​ដោយៈ​ទេ​ពក​ង្រី​/​កំពង់ឆ្នាំង​:ទីប្រជុំជន​ផ្សារ​ពង្រ​ត្រូវបាន​ដាក់​ឲ្យ​ដំណើរការ​លក់ដូរ​សារជាថ្មី​ឡើងវិញ​ហើយ​បន្ទាប់ពី​បាន​ផ្អាក់​ការលក់ដូរ​មួយរយៈ​ក្រោយពី​ការរកឃើញ​អ្នក​ប៉ះពាល់​ប្រយោល​និង​ប៉ះពាល់​ផ្ទាល់ ។​

​នៅ​ព្រឹក​ថ្ងៃទី​៨​ខែមេសា​នេះ​អភិបាលស្រុក​រលាប្អៀរ​បា​ន​ចុះទៅ​ធ្វើការ​ផ្សព្វផ្សាយ​ដល់​បងប្អូន​អាជីវក​ក្នុង​ផ្សារ​ពង្រ​ដែល​បាន​ចូល​លក់ដូរ​សារជាថ្មី​ឡើងវិញ​និង​បានធ្វើការ​ផ្ដាំផ្ញើ​ដល់​បងប្អូន​អាជីវករ​ទាំងអស់​សូម​អនុវត្ត​ការពារ​ជំងឺ​រាតត្បាត​កូ​វីដ​១៩ ។​

​អភិបាលស្រុក​រលាប្អៀរ លោក យ៉ុង​សៅ​វុទ្ធី បាន​មានប្រសាសន៍ថា ក្រោយពី​មាន​ផ្ទុះ​បាតុភាព​កូ​វិដ​១៩​ដែល​មាន​បងប្អូន មកពី​រាជធានី​ភ្នំពេញ ២ នាក់​ប្ដី​ប្រពន្ធ​ធ្វើ​ឲ្យ​ប៉ះពាល់​ដល់​បងប្អូន​ប្រជាពលរដ្ឋ​អ្នក​នៅ​ផ្សារ​ពង្រ​នោះ អាជ្ញាធរ​ស្រុក ខេត្ត ក៏ដូចជា​មន្ទីរ​សុខាភិបាល​បាន​ចាត់វិធានការ​ដើម្បី​ទប់ស្កាត់​ការរីក​រាលដាល​នៃ​ជំងឺ​កូ​វីដ​១៩​និង​មានការ​បាញ់ថ្នាំ​សម្លាប់​មេរោគ ដែល​ក្នុងនោះ​អ្នក​រង​ផលប៉ះពាល់​ដោយផ្ទាល់ ១១​នាក់​យើង​បាន​យកទៅ​ធ្វើ​ច​ត្តា​ឡឺ​ស័ក​នៅ​ស្រុក​ទឹកផុស និង​បាន​យក​សំណាក​ទៅពិនិត្យ ចំណែក​មនុស្ស ច្រើន​នាក់​ផ្សេងទៀត ដែល​ប៉ះពាល់​ដោយ​ប្រយោល គឺ​បានធ្វើ ច​ត្តា​ឡី​ស័ក​នៅតាម​ផ្ទះ និង​បាន​ពិនិត្យ​សំណាក ទៅពិនិត្យ ដូចគ្នា​ដែរ​។

​ជា​លទ្ធផល​មកដល់​ថ្ងៃទី​៧ ខែមេសា​ម្សិលមិញ​នេះ អ្នក​ដែល​រង​នៅ​ផលប៉ះពាល់​ពាល់​ដោយ ផ្ទាល់​ទាំង​១១​នាក់ គឺជា​លទ្ធផល​អវិជ្ជមាន​ទាំង​៣ លើក ។ ហេតុនេះហើយ​ទើប​អាជ្ញាធរខេត្ត​កំពង់ឆ្នាំង ក៏បាន​ចេញ​សេចក្តីជូន​ដំណឹង​​ស្ដី ការ អនុ​ញ្ញា​ត្តិ​ឱ្យ​អាជីវករ​ក្នុង​ផ្សារ​ពង្រ ចូល​លក់​ឡើងវិញ នៅ​ព្រឹក​ថ្ងៃទី ៨ ខែមេសា​នេះ​។

​ក្នុងឱកាស​នេះ​បងប្អូន​អាជីវករ​នៅ​ផ្សារ​ពង្រ​ក៏បាន​ឲ្យ​ដឹងថា អស់​រយៈពេល ជាង​១០​ថ្ងៃ​មកហើយ ដែល​ពួក គាត់​មិនអាច​ចូលធ្វើការ​លក់ដូរ​បាន ធ្វើ​ឲ្យ​រង​ផលប៉ះពាល់​សេដ្ឋកិច្ច​ក្នុង​គ្រួសារ​ទោះបី​គាត់​ព្យាយាម​ទៅ​លក់ដូរ​នៅ កន្លែង​ដទៃ​ក៏ប៉ុន្តែ​លក់​មិន​ដាច់​ឡើយ​។​

​សូមបញ្ជាក់ថា​ផ្សារ​ពង្រ​ត្រូវបាន​បិទ​តាំងពី​ថ្ងៃទី​២៤​ខែមីនា​រហូតដល់​មក​ដល់ពេលនេះ​មាន រយៈពេល ១៥​ថ្ងៃ​ហើយ បន្ទាប់ពី​មានការ​ប៉ះពាល់​ប្ដី​ប្រពន្ធ​ពីរ​នាក់​ដែល​មកពី​រាជធានី​ភ្នំពេញ​និង​ធ្វើ​ឲ្យ​មនុស្ស​១១ នាក់​ដែល​រង​ផលប៉ះពាល់​ដោយផ្ទាល់ និង​មនុស្ស ២២៤​នាក់​ទៀត​ប៉ះពាល់​ដោយ​ប្រយោល ៕​