​ដោយ​:​សាត​ចាន់​បុត្រ​/​មណ្ឌលគិរី​:ដើម​កញ្ឆា​ស្រស់​ចំនួន​ពីរពាន់​ដើម​ត្រូវបាន​ដុត​កម្ទេចចោល​កាលពី​ព្រឹក​ថ្ងៃទី​៨​ខែមេសា​នៅលើ​ទីតាំង​អាកាសយានដ្ឋាន​ថ្មី​ដែល​ស្ថិតនៅ​ក្នុងភូមិ​ពូ​ហ្សា​ម ឃុំ​សែន​មនោ​រម្យ ស្រុក​អូររាំង ក្រោម​វត្តមាន​លោក​ស្វាយ​សំ​អ៊ាង​អភិបាលខេត្ត​មណ្ឌលគិរី​។​

​លោក​អភិបាលខេត្ត​មណ្ឌលគិរី​និង​ជា​ប្រធាន​គណៈកម្មាធិការ​ត្រួតពិនិត្យ​គ្រឿងញៀន​ខេត្ត​ក្នុង​ពិធី​ដុតបំផ្លាញ​ដើម​កញ្ឆា​ស្រស់ បញ្ជាក់ថា​ដើម​កញ្ឆា​ទាំងអស់​គឺ​បាន​បង្ក្រាប កាលពី​ថ្ងៃទី​៤ ខែមេសា​កន្លងទៅ​នៅក្នុង​ភូមិសាស្ត្រ ស្រុក​អូររាំង ។​

​លោក​ប្រធាន​គណៈកម្មាធិការ​ត្រួតពិនិត្យ​គ្រឿងញៀន​ខេត្ត​បាន​ថ្លែង​នូវ​កោត​ស​សើរ​ដល់​កម្លាំង​សមត្ថកិច្ច និង​អាជ្ញាធរ​ពាក់ព័ន្ធ​ទាំងអស់ ដែល​បាន​យកចិត្តទុកដាក់​បង្ក្រាប បទល្មើស​ដាំ​ដុះ​ដំណាំ​ខុសច្បាប់​ទទួលបាន​ជោគជ័យ ទោះបី​ជនល្មើស​បាន​ប្រើ​រូបភាព​ដាំ​បន្លំ​តាម​ចម្ការ​របស់​បងប្អូន​ជនជាតិដើម​ភាគតិច ក្នុងព្រៃ​ជ្រៅ​ពិបាក​ស្វែងរក​។ លោក​បាន​លើកទឹកចិត្ត ដល់​កម្លាំង​មាន​សមត្ថកិច្ច ត្រូវខិតខំ​ជា​បន្តទៀត ថ្វីបើ​ខេត្តមណ្ឌលគិរី មិនទាន់មាន​ការដាំដុះ​ដំណាំ​កញ្ឆា​ក្នុង​រូបភាព​បទល្មើស​ធំដុំ​ពិតមែន ប៉ុន្តែ​បើ​មិន​បង្ក្រាបបាន​ទាន់ពេល​ទេ ជន​ឆ្លៀតឱកាស​ប្រាកដជា​បង្កើន​សកម្មភាព​នៃ​ការដាំដុះ​ដែល​នាំ​ឲ្យ​មាន​ផលប៉ះពាល់​កាន់តែ​ធ្ងន់ធ្ងរ​។

​យោងតាម​របាយការណ៍​របស់លោក​ឧ​ត្ត​ម​សេនីយ៍​ទោ ឡោ សុខា ស្នងការ​នគរបាល​ខេត្តមណ្ឌលគិរី បាន​ឲ្យ​ដឹងថា ឆ្នាំ​២០២០​កន្លងទៅនេះ សមត្ថកិច្ច​ជំនាញ ប្រឆាំង​គ្រឿងញៀន ធ្វើការ​ស្រាវជ្រាវ និង​បង្ក្រាប​ទាន់ពេល​ជា​បន្តបន្ទាប់​ចំនួន ៤៦​លើក ឃាត់ខ្លួន​ជនសង្ស័យ​ចំនួន ៨៥​នាក់​( ស្រី ៤ នាក់​)​។ ដោយឡែក នៅ​ដើមឆ្នាំ ២០២១ នេះ​កម្លាំង​ជំនាញ​ធ្វើការ​បង្ក្រាបបាន​ចំនួន ១៦​លើក ឃាត់ខ្លួន​ជនសង្ស័យ​ចំនួន ៤៥ នាក់ (​ស្រី ០៩​នាក់​) បញ្ជូនទៅ​តុលាការ​ដើម្បី​ចាត់វិធានការ​តាមច្បាប់​។ ដោយឡែក កាលពី​ថ្ងៃទី​៤ ខែមេសា​កម្លាំង​ជំនាញ បាន​ចុះបង្ក្រាប​ករណី​ដាំ​ដុះ​ដំណាំ​កញ្ឆា​ចំនួន ២​ទីតាំង សរុប​ចំនួន​ជាង ពីរពាន់​ដើម ស្មើនឹង​ទម្ងន់ ៣៨៤​គីឡូក្រាម និង​សម្ភារ​មួយចំនួនទៀត ត្រង់ចំណុច​ចម្ការ​របស់​ប្រជាពលរដ្ឋ នៅក្បែរ​មាត់​អូរ ក្នុងភូមិ​ពូ​ហ្យា​ម ក្នុង​ឃុំ​សែន​មនោ​រម្យ​៕​