្ទកាល័យសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីសុំអន្តរាគមន៍ បញ្ចុះតម្លៃទឹកភ្លើង ថ្លៃផ្ទះជួល ប្រេងសាំងនិងផ្អាកបង់ប្រាក់ធនាគារបីខែដែលគ្រោងនឹងធ្វើនៅថ្ងៃទី២៦ខែមីនានោះទេប៉ុន្តែអនុញ្ញាតឲ្យតំណាងយកញត្តិទៅដាក់នៅខុទ្ទកាល័យសម្តេចនាយករដ្ឋមន្ត្រីបាន។
ការមិនអនុញ្ញាតនេះ បានធ្វើឡើងបន្ទាប់ពីសមាគមស្ត្រី ដើម្បីសង្គម បានដាក់លិខិតទៅអភិបាលរាជធានីភ្នំពេញកាលពីថ្ងៃទី២៣ ខែមីនាស្នើសុំដង្ហែញត្តិសុំកិច្ចអន្តរាគមន៍ពីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
លោក មាស ម៉េតភក្តី
អ្នកនាំពាក្យសាលារាជធានីភ្នំពេញ លោក មាស ម៉េតភក្តី បានមានប្រសាសន៍នៅព្រឹកថ្ងៃទី២៤ ខែមីនា នេះថាពាក់ព័ន្ធសំណើ របស់សមាគមស្ត្រីដើម្បីសង្គម ដែលបានដាក់ញ្ត្តិកាលពីថ្ងៃទី២៣ ខែមីនា មករដ្ឋបាលរាជធានីភ្នំពេញគឺមិនអនុញ្ញាតឲ្យមានការ ហែរក្បួនដាក់ញ្ញត្តិនោះទេ ប៉ុន្តែខាងសមាគមអាចចាត់តំណាងម្នាក់យកញត្តិទៅដាក់ជូនខុទ្ទកាល័យសម្តេចនាយករដ្ឋមន្ត្រី ដើម្បីស្នើសុំកិច្ចអន្តរាគមន៍ណាមួយតាមអ្វីដែលជាកម្មវត្ថុនៃការដាក់ញត្តិនោះ។
លោកមាស ម៉េតភក្តី បានបញ្ជាក់ថា “ដំណាក់កាលនេះ ខាងសមាគមគួរតែជ្រាបហើយនឹងចូលរួមជាមួយគ្នាក្នុងការទប់ស្កាត់ការ រីករាលដាលជំងឺកូវីដ១៩ការប្រមូលផ្តុំប្រជាពលរដ្ឋការប្រមូលផ្តុំមនុស្សឲ្យមកជួបជុំគ្នាច្រើនទោះបីជាក្នុងគោលបំណងណាក៏ដោយក៏វាមិនសមគួរជាមួយនឹងស្ថានភាពដែលជំងឺកូវីដ១៩កំពុងតែរាតត្បាតជាពិសេសនៅទីក្រុងភ្នំពេញរបស់យើងដែលមានករណីកូវីដ១៩ច្រើន។ មានជម្រើសនៃនីតិវិធីជាច្រើនដែលខាងសមាគមអាចធ្វើទៅបានចៀសជាងការប្រមូលផ្តុំមនុស្សដើម្បីធ្វើការដង្ហែញ្ត្តិនេះ”។
សមាគមស្ត្រីដើម្បីសង្គម បានដាក់លិខិតទៅសាលារាជធានីភ្នំពេញ កាលពីថ្ងៃទី២៣ ខែមីនា ដោយស្នើសុំដង្ហែញត្តិសុំកិច្ចអន្តរាគមន៍ពីសម្តេចតេជោ ហ៊ុន សែន នាយករដ្ឋមន្ត្រីលើករណីបញ្ចុះតម្លៃទឹកភ្លើង ថ្លៃផ្ទះជួល ប្រេងសាំង និងផ្អាកបង់ប្រាក់ធនាគារបីខែ។ យុទ្ធនាការដើរហែក្បួនដាក់ញត្តិនេះ នឹងប្រព្រឹត្តទៅថ្ងៃទី២៦ ខែមីនាខាងមុខ៕
កាលពីពេលថ្មីៗនេះទាក់ទងនឹងសកម្មភាពខាងលើនេះដែរអ្នកនាំពាក្យរាជរដ្ឋាភិបាលលោកផៃស៊ីផាន បានសង្កត់ធ្ងន់ថា “អ្វីដែលយើងខ្លាចបំផុតគឺយើងមិនចង់ឲ្យបាត់បង់ស្ថិរភាពនៃម៉ាក្រូសេដ្ឋកិច្ច។ម៉ាក្រូសេដ្ឋកិច្ចគឺមានរាប់បញ្ចូលទាំងការបាត់បង់តម្លៃលុយដែលហៅថាអតិផរណាកាលណាលុយធ្លាក់ចុះមកច្រើនសម្រាប់មហាជនគឺធ្វើឲ្យមានអតិផរណាគឺវាធ្វើឲ្យសម្លាប់ដល់សេដ្ឋកិច្ចរួមទាំងអស់ ដែលយើងត្រូវប្រយ័ត្នប្រយែង”។
អ្នកនាំពាក្យរដ្ឋាភិបាលក៏បានអំពាវនាវទៅដល់ប្រជាពលរដ្ឋកុំឲ្យមានសកម្មភាពពពាក់ពពូនដែលអាចបំផ្លាញនូវស្ថិរភាពនយោបាយរបស់សង្គម៕សរន
