​ប្រែ​សម្រួលៈ​វាសនា​/​បាងកក​៖​មេ​ប៉ូលិស​ក្រុង​ម្នាក់​ឧត្តមសេនីយ៍ សូ​ផុន សា​រ៉ា​ផាត បាន​និយាយ​កាលពី​ថ្ងៃអាទិត្យ​ថា អ្នកគ្រប់គ្រង​ក្លិប​កម្សាន្ត​Krystal Club និង Emerald Club​នៅ​ក្រុង​បាងកក កន្លែង​​ដែល​កូវី​ដ​១៩​រលក​បច្ចុប្បន្ន​បានចាប់ផ្តើម​ឆ្លង​រាលដាល ត្រូវបាន​តុលាការ​សំរេច​ដាក់គុក​ម្នាក់ៗ​២​ខែ​។​

​តុលាការ​បាន​ចេញ​ការសំរេច​នេះ​កាលពី​ថ្ងៃ​សុក្រ​បន្ទាប់ពី​បាន​រកឃើញ​ថា​ពួកគេ​មាន​ទោសកំហុស​រំលោភ​ច្បាប់​គ្រាអាសន្ន​និង​ច្បាប់​ស្តី​ពី​ទីកន្លែង​កម្សាន្ត​សប្បាយ​។​

​លោក​សូ​ផុន​បាន​និយាយថា គណៈកម្មការ​ប៉ូលិស​មួយ​ក៏​កំពុង​ពិចារណា​បិទ​ទីតាំង​ទាំង​២​នេះ​រយៈពេល​៥​ឆ្នាំ បើសិនជា​រកឃើញថា​ពួក​វា​ត្រូវ​បាន​បើក​ដំណើរការ​ហួស​ម៉ោង​កំណត់​ដោយ​អនុញ្ញាត​អោយ​​មាន​ពេស្យាចារ​នៅ​ទីតាំង​របស់​ខ្លួន និង​បើក​ដំណើរការ​ដោយ​គ្មាន​ច្បាប់​អនុញ្ញាត​។​

​រដ្ឋបាល​ក្រុង​មុននេះ​បាន​បញ្ជា​អោយ​ក្លិប រង្គសាល និង​ទីតាំង​កម្សាន្ត​សប្បាយ​ណា​ដែល​ពាក់ព័ន្ធ​នឹង​ការផ្ទុះ​ជំងឺ​ចុងក្រោយ​នេះ​ត្រូវ​បិទ​១៤​ថ្ងៃ​។​

​ប៉ូលិស​១៨​នាក់​នៅ​ស្ថានីយ ថង ល័​រដែល​ល្បាត​ក្នុង​តំបន់​ផ្ទុះ​កូវី​ដ​១៩​នៅ​បាងកក​បាន​ឆ្លង​ជំងឺ​នេះ​។​ទោះ​ជា​ពាក់​ម៉ាស តែ​គ្រូពេទ្យ​សង្ស័យ​ពួកគេ​មិន​ពាក់​ស្រោមដៃ​ហើយ​ឆ្លង​ពេល​យក​ដៃ​ប៉ះ​មុខក្រោយ​​ពី​ឬ​ក្នុងពេល​ល្បាត​តំបន់​ខាងលើ​។​

​ការិយាល័យ​ប៉ូលិស​ក្រុង​បាន​និយាយថា ប៉ូលិស​និង​បុគ្គលិក​ចំនួន​៥៦​នាក់​បាន​ឆ្លងកូវី​ថ​១៩ និង​៣៨​នាក់​ទៀត​ធ្វើ​ចត្តា​ឡី​ស័ក​។​

ក្លិប​Krystal Club នៅ​តំបន់​ថង ល័រនៅ​បាងកក ដែល​ផ្ទុះ​កូវី​ដ រាលដាល​ទៅ​កាន់​៤១​ខេត្ត​របស់​ថៃ​

​បុគ្គលិក​សុខាភិបាល ចាក់​វ៉ាក់សាំង​ប្រគេន​លោកសង្ឃ​នៅ​វត្ត​មួយ​ក្នុង​ក្រុង​បាងកក​

​សូមបញ្ជាក់​ថា នៅ​ថ្ងៃអាទិត្យ​នេះ​ថៃ​បាន​រក​ឃើញ​អ្នក​ឆ្លងកូវី​ដ​១៩​ជិត​១.០០០​នាក់ ហើយ​ក្រសួង​សុខាភិបាល​បាន​ព្រមាន​ថា ត្រូវតែ​រឹតបន្តឹង​ដើម្បី​ពន្យឺត​ល្បឿន​នៃ​ការឆ្លង​រាលដាល​វីរុស​កូរ៉ូ​ណា​នៅរ​លកថ្មី​។​​វា​ជា​ការឆ្លង​ប្រចាំ​ថ្ងៃ​ខ្ពស់បំផុត​ជា​ថ្មី​ទៀត​នៅពេល​ប្រទេស​អាស៊ី​អាគ្នេយ៍​មួយ​នេះ​បាន​ប្រកាសថា​នៅ​២៤​ម៉ោង​កន្លងទៅ​មាន​អ្នក​ឆ្លង​ដល់​ទៅ​៩៦៧​នាក់ ហើយ​លើកលែងតែ​៣​ករណី​ទេ ក្រៅពី​នេះ​ឆ្លង​ក្នុង​​ស្រុក​ទាំងអស់​។​

​ភាគច្រើន​បំផុត​នៃ​ការឆ្លង​ថ្មីៗ​នេះ​ពាក់ព័ន្ធ​នឹង​ការផ្ទុះកូ​វីដ​១៩​ចុង​ក្រោយ​នៅ​ក្លិប​រាត្រី​ពីរ​បី​ក្នុង​ក្រុង​បាងកក និង​ការ​ធ្វើតេស្តិ៍​បង្ហាញថា​វា​បង្កឡើង​ដោយ​វីរុ​សបំលែងខ្លួន​ថ្មី​ដូចនៅ​អង់គ្លេស​ដែល​ឆ្លង​លឿន​។​

​ទោះជា​ការឆ្លង​ភាគច្រើន​នៅ​បាងកក ក៏​នៅ​ថ្ងៃនេះ​អ្នក​ឆ្លងកូវី​ដ​១៩​ចំនួន​២៨១​នាក់​ត្រូវបាន​រកឃើញ​នៅ​ខេត្ត​ឈៀង​ម៉ៃ​ភាគ​ខាងជើង​៕

​ទាហាន​ដំឡើង​គ្រែ​ត្រៀម​ទទួល​អ្នកជំងឺ​កូវី​ដ​១៩​នៅ​មន្ទីរពេទ្យ​កណ្តាលវាល​មួយ​នៅ​ឈៀង​ម៉ៃ​កាលពី​ថ្ងៃអាទិត្យ​