ដោយៈ ប​.​ជ័យ / បន្ទាយ​មាន​ជ័​យៈ មន្ត្រី​ជំនាញ បាន​និយាយថា សត្វ​ជ្រូក​រស់ ដែល​ទើប​ចាប់បាន ១​លើក​ទៀត នៅ​ខេត្តបន្ទាយមានជ័យ ក្រោយពេល​ធ្វើតេស្ត​ឈាម លទ្ធផល គឺ​វិជ្ជមាន​ជំងឺប៉េស្ត​ជ្រូក​អាហ្វ្រិក (ASF) ។​

​នេះ​បើ​យោង​លទ្ធផល ពី​មន្ទីរពិសោធន៍​វីរុស​សាស្ត្រ នៃ​វិទ្យាល័យ​ជាតិ​ស្រាវជ្រាវ សុខភាព​សត្វ និង​ផលិតកម្ម​សត្វ របស់​អគ្គនាយកដ្ឋាន ផលិតកម្ម​សត្វ និង​សុខភាព​ព​សត្វ នៃ​ក្រសួងកសិកម្ម បានចេញ នា​ថ្ងៃទី​១ ខែមេសា ឆ្នាំ​២០២១ នេះ លើ​សំណាក​ឈាមជ្រូក​រស់ ចំនួន ៣៨ ក្បាល ដែល​សមត្ថកិច្ច ចាប់បាន​នៅ​ព្រំដែន​កម្ពុជា ថៃ នា​ខេត្តបន្ទាយមានជ័យ កាលពី​រសៀល ថ្ងៃទី​៣០ ខែមីនា ឆ្នាំ​២០២១ ។​

​លោក ហ៊ុយ ទូច ប្រធានការិយាល័យ​ផលិតកម្ម និង​បសុព្យាបាល នៃ​មន្ទីរ​កសិកម្ម រុក្ខាប្រមាញ់ និង​នេសាទ ខេត្តបន្ទាយមានជ័យ បានអោយដឹង កាលពី​ថ្ងៃទី​១ ខែមេសា​នេះ​ថាៈ កាលពី​ម៉ោង ២​និង​១០​នាទី រសៀល ថ្ងៃទី ៣០​ខែ មីនា ឆ្នាំ​២០២១ ក្រុម​អន្តរាគមន៍​បង្ក្រាប​បទ​ល្មើស វិស័យ​សុខភាព​សត្វ ផលិតកម្ម​សត្វ ការិយាល័យ​នេះ សហការ​នឹង​កម្លាំង​ពាក់ព័ន្ធ បាន​ឃាត់​រថយន្ត ២​គ្រឿង​។ រថយន្ត​ទី​១ ម៉ាក​នី​ស​សាន់ ពណ៌​ទឹកប្រាក់ ពាក់​ស្លាក​លេខ បន្ទាយមានជ័យ 2A-0388 ដែល​ផ្ទុក​ជ្រូក​រស់ ចំនួន ២០ ក្បាល (​ជ្រូក​ជំទើ ត្រៀម​យកមក​ខ្វៃ លក់ ក្នុងអំឡុង​ឆេង​ម៉េង​) និង​រថយន្ត​ទី​២ គ្មាន​ស្លាក​លេខ ពណ៌​ខ្មៅ ម៉ាក​តូយ៉ូតា កាមរី គ្មាន​ស្លាក​លេខ ផ្ទុក​ជ្រូក​រស់ ចំនួន ១៨ ក្បាល (​ជ្រូក​ជំទើ ) នៅ​ចំណុច​ខាងកើត សាលាស្រុក​អូរជ្រៅ ក្នុងភូមិ​សូរិយា​ថ្មី ឃុំ​កូប ស្រុក​អូរជ្រៅ ដែល​សត្វ​ជ្រូក បាន​នាំចូល​ពី​ប្រទេស​ថៃ តាម​ច្រករបៀង នៃ​ព្រំដែន​កម្ពុជា ថៃ​ក្នុងស្រុក​អូរជ្រៅ​។ ការនាំ​ចូល​សត្វ​ជ្រូក​នេះ ដោយ​មិនមាន​លិខិតអនុញ្ញាត មិនមាន​លិខិតបញ្ជាក់ សុខភាព​សត្វ​ឡើយ​។​

​សមត្ថកិច្ច​ជំនាញ បាន​នាំយក​វត្ថុតាង​ល្មើស ខាងលើ មកកាន់​ការិយាល័យ​ផលិតកម្ម និង​បសុព្យាបាល​ខេត្ត អនុវត្ត​នូវ​នីតិវិធី​ច្បាប់ និង​ធ្វើ​ច​ត្តា​ឡី​ស័ក និង​បាន​បូម​ឈាម​ផ្ញើ​ទៅ​មន្ទីរពិសោធន៍​របស់​អគ្គ​នាយកដ្ឋាន​ផលិតកម្ម​សត្វ​និង​សុខភាព​ព​សត្វ​ដើម្បី​ចាត់ការ​ជា​បន្តទៀត ។ ជា​លទ្ធផល​លើ​សំណាក​ឈាមជ្រូក ដែល​ធ្វើ​ពិសោធន៍ បាន​បញ្ជាក់ថា វត្ថុ​វិភាគ​មានគុណ​ភាពល្អ តែ​វា​វិជ្ជមាន​ជំងឺ​ជ្រូក​អាហ្វ្រិក (ASF) ។​

​លោក ហ៊ុយ ទូច បាន​បន្តថាៈ ករណីនេះ បើ​យោង​ការណែនាំ​របស់លោក តាន់ ផាន់​ណា​រ៉ា ប្រតិភូ​រាជរដ្ឋាភិបាល​កម្ពុជា ទទួលបន្ទុក​អគ្គនាយក នៃ​អគ្គនាយកដ្ឋាន សុខភាព​សត្វ និង​ផលិតកម្ម​សត្វ , លោក ប៉ាង វណ្ណា​សេដ្ឋ ប្រធាន​មន្ទីរ​កសិកម្ម​ខេត្ត និង​ដោយមាន​ចំណារ​របស់លោក មាស ច័ន្ទ​ពិសិដ្ឋ ព្រះរាជអាជ្ញា នៃ​អយ្យការ​អម សាលាដំបូង ខេត្តបន្ទាយមានជ័យ បានអនុញ្ញាត​អោយ​មន្ត្រី​ជំនាញ ដុតបំផ្លាញ​ចោល តាម​នីតិវិធី និង​បច្ចេកទេស ព្រោះ​ជា​ប្រភេទ​ជ្រូក មាន​ជំងឺ ប៉ះពាល់​ដល់​សុខភាព ។ ហេតុនេះ បានជា​មន្ត្រី​ជំនាញ បានអោយ​ដៃគូ ពី​សត្តឃាតដ្ឋាន និង​មន្ត្រី​ជំនាញ នាំទៅ​បំផ្លាញចោល ហើយ​កាលពី​ម៉ោង ៣ រសៀល ថ្ងៃទី​១ ខែមេសា ឆ្នាំ​២០២១ ។ ចំណែក​ម្ចាស់​សត្វ​ជ្រូក​ទាំង​២ មធ្យោបាយ ត្រូវធ្វើ​កិច្ចសន្យា មិនអោយ​មានការ​ប្រព្រឹត្ត​ល្មើស ជា​លើក​ទី​២​ទៀត ។​
​ពុំ​នោះទេ នឹងរង​ផាកពិន័យ ជា​ប្រាក់​បន្ថែម ហើយ​កសាង​សំណុំរឿង ទៅ​ផ្តន្ទាទោស​ផងដែរ ។​

​សូម​រំលឹក​ដែរ​ថា កាល​ថ្ងៃទី​២៧ ខែមីនា ឆ្នាំ​២០២១ ក្រុម​អន្តរាគមន៍​បង្ក្រាប​បទ​ល្មើស វិស័យ​សុខភាព​សត្វ ផលិតកម្ម​សត្វ​ការិយាល័យ និង​អគ្គនាយកដ្ឋាន ផលិតកម្ម​សត្វ និង​សុខភាព​សត្វ សហការ​នឹង​កម្លាំង​ពាក់ព័ន្ធ បាន​ស្ទាក់​បង្ក្រាប​ការដឹកជញ្ជូន សត្វ​ជ្រូក​រស់ ពី​ព្រំដែន​កម្ពុជា ថៃ​ចំនួន​២​ករណី ។​

​ករណី​ទី​១ ឃាត់​រថយន្ត ២ គ្រឿង មួយ​ប្រភេទ​ភី​ក​អាប់ ពណ៌​ទឹកប៊ិច ពាក់​ស្លាក​លេខ ច​-១៤៧៣ ភ្នំពេញ​២ និង​រថយន្ត​១​គ្រឿង​ទៀត ម៉ាក​សាំង​យ៉ុង ពណ៌​លឿង មាន​ស្លាក​លេខ ភ្នំពេញ 2AF 8339 ១៥​កៅអី ។ មធ្យោបាយ​ទាំង​២ បាន​លួច​ដឹក​សត្វ​ជ្រូក​រស់​ចំនួន​៧៤​ក្បាល ។ ប៉ុន្តែ​ក្រោយ​ធ្វើ​ច​ត្តា​ឡី​ស័ក និង​យក​សំណាក​ឈាម ទៅធ្វើ​ពិសោធន៍ លទ្ធផល​អវិជ្ជមាន​ជំងឺប៉េស្ត​ជ្រូក​អាហ្វ្រិក ហើយ​មន្ត្រី​ជំនាញ ក៏បាន​ផាកពិន័យ ធ្វើ​កិច្ចសន្យា ហើយ​អោយ​ម្ចាស់​យក​សត្វ​ជ្រូក ចេញទៅ​វិញ ៕/V​