ដោយៈ ប.ជ័យ / បន្ទាយមានជ័យៈ ពលរដ្ឋនៅឃុំបន្ទាយឆ្មារ ១៩ គ្រួសារនិងឃុំគោកឋិន ១១ គ្រួសារ (សរុប ៣០ គ្រួសារ) នៅស្រុកថ្មពួក ដែលបានរងការខូចខាត ១លើកទៀត ដោយសារខ្យល់កន្ទ្រាក់ ក្នុងភ្លៀងកក់ខែ បានទទួលអំណោយគ្រឿងឧបភោគបរិភោគ ពីសាខាកាកបាទក្រហមកម្ពុជា ខេត្តបន្ទាយមានជ័យ ។
លោក អ៊ុំ រាត្រី ប្រធានគណៈកម្មាធិការ សាខាកាកបាទក្រហមកម្ពុជាខេត្ត និងជាអភិបាលខេត្តបន្ទាយ មានជ័យ កាលពីថ្ងទី១១ ខែមេសា ឆ្នាំ២០២១ បានអមដំណើដោយលោក លី សារី អនុប្រធានអចិន្ត្រៃយ៍ សាខាកាកបាទក្រហមកម្ពុជាខេត្ត និងលោក គឹង វណ្ណៈ ប្រធានក្រុមការងារ ចុះជួយស្រុកថ្មពួក ជាអភិបាលរង ខេត្តបន្ទាយមានជ័យ បាននាំយក ទៅប្រគល់ ជូនបងប្អូនពលរដ្ឋ ដែលរងផលប៉ះពាល់ ដោយសារខ្យល់កន្ទ្រាក់ ចំនួន ៣០ គ្រួសារនោះ។
សម្ភារៈនោះអំណោយ ក្នុងមួយគ្រួសារ ទទួលបានអង្ករ ២៥ គីឡូក្រាម, ត្រីខ១០កំប៉ុង, មី១កេសតូច, ទឹកស៊ីអ៊ីវ ៣ដប, មុង១, ភួយ១, សារុង១, ក្រមា១, និងអាវយឺត។
លោក អែម សុខា ប្រធានអនុសាខា និងជាអភិបាលស្រុកថ្មពួក បានអោយដឹងថាៈ ក្នុងភូមិសាស្ត្រស្រុកនេះ នាខែមីនា និងមេសានេះ នៅចំណុចភូមិ ឃុំខ្លះ បានជួបនឹងគ្រោះ ធម្មជាតិ ខ្យល់កន្ត្រាក់ ៣ លើកហើយ ហើយលើកនេះ មាននៅឃុំបន្ទាយឆ្មារ និងឃុំគោក កឋិន សរុប ៣០ ខ្នងផ្ទះ ប៉ុន្តែមិនមានមនុស្ស រងរបួស ឬស្លាប់ទេ។
លោក អ៊ុំ រាត្រី ប្រធានគណៈកម្មាធិការ សាខាកាកបាទក្រហមកម្ពុជាខេត្ត និងជាអភិបាល ខេត្តបន្ទាយ មានជ័យ ពាំនាំបណ្តាំថ្នាក់លើយក ទៅរំលែកទុក្ខលំបាក របស់បងប្អូន ហើយ បានផ្តល់កម្លាំងចិត្ត អោយខិតខំ ជម្នះឧបសគ្គនេះ ហើយបន្តរស់នៅ និងប្រកបរបររកស៊ី ឡើងវិញ ក្នុងបរិយាកាសបង្ការ ការពារគ្រោះធម្មជាតិផង និងគ្រោះនៃការឆ្លងរីករាលដាល ជំងឺកូវីដ ១៩ ផង៕/V-PC
