​ដោយ: ទេ​ពក​ង្រី / កំពង់ឆ្នាំង: អាជ្ញាធរខេត្ត​កំពង់ឆ្នាំង និង​ក្រុមគ្រូពេទ្យ បាន​ចាប់បញ្ជូន​ខ្លួន អនុប្រធាន​ផ្សារ​អូរឫស្សី​ម្នាក់ នាំយកទៅ​ធ្វើ​ច​ត្តា​ឡី​ស័ក នៅពេល​គាត់ បាន​ចូលមក​ខេត្តកំពង់ឆ្នាំង នៅថ្ងៃនេះ។​

​អនុប្រធាន​ផ្សារ​អូរឫស្សី ដែល​សមត្ថកិច្ច​ឃាត់ខ្លួន ធ្វើ​ច​ត្តា​ឡី​ស័ក ខាងលើនេះ មានឈ្មោះ ឆាយ ធា​រ៉េ​ន អាយុ ៤២ ឆ្នាំ រស់នៅ​ភូមិ​សំរោង សង្កាត់​ផ្សារឆ្នាំង ក្រុង​កំពង់ឆ្នាំង ដែល​បានមកពី​ភ្នំពេញ ក្នុង​តំបន់​ហានិភ័យ​ខ្ពស់ ចូលមកក្នុង​មូលដ្ឋាន កន្លងមក នៅ​ថ្ងៃទី​៦ ខែមេសា ឆ្នាំ​២០២១ ដែល​នៅ​ផ្សារ​អូរឫស្សី បាន​ផ្ទុះ​ករណី​ឆ្លង​កូ​វីដ​១៩ ខ្លាំង។

​សមត្ថកិច្ច​មូលដ្ឋាន បានអោយដឹងថា នៅ​ថ្ងៃទី​៨ ខែមេសា ឆ្នាំ​២០២១ ម្សិលមិញ អាជ្ញាធរខេត្ត បានទទួល​ដំណឹង​នេះ ហើយ ទើប​នៅ​រសៀល​ថ្ងៃទី​៩ អាជ្ញាធរខេត្ត និង​ក្រុមគ្រូពេទ្យ បានមក​យក​បុរស ខាងលើ បញ្ជូន​តាម​រថយន្ត របស់​មន្ទីរ​សុខាភិបាល ទៅធ្វើ​ច​ត្តា​ឡី​ស័ក នៅឯ​ស្រុក​ទឹកផុស ខេត្តកំពង់ឆ្នាំង។​

​លោក​វេជ្ជបណ្ឌិត ងិន ចាន់​សារ៉េត បានបញ្ជាក់​អោយដឹង នៅវេលា​ម៉ោង ៦ និង​២០ នាទី ថ្ងៃទី​៩ មេសា ២០២១​ថា ឈ្មោះ ឆាយ ធា​រ៉េ​ន ជា​អនុប្រធាន ផ្សារ​អូរឫស្សី ។ បុរស​រូបនេះ បាន​យក​សំណាក ធ្វើតេស្ត​លើក​ទី​១ ម្តង​ហើយ នៅ​ថ្ងៃទី​៦ ខែមរ​សា ឆ្នាំ​២០២១ វេលា​ម៉ោង ៣ នៅ​វិទ្យាល័យ​បាក់​ទូក គ្រូពេទ្យ​តម្រូវអោយ ធ្វើ​ច​ត្តា​ឡី​ស័ក នៅផ្ទះ លទ្ធផល​មិនទាន់​ទទួលបាន នៅឡើយ​ទេ​។
​ដើម្បី​បញ្ចៀស​ករណី​ឆ្លង​ណាមួយ ក្នុង​សហគមន៍​នោះ អាជ្ញាធរ និង​ក្រុមគ្រូពេទ្យ បានធ្វើការ​សម្រេចយក​រូបគាត់ ទៅគ្រប់​គ្រង នៅ​មណ្ឌល​ច​ត្តា​ឡី​ស័ក ស្រុក​ទឹកផុស ដើម្បី​តាមដាន​ស្ថានភាព របស់គាត់​បន្តទៀត និង​ងាយស្រួល យក​សំណាក​បន្តទៀត​។​

​លោក​វេជ្ជបណ្ឌិត ងិន ចាន់​សារ៉េត បានធ្វើការ​អំពាវនាវ ទៅដល់​បងប្អូន​ប្រជាពលរដ្ឋ​ទាំងអស់ ដែលមាន​បងប្អូន សាច់ញាតិ នៅ​ខេត្តកំពង់ឆ្នាំង សូមកុំ​វិលត្រឡប់ ចូលមកក្នុង​ទឹកដី​ខេត្ត អោយសោះ បើ​មិន​ដូច្នោះ​ទេ អាជ្ញាធរ និង​ក្រុមគ្រូពេទ្យ និង​ចាប់បញ្ជូន យកទៅ​ធ្វើ​ច​ត្តា​ឡី​ស័ក​ទាំងអស់ ហើយ​នេះ​គឺជា​វិធានការ ការពារ​ទប់ស្កាត់ ករណី​រីក​រាលដាល ឆ្លង​នៅ​កូ​វីដ​-១៩ នៅក្នុង​សហគមន៍​៕/V