​ដោយៈ បូកគោ / កំ​ពតៈ ចម្ការ​ស្វាយ​ទំហំ ៣៥ ហិកតា របស់​ប្រជាពលរដ្ឋ ចំនួន ៧៥ គ្រួសារ ស្ថិតនៅ​ភូមិ​ម៉ាក់​ប្រា​ង ឃុំ​កំពង់​គ្រែង ស្រុក​ទឹកឈូ ខេត្តកំពត បាន​រង​ការខូចខាត ព្រោះតែ​ភ្លើង​ឆាបឆេះ កាលពី​រសៀល​ថ្ងៃទី​១១ ខែមេសា ឆ្នាំ​២០២១ ។​

​សមត្ថកិច្ច បានបញ្ជាក់​ថាៈ កាលពី​វេលា​ម៉ោង ២ និង​៣០ នាទី រសៀល​ថ្ងៃទី​១១ ខែមេសា មាន​ករណី​ភ្លើង​ឆេះ ចម្ការ​ស្វាយ​ប្រជាពលរដ្ឋ នៅ​ភូមិ​ម៉ាក់​ប្រា​ង ឃុំ​កំពង់​គ្រែង អស់ ១១.០០០ ដើម លើ​ទំហំ​ផ្ទៃដី ៣៥ ហិកតា​។ ចម្ការ​ទាំងនោះ ជា​របស់​ប្រជាពលរដ្ឋ ចំនួន ៧៥ គ្រួសារ ដែល​រស់នៅ​ភូមិ ឃុំ កើតហេតុ​ខាងលើ​។​

​ប្រភព​ដដែល បាន​បន្តថាៈ តាម​សម្តី​ម្ចាស់​ចម្ការ មួយចំនួន បាន​ផ្តោត​ការសង្ស័យថា មហន្តរាយ​នេះ អាច​កើតឡើង ពី​ក្រុម​ក្មេងៗ ដើរ​ដុត​ឃ្មុំ ខ្វះ​ការប្រុងប្រយ័ត្ន ដោយ​បន្សល់​រងើកភ្លើង នៅនឹងកន្លែង​កើតហេតុ ទើប​បង្ក​ការឆាបឆេះ តែម្តង​។ ប្រតិបត្តិការ​ពន្លត់​អគ្គិភ័យ​នេះ ស្នងការដ្ឋាន​នគរបាល ខេត្តកំពត បាន​ប្រើប្រាស់​ទឹក អស់​ចំនួន ៣ រថយន្ត ទើប​បញ្ឈប់​ការ​រាលដាល បន្ត​ដល់ផ្ទះ​សម្បែង​អ្នកភូមិ​៕/V​