ដោយ៖តារារិទ្ធ/ភ្នំពេញ៖វ៉ាក់សាំង​បង្ការ​ជំងឺ​កូវីដ​១៩ គឺ​ជាអាវ​ក្រោះ​ដ៏​សំខាន់​ក្នុង​ការ​ការពារ​អាយុ​ជីវិតប្រជាពលរដ្ឋខ្មែរ នៅ​ក្នុងកាលៈទេសៈ​​ដែល​ការ​រាត​ត្បាត​នៃ​ជំងឺ​កូវីដ១៩ ​នៅ​មិន​ទាន់​ធូរ​ស្រាលនោឡើយតាម​រយៈ​ព្រឹត្តិការណ៍​សហ គមន៍​២០​កុម្ភៈ ។ ក្នុងស្ថានភាពដែលមានហានិភ័យខ្ពស់បែបនេះប្រមុខរាជរដ្ឋាភិបាលកម្ពុជាសម្តេចអគ្គមហាសេ នាបតីតេជោ ​ហ៊ុន សែន​ នាយករដ្ឋមន្រ្តីកម្ពុជានៅថ្ងៃទី២៩ខែមីនា​នេះបានបញ្ជាឲ្យបើកយុទ្ធនាការ​ទ្រង់ទ្រាយធំ​ចាក់វ៉ាក់សាំង​ការពារ​កូវីដ-១៩​ ឲ្យបាន​ ១ លានដូសក្នុង មួយខែ ​។​

ដំណើរ​ការ​ចាក់​វ៉ាក់សាំងកូវីដ​១៩​​នៅ​កម្ពុជាដែល​បាន​ចាប់​ផ្ដើមនៅ​ថ្ងៃ​ទី​១០​ខែ​កុម្ភៈ មាន​ពលរដ្ឋ​ខ្មែរ​រាប់​សិប​ម៉ឺន​នាក់​ហើយដែល​បាន​ទទួល​វ៉ាក់សាំង​នេះ ។ ទន្ទឹម​នឹង​ចាក់​វ៉ាក់សាំង​ដល់​ពលរដ្ឋ រាជរដ្ឋាភិបាល​កម្ពុជា​បាន​បន្ត​ស្វះ​ស្វែង​ទិញ​វ៉ាក់សាំង​បង្ការ​ជំងឺ​កូវីដ​១៩ ​ពី​ប្រទេស​នានាដើម្បី​ផ្គត់ផ្គង់​តម្រូវ​ការ​ចាក់​វ៉ាក់សាំង​ដល់​ពលរដ្ឋ​របស់​ខ្លួនឲ្យ​បានចំនួន​យ៉ាង​ហោច​ណាស់​ពី​១០​លាន ទៅ​១៣​លាន​នាក់ ​។ កំពុង​បន្ត​ជាប់​ជា​ប្រចាំខណៈ​ពេល​ដែល​វ៉ាក់សាំង​ត្រូវ​បាន​បញ្ជូន​ពី​ក្រៅ​ប្រទេស​មក​ជា​បន្ត​បន្ទាប់​។

សម្តេច​នាយករដ្ឋ​មន្ដ្រី ហ៊ុន សែន ធ្លាប់​បាន​គូស​បញ្ជាក់​កាលពី​ខែ​កុម្ភៈ​ឆ្នាំ​២០២១​ថា៖«យើងមានការយល់ដឹងយ៉ាងច្បាស់ថាវ៉ាក់សាំងគឺជាតម្រូវការជាយុទ្ធសាស្រ្តដ៏សំខាន់ មួយរបស់កម្ពុជានៅក្នុងការប្រយុទ្ធប្រឆាំងនិងការឈានទៅយកឈ្នះលើជំងឺកូវីដ-១៩ ។ ទោះបីវ៉ាក់សាំងមិនមែនជាដំណោះស្រាយមាសតែមួយគត់សម្រាប់យកឈ្នះលើ ជំងឺកូវីដ-១៩ ដែលចាំបាច់ត្រូវអនុវត្តរួមគ្នាជាមួយនឹងវិធានការបង្ការនិងការពារដទៃទៀតក្តី ប៉ុន្តែវ៉ាក់សាំងគឺជាដំណោះស្រាយគន្លឹះជាយុទ្ធសាស្រ្តមួយសម្រាប់ធានាការពារ អាយុជីវិតប្រជាជននៅក្នុងពេលចំពោះមុខនិងសម្រាប់លើកកម្ពស់សុខភាពសាធារណៈក្នុងរយៈពេលវែងទៅមុខ ពិសេសសម្រាប់ការធានាឲ្យសកម្មភាពសង្គម-សេដ្ឋកិច្ច អាចដំណើរការពេញលេញឡើងវិញដែលនឹងជំរុញលើកស្ទួយនូវការងើបឡើងវិញនៃកំណើនសេដ្ឋកិច្ច និង ការកែ លម្អជីវភាពរស់នៅរបស់ប្រជាជនទូទាំងប្រទេស»។

បន្ទាប់​ពី​មាន​ករណី​ឆ្លង​ថ្មី​ជា​បន្តបន្ទាប់​នៅ​ក្នុង​សហគមន៍និង​តាម​រយៈ​អ្នក​ធ្វើ​ដំណើរ​មកពីក្រៅព្រទេស​ចូល​ក្នុង​ប្រទេសរាជរដ្ឋាភិបាល​កម្ពុជាបាន​សម្រេច​ទទួល​យក​ជំនួយ​វ៉ាក់សាំង​បង្ការ​ជំងឺកូវីដ​១៩ ស៊ីណូហ្វាម (Sinopharm) ពី​ប្រទេស​ចិនចំនួន១ លានដូសនិងបានមកដល់កម្ពុជា ៦០ ម៉ឺន​ដូសកាលពី​ថ្ងៃ​ទី៧ ខែ​កុម្ភៈ ២០២១ ភ្លាមៗនោះ រាជរដ្ឋាភិបាលកម្ពុជាបានបើកយុទ្ធនាការចាក់វ៉ាក់សាំងដំបូងនៅថ្ងៃទី១០ខែកុម្ភៈ។ក្រោយ​មកតាមរយៈ​យន្តការ​កូវ៉ាក់(Covax) របស់​អង្គការ​សុខភាព​ពិភពលោក (WHO) កម្ពុជា​ក៏​ទទួល​បាន​វ៉ាក់សាំង​កូវីដ១៩ កូវីស្យែល (Covishield) របស់​ក្រុម​ហ៊ុន​អាស្ត្រាហ្សេនីកា (AstraZeneca) និង​សាកល​វិទ្យាល័យ Oxford ដែល​ផលិត​នៅ​ប្រទេស​ឥណ្ឌាចំនួន​ ៣២.​៤០០០ ដូសកាលពី​ថ្ងៃ​ទី ២ ខែ​មីនា ហើយកាលពីថ្ងៃទី២៦ខែមីនា រាជរដ្ឋាភិបាលបានទទួលវ៉ាក់សាំង(Sinovac ) ដែលបានទិញពីក្រុមហ៊ុនចិនចំនួន ១,៥ លានដូស ហើយសង្ឃឹមថានឹងទទួលបានវ៉ាក់សាំង(Sinopharm) ចំនួន ៧០ម៉ឺនដូសបន្ថែមទៀតដែលជាជំនួយរបស់រដ្ឋាភិបាលចិននឹងមកដល់កម្ពុជានៅថ្ងៃទី៣១ ខែមីនា ។ បើតាមមន្រ្តីរាជរដ្ឋាភិបាលកម្ពុជាក៏បានបញ្ជាទិញវ៉ាក់សាំងស៊ីណូវ៉ាក់ ៤ លានដូសបន្ថែមទៀត ។ សម្តេចតេជោ​នាយក​រដ្ឋមន្រ្តី ហ៊ុន សែន ក៏ធ្លាប់បាន​ប្រកាស​ថារាជរដ្ឋាភិបាល​គ្រោង​ចាក់​វ៉ាក់សាំង​ដល់​ប្រជាជន​កម្ពុជា​ពី ១០ លាន ទៅ​ ១៣​ លាននាក់ ។ សម្តេចបញ្ជាក់​ថាកម្ពុជា ក៏​កំពុង​ស្វះ​ស្វែង​រក​ទិញ​វ៉ាក់​សាំង​ Johnson & Johnson របស់​សហរដ្ឋ​អាមេរិក​ផង​ដែរ។

ក្រោយ​ពី​ទទួល​បាន​វ៉ាក់សាំង​ទាំង​នេះគេសង្កេត​ឃើញ​ក្រសួង​សុខាភិបាលនិង​ក្រសួង​ពាក់ព័ន្ធ​នានាបានប្រឹងប្រែងចាក់វ៉ាក់សាំងជូនប្រជាពលរដ្ឋនិងក្រុមគោលដៅអាទិភាព ដោយរាជរដ្ឋាភិបាលបានកំណត់ផែនការចាក់វ៉ាក់សាំងឲ្យបានលឿនដោយបានបង្កើត​​គណៈកម្មការ​ចំពោះ​កិច្ចក្នុងការចាក់វ៉ាក់សាំង ធ្វើ​យ៉ាង​ណាពន្លឿន​ការ​ចាក់​វ៉ាក់សាំង​ដល់​ប្រជា​ពលរដ្ឋ​កម្ពុជា​ឲ្យ​បាន​រហ័សនិង​មាន​ប្រសិទ្ធភាព។

រាជរដ្ឋាបាលបានរៀបចំនូវផែនការមេសម្រាប់ការចាក់វ៉ាក់សាំងជូនប្រជាពលរដ្ឋទៅតាមប្រភេទក្នុងការ ទទួលបានការចាក់វ៉ាក់សាំង ​ថា​តើ​ក្រុម​ពលរដ្ឋ​ប្រភេទ​ណាគួរ​ទទួល​បាន​វ៉ាក់សាំង​ស៊ីណូហ្វាម និង ​វ៉ាក់សាំង​កូវីស្យែល ។ ក្នុងនោះវ៉ាក់សាំង​កូវីស្យែលត្រូវ​ផ្តល់​ឲ្យ​ក្រុមអាទិភាព​ជា​ប្រជាពលរដ្ឋ​មាន​អាយុ​ចាប់ពី​៦០ឆ្នាំ​ឡើងអ្នកការ​ទូត​បរទេ ស មន្ត្រី​អង្គការ​សហប្រជាជាតិ និងបុគ្គលិក​នៅ​ស្ថាប័ន​ហិរញ្ញ​វត្ថុ​អន្តរជាតិនិ​ងអង្គការអន្តរជាតិនានាដែល កំពុងបំពេញបេសកកម្មនៅកម្ពុជា ។ ចំណែកវ៉ាក់​សាំងស៊ីណូហ្វាម ត្រូវ​ផ្តល់​ឲ្យ​ក្រុម​អាទិភាព​ដែល​មានអាយុ​ពី ​១៨ ឆ្នាំដល់​ ៥៩​ ឆ្នាំក្នុង​នោះ​រួម​មាន​កង​កម្លាំង​ប្រដាប់អាវុធ​ បុគ្គលិក​សុខាភិបាល អ្នកសារព័ត៌ មានមន្រ្តី​រាជការ​ស៊ីវិល​ជួរ​មុខ មន្រ្តី​មជ្ឈមណ្ឌល​សកម្មភាព​កម្ចាត់​មីន​កម្ពុជា អាជ្ញា ធរ​មូលដ្ឋាន កម្មករ​កម្មការិនី បុគ្គលិក​ប្រមូល​សំរាម សិស្ស​និស្សិត​ទៅ​រៀន​នៅ​បរទេស ក្រុមកីឡាករ កីឡាការិនី គ្រូបង្វឹក មន្ដ្រីកីឡាពាក់ព័ន្ធ សមាជិករដ្ឋសភា ព្រឹទ្ធសភា អង្គរក្ស អ្នកធ្វើការ​ពាក់ព័ន្ធ​នឹង​ផ្នែក​អាកាសចរ​ស៊ីវិល មន្រ្តី​អគ្គនាយកដ្ឋាន​គយនិងរដ្ឋាករ​កម្ពុជាអគ្គនាយកដ្ឋាន​ពន្ធដារ បុគ្គលិក​រដ្ឋ​ជួរ​មុខ​ផ្សេងៗជា​ដើម។

ថ្មីៗនេះដោយសារមានព្រឹត្តិការណ៍សហគមន៍ ២០ កុម្ភៈ រាជរដ្ឋាភិបាលកម្ពុជាបានជំរុញឲ្យមានយុទ្ធនាការចាក់វ៉ាកសាំង​កូវីស្យែល ដល់ប្រជាពលរដ្ឋដែលមានអាយុ ៦០ ឆ្នាំឡើងនៅក្នុងរាជធានីភ្នំពេញ​ឲ្យ​បាន​ចំនួន៥៥,៧០០ នាក់​ក្នុង​រយៈពេល​១៥ ថ្ងៃ ។ បន្ថែម​លើ​នេះ​វ៉ាក់​សាំង​កូវីស្យែល​នេះក៏​ត្រូវបាន​អនុញ្ញាត​ឲ្យ​ចាក់​ដល់​ក្រុម​ពលរដ្ឋ​អាទិ ភាព​នៅ​តាមបណ្តា​ខេត្ត​មួយ​ចំនួនដូចជា​ខេត្ត​កណ្តាល ខេត្ត​ព្រះ​សីហនុ កោះកុង និង​ខេត្តព្រៃវែង។ខណៈខេត្ត​ទាំង​បួន​នេះកំពុង​រង​ការ​ឆ្លង​ថ្មី​នៃ​ជំងឺ​កូវីដ១៩ ក្នុងសហគមន៍​ ជា​បន្តបន្ទាប់ ។

នៅថ្ងៃនេះផងដែរសម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសដាក់ចេញផែនការចាក់វ៉ាក់សាំង កូវីដ ១៩ ឱ្យបានប្រមាណ១លានដូសក្នុងរយៈពេលមួយខែ។ផែនការពន្លឿនការចាក់វ៉ាក់សាំងកូវីដ១៩ ត្រូវបានសម្តេចតេជោ ហ៊ុន សែន បញ្ជាក់តាមសារសំឡេងមួយនៅព្រឹកថ្ងៃទី២៩ ខែមីនា ឆ្នាំ២០២១នេះ ។ សម្តេចតេជោបាន បញ្ជាក់ថា«យើងត្រូវខិតខំចាក់ក្នុងកម្រិត១លានដូសក្នុងមួយខែ ។ ប្រសិនបើវ៉ាក់សាំងមកច្រើនជាងនេះយើងអាចចាក់លើសពីនេះ» ។ដើម្បីពន្លឿនការចាក់វ៉ាក់សាំងកូវីដ ១៩ សម្តេចនឹងបញ្ជូនក្រុមគ្រូពេទ្យពីថ្នាក់ជាតិដែលក្រុមគ្រូពេទ្យស្ម័គ្រចិត្តជាច្រើនក្រុមផងចុះជួយអន្តរាគមន៍និងជួយការចាក់នៅតាមបណ្តាខេត្ត។

សម្តេចតេជោក៏បានណែនាំឱ្យខេត្តនីមួយៗរកគ្រូពេទ្យដែលមិនជាប់ភារកិច្ចរឿងព្យាបាលជំងឺទូទៅក៏ដូចជាគ្រូពេទ្យស្ម័គ្រចិត្តនៅតាមពេទ្យឯកជននានា មកហ្វឹកហាត់ដើម្បី ជួយការងារចាក់វ៉ាក់សាំងនេះ។ សម្តេចតេជោក៏បានណែនាំដល់អភិបាលខេត្តទាំងអស់ឱ្យរ៉ាប់រងការស្នាក់នៅរបស់គ្រូពេទ្យដោយស្វែងរកកិច្ចសហការជាមួយម្ចាស់សណ្ឋា គារនិងផ្ទះសំណាក់ជាដើម ។ ដោយឡែកគណៈកម្មការចំពោះកិច្ចចាក់វ៉ាក់សាំងទទួលបន្ទុកចំណាយលើការធ្វើដំណើរនិងហូបចុក។

បន្ទាប់ពីព្រឹត្តិការណ៍សហគមន៍ ២០ កុម្ភៈ បានរាតត្បាតកម្ពុជាអាជ្ញាធរ​មាន​សមត្ថកិច្ច​បាន​សម្រេច​ផ្អាក​ដំណើរការ​សាលារៀន​ រោង​ភាពយន្ត រោង​សម្ដែង​សិល្បៈ និងសារ មន្ទីរ​នៅ​ទូទាំង​ប្រទេស ការជួបជុំ ការរៀបអាពាហ៍ពិពា ហ៍ ។ ក្រៅពី​នេះតំបន់​មួយ​ចំនួន​ត្រូវ​បាន​បិទ​ខ្ទប់ខណៈ​មនុស្ស​រាប់​ពាន់​នាក់​ត្រូវ​ដាក់​ឲ្យ​នៅ​ដាច់​ដោយ​ឡែក​នៅ​តាម​មណ្ឌល​ធ្វើ​ចត្តាឡីស័ក​នៅ​ទូទាំង​ប្រទេស​ ។ គិត​មក​ទល់​ពេល​នេះករណី​កូវីដ​១៩ ​ដែល​រក​ឃើញ​នៅ​កម្ពុជាកើន​ឡើង​រហូត​ដល់​ជាង​២​ពាន់​ករណីក្នុង​នោះ​មានអ្នក​ជំងឺ​​ជាង​១​ពាន់​នាក់​​កំពុង​ទទួល​បាន​ការ​ព្យាបាលខណៈ​ចំនួន​អ្នក​ស្លាប់​ចាប់​មាន​កំណើន​ជា​បន្ត​បន្ទាប់ប្រមានជាង ១០ នាក់រួចមកហើយ​។

យ៉ាងណាមិញបើទោះបីជា​វ៉ាក់សាំង​ទាំង​នេះ​ត្រូវ​ផ្តល់​ឲ្យ​ក្រុម​អាទិភាព​ដែល​បាន​លើក​ឡើង​ខាង​លើប៉ុន្តែ​មិនមែន​គ្រប់​គ្នា​សុទ្ធ​តែ​អាច​ចាក់​បាន​នោះទេ ។ មុន​នឹង​ទទួល​បាន​ការ​ចាក់វ៉ាក់​សាំង​ទាំងពីរគឺ​ស៊ីណូហ្វាមនិង​កូវីស្យែល អ្នក​ចាក់​ត្រូវ​ឆ្លង​កាត់​ការ​ប្រឹក្សា​និង​ពិនិត្យ​ពីគ្រូពេទ្យ​ជា​មុន ។លក្ខខណ្ឌ​នៃ​ការចាក់​វ៉ាក់​សាំង​ស៊ីណូហ្វាម​និង​កូវីស្យែ ល មាន​ជាច្រើន​ចំណុច​ដែល​មិន​អាច​ឲ្យ​ក្រុម​ពលរដ្ឋ​ខ្លះ​ទទួល​បាន​ការ​ចាក់​វ៉ាក់សាំង​ទាំង​ពីរ​នេះ ។ លក្ខខណ្ឌ​ទាំង​នោះរួម​មាន​អ្នក​មាន​អាការៈ​ក្ដៅខ្លួន ​អ្នក​មាន​ជំងឺ​រ៉ាំរ៉ៃ​ប្រចាំ​កាយ ​អ្នក​មាន​ប្រវត្តិ​កើត​ជំងឺ​កូវីដ​១៩ អ្នក​ប្រតិកម្ម​នឹង​វ៉ាក់សាំង​ផ្សេងៗ ស្ត្រី​មាន​ផ្ទៃពោះ ស្ត្រី​ដែល​កំពុង​បំបៅ​ដោះ​កូន និង​ ស្ត្រី​ដែល​កំពុង​មាន​ផែន​ការ​យក​កូន​ក្នុង​ពេ​ឆាប់ ៗ​ជាដើម។ អ្នក​ដែល​មាន​បញ្ហា​សុខភាព​ក៏​មិនអាច​ចាក់​វ៉ាក់សាំង​ទាំង​ពីរ​នេះ​បាន​ដែរ ។​ បញ្ហា​សុខភាព​ទាំង​នោះរួម​មាន​ដូចជាអ្នក​មាន​ជំងឺ​ផ្លូវ​ដង្ហើម ជំងឺ​ហឺត ជំងឺ​រ៉ាំរ៉ៃ​ធ្ងន់ធ្ងរ​ ជំងឺ​រ៉ាំរ៉ៃ​ឧស្សាហ៍​ធ្វើ​ទុក ជំងឺ​អាឡែកស៊ី ជំងឺ​កន្ទាល​ត្រអាក ជំងឺ​ថ្លើម ​ជំងឺ​តម្រង​នោម​ធ្ងន់ធ្ងរ​ ជំងឺ​លើស​ឈាម ជំងឺ​ប្រកាច់​ស្កន់ ឬ​ឆ្កួតជ្រូក សរសៃ​ប្រសាទ រលាក​ស្រោមខួរ ជំងឺ​ខ្វះ​ភាព​ផ្សាំ​ពី​កំណើត អ្នក​មាន​ជំងឺ​ អេដស៍ (HIV) អ្នក​មាន​ជំងឺ​មហារីក​កូន​កណ្ដុរ ជំងឺ​ឈាម ស ឬ​ អ្នក​មាន​ជំងឺ​ភាព​ស៊ាំ អ្នក​ប្រើប្រាស់​ថ្នាំ​សម្រួល​ភាព​ស៊ាំ​ប្រឆាំង​ជំងឺ​មហារីក​ដុំ​សាច់​។ ទាំង​វ៉ាក់សាំង​ស៊ីណូហ្វាម​និង​វ៉ាក់សាំង​កូវីស្យែល​តម្រូវ​ឲ្យ​មាន​ការ​ចាក់​ចំនួន​ពីរ​ដូស។គម្លាត​នៃ​ការ​ចាក់​ដូស​ទី​ ១និង​ដូស​ទី ២សម្រាប់​ស៊ីណូហ្វាមមាន​រយៈពេល​ ២​សប្តាហ៍ ។ ចំណែក​វ៉ាក់សាំង​កូវីស្យែលមាន​រយៈពេល​ពី​ ៤​ ទៅ​ ១២​សប្តាហ៍ ។ បន្ទាប់ពី​ចាក់វ៉ាក់​សាំងរួចជាទូទៅអ្នក​ដែល​បាន​ចាក់​វ៉ាក់សាំង​អាច​មាន​អាការៈ​ក្តៅ​ខ្លួន រមាស់ ឬ​ឈឺ​ចុកចាប់​ក្នុង​រាងកាយ ឬ​ក្រហម​កន្លែង​ចាក់ក្នុង​រយៈពេល​មួយ​ថ្ងៃទៅ​ពីរ​ថ្ងៃ​យ៉ាង​យូរ។​

ជាមួយនេះវាក៏នៅមានកត្តារំខានដែលបង្កឲ្យមានការរាំងស្ទះដល់យុទ្ធនាការចាក់វ៉ាក់សាំងរបស់រាជារដ្ឋាភិបាលផងដែរនោះគឺជន​អគតិមួយ​ចំនួន​បានលាប​ពណ៌និងបំភ្លៃការពិតដោយ​ទាញ​​​ភ្ជាប់យុទ្ធនាការចាក់វ៉ាក់សាំងបង្ការជំងឺកូវីដ១៩ ទៅ​នឹង​យុទ្ធសាស្ត្រ​នយោបាយក្នុងគោលបំណងកេងចំណេញនយោបាយ ហើយ​ញុះញង់​ពលរដ្ឋ​មិន​ឲ្យ​ចាក់​វ៉ាក់សាំង​ ដែលជាការរាំងស្ទះចំពោះយុទ្ធនាការចាក់វ៉ាក់សាំងឲ្យបាន ១លានដូសក្នុង ១ខែរបស់រាជរដ្ឋាភិបាល ។

បើតាមរបាយការណ៍របស់ក្រសួងសុខាភិបាលគិតត្រឹមថ្ងៃទី២៨ ខែមីនា ឆ្នាំ២០២១ ក្រសួងបានចាក់វ៉ាក់សាំងកូវីដ ១៩ ស៊ីណូហ្វាម (Sinopharm) និង អាស្រ្តាហ្សេនីកា (Astra Zeneca)ជូនជនស៊ីវិលទូទាំងប្រទេសបានសរុបទាំងអស់ទូទាំងប្រទេសចំនួន២៥២,៥០៧នាក់។ចំណែកក្រសួងការពារជាតិកម្ពុជាចេញផ្សាយថ្ងៃទី២៨ខែមីនា ២០២១ នេះបានឲ្យដឹងថាការចាក់វ៉ាក់សាំងការពារជំងឺកូវីដ១៩ ស៊ីណូហ្វាម (Sinopharm) លើកទី១ ជូនកងកម្លាំងកើនដល់ចំនួនសរុប ១៣០,៩៥៥នាក់ខណៈចាក់លើកទី២បានចំនួន ១០៧,២៨៩ នាក់ ។ ដូចនេះសរុបទាំងស៊ីវិល និង កងកម្លាំងប្រដាប់អាវុធមកដល់ពេលនេះមានរយៈពេលប្រមាណជាង ១ ខែកន្លះមកនេះយើងទើបតែចាក់បាន ៣៨៣ ៤៦២ នាក់ ។

តើដំណើរការចាក់វ៉ាក់សាំងក្នុង១ខែឲ្យបាន១លានដូសអាចនឹងសម្រេចបានឬយ៉ាងណា ? គឺវាអាស្រ័យទៅលើការរៀបចំផែនការមួយច្បាស់លាស់ដែលជា​យុទ្ធសាស្ត្រលម្អិត​និង​ស៊ី​ជម្រៅ​មួយដែល​ងាយ​ឲ្យប្រជាពលរដ្ឋ​​ទទួល​បាន​ព័ត៌ មាន​លម្អិត​និង​ជា​ដំណាក់ការៗស្តី​អំពី​ផែនការ​ចាក់​វ៉ាក់សាំង ដូចជា​ទីតាំង​នៃ​ការ​ចាក់​វ៉ាក់សាំង ប្រភេទក្រុមពល រដ្ឋ​អាទិភាព​ទទួល​ចាក់​វ៉ាក់សាំង ទៅតាមប្រភេទ រយៈពេល​នៃ​ការ​ចាក់​វ៉ាក់សាំង និង​លក្ខខណ្ឌ​សុខភាព​ដើម្បី​ទទួល​ការ​ចាក់​វ៉ាក់សាំង​ជា​ដើម​ ។ នៅពេលប្រជាពលរដ្ឋយល់ដឹងច្បាស់បញ្ហានេះប្រជាពលរដ្ឋនិងចូលរួមដោយស្ម័គ្រចិត្ត ។ការ​ទប់​ស្កាត់​ការ​ឆ្លង​រាល​ដាល​នៃ​ជំងឺ​កូវីដ​១៩​ មិន​មែន​ជា​ការងារ​ផ្ដាច់​មុខ​របស់​នរណា​ម្នាក់​ទេប៉ុន្តែ​វា​ជាកាតព្វកិច្ច​របស់​ពលរដ្ឋ​គ្រប់​គ្នា​ ។ជាមួយការការពារ​ខ្លួន​កុំ​ឲ្យ​ឆ្លង​ជំងឺ​កូវីដ​១៩ និង​ការពារ​កុំ​ឲ្យ​ខ្លួន​ឯង​ក្លាយ​ជា​ភ្នាក់ងារ​ចម្លង ​ជំងឺ​នេះ​ទៅ​កាន់​អ្នក​ដទៃ។នេះ​គឺជា​ការងារ​ចាំ​បាច់​ដែល​ពលរដ្ឋ​គ្រប់​គ្នា​ត្រូវ​ចូល​រួម​ប្រតិបត្តិ​ដើម្បី​ឈាន​ទៅ​បិទ​បញ្ច ប់​ព្រឹត្តិការណ៍​សហគមន៍​២០​កុម្ភៈ​ឲ្យ​បាន​ឆាប់​រហ័ស​តាម​ដែល​អាច​ធ្វើ​ទៅ​បាន​៕