ដោយៈ​បូព៌​ព្រឹក្ស​/​ភ្នំពេញៈបរិក្ខារ​តេស្ត​រក​​វីរុស​កូ​វីដ​១៩​ខ្នាត​ធំ​មួយគ្រឿង​ដែលជា​ជំនួយឥតសំណង​របស់​រដ្ឋាភិបាល​ចិន នឹង​មកដល់​ខេត្ត​ព្រះសីហនុ​នា​ដើម​ខែមេសា​ខាងមុខនេះ ហើយ​ភាគី​ចិន​នឹង​បញ្ជូន​ក្រុម​អ្នកជំនាញ​មកកាន់​ប្រទេស​កម្ពុជា​ផងដែរ ដើម្បី​ជួយ​សម្រួល​ដល់​មន្ទីរពេទ្យ​បង្អែក​ខេត្ត​ព្រះសីហនុ​ក្នុងការ​ដំឡើង រៀបចំ និង​បណ្ដុះបណ្ដាល​ជូន​ដល់​បុគ្គលិក​ពាក់ព័ន្ធ​។​

ផេ​ក​ផ្លូវការ​របស់​ស្ថានទូត​ចិន​ប្រចាំ​កម្ពុជា​កាលពី​ព្រឹក​មិញ​បានបញ្ជាក់​អំពី​ជំនួយ​នេះ​។​ប្រភព​ដដែល​និយាយទៀតថា​បន្ទាប់ពី​ដាក់ឱ្យ​ប្រើប្រាស់ សំណាក​តេស្ត​រក​វីរុស​របស់​ខេត្ត​ព្រះសីហនុ ខេត្ត​កែប​ខេត្តកំពត​និង​ខេត្ត​មួយចំនួន​ដែល​នៅក្បែរនោះ​នឹង​ត្រូវបាន​បញ្ជូន មកកាន់​ទីនោះ ។​នេះ​នឹង​អាចជួយ​ដល់​ភាគី​កម្ពុជា​ក្នុងការ​បង្កើនល្បឿន​តេស្ត​រក​ជំងឺ​វីរុស ជួយ​សន្សំ​ថវិកា​ទប់ស្កាត់​នឹង​ជំងឺ​វីរុស ហើយ​កិច្ច​ប្រយុទ្ធ​ប្រឆាំងនឹង​ជំងឺ​វីរុស​អាចអនុវត្ត​កាន់តែ​ល្អប្រសើរ​។​
​ការមកដល់​នៃ​ជំនួយ​សម្រាប់​ធ្វើតេស្ត​នេះ​ក៏​ជួន​គ្នា​នឹង​ជំនួយ​វ៉ាក់សាំង​បង្ការ​កូ​វីដ​ចំនួន​បី​សែន​ដូ​ស​ដែលជា​ជំនួយ​លើក​ទី​២​នឹង​មកដល់​កម្ពុជា​នៅ​ថ្ងៃទី​៣១ ខែមីនា​ខាងមុខ​នេះដែរ​៕​សរន​