​ប្រែ​សម្រួល : កញ្ញា​ដា​លី​ស ៖ បណ្តាញសារព័ត៌មាន​ខ្សែកាប​អភិរក្ស​និយម Fox News បាន​និយាយ​កាលពី​ថ្ងៃ​ព្រហស្បតិ៍​ទី​៨​មេសា​ថា អ្នកការទូត​កំពូល​របស់​លោក​ដូណាល់ ត្រាំ​គឺ​លោក ម៉ៃ ផ​ម​ផេវ ត្រូវ​បាន​ជួល​ឱ្យ​បង្ហាញខ្លួន​នៅលើ​ប៉ុស្តិ៍​ទូរទស្សន៍​ខ្លួន​ក្នុងនាម​ជា “​អ្នក​ចូល​រួមចំណែក​”​។​

​អតីត​រដ្ឋមន្ត្រីក្រសួង​ការបរទេស​និង​ជា​សមាជិក​សភា​រូបនេះ​បាន​និយាយ​នៅក្នុង​សេចក្តីថ្លែងការណ៍​មួយ​ដែល​បញ្ចេញ​ដោយ​ទូរទស្សន៍ Fox News យ៉ាង​ដូច្នេះ​ថា​”​ខ្ញុំ​មាន​បំណង​ផ្តល់​ឱ្យ​ទស្ស​និក​​ជន​នូវ​ទិដ្ឋភាព​មើលឃើញ​ត្រង់ៗ​និង​សម​ហេតុ​សម​ផល​ចំពោះ​ភូមិសាស្ត្រ​នយោបាយ ទំនាក់ទំនង​អន្តរជាតិ និង​គោលនយោបាយ​អាម៉េរិក​ជា​អាទិភាព ដែល​បាន​ជួយ​រៀបចំ​ទិសដៅ​សម្រាប់​ភាព​រុងរឿង​និង​សន្តិសុខ​របស់​អាម៉េរិក​មិន​ធ្លាប់​មាន​ពីមុនមក​”​។​

​នាយក​ប្រតិបត្តិ Fox News Media លោកស្រី ស៊ូ​ហ្សាន​ណេ ស្កុត បាន​និយាយថា “​លោក ម៉ៃ ផ​មផេវ​គឺជា​សំឡេង​មួយ​ក្នុងចំណោម​សំឡេង​ដែល​ត្រូវបានគេទទួលស្គាល់​និង​គោរព​បំផុត​របស់​អាម៉េរិក​​ជុំវិញ​គោលនយោបាយ​ការបរទេស​និង​បញ្ហា​សន្តិសុខ​ជាតិ​។​ខ្ញុំ​ទន្ទឹងរង់ចាំ​ការចូលរួម​ចំណែក​រប​ស់​គាត់​នៅលើ​វេទិកាជា​ច្រើន​របស់​យើង​ដើម្បី​ចែករំលែក​ទស្សនៈ​ដ៏​វិសេស​របស់​គាត់​ជាមួយ​ទស្សនិកជន​​រាប់លាន​នាក់​របស់​យើង​”​។​

​លោក​ផ​មផេវ​បាន​បន្ត​កាន់តំណែងរ​ដ្ឋ​មន្ត្រី​ការបរទេស​ពី​អ្នក​កាន់​តំណែង​មុន​លោក​រិច ធី​ល​ល័​រសុន នៅ​ខែ​មេសា​ឆ្នាំ ២០១៨ រហូត​ដល់​ចុងបញ្ចប់​នៃ​រដ្ឋបាល​ត្រាំ​នៅ​ខែ​មករា​ឆ្នាំ ២០២១​។ មុន​នោះ​គាត់​ធ្លាប់​ជា​នាយក CIA ៕

លោក ម៉ៃ ផ​ម​ផេវ ត្រូវ​បាន​ជួល​ដោយ​ទូរទស្សន៍ Fox News