​ប្រែ​សម្រួល : កញ្ញា​ដា​លី​ស ៖ ទិន្នន័យ​ពី​ក្រសួង​សុខាភិបាល​បាន​បង្ហាញ​នៅ​ថ្ងៃ​ចន្ទ​ទី​១២ មេសា​ថា ឥណ្ឌា​បាន​រាយការណ៍​ករណី​ឆ្លងកូវី​ដ​ចំនួន ១៦៨.៩១២ នាក់​ក្នុង​រយៈពេល​ត្រឹម​មួយ​យប់​ដោយ​វ៉ា​ប្រេ​ស៊ីល​​ក្លាយជា​ប្រទេស​រង​ផលប៉ះពាល់​ខ្លាំងជាងគេ​ទី ២ នៅ​ទូទាំង​ពិភពលោក​ដោយសារ​ជំងឺ​រាតត្បាត​នេះ​។​

​យោង​តាម​ទិន្នន័យ​ដែល​ចង​ក្រោយ​ដោយ​ទីភ្នាក់ងារ​សារព័ត៌មាន​រ៉​យ​ទ័រ ចំនួន​អ្នក​ឆ្លងកូវី​ដស​រុបនៅ​ឥណ្ឌា​បាន​ឈាន​ដល់ ១៣,៥៣ លាន​ករណី ដោយ​វ៉ា​ប្រេ​ស៊ីល​ដែល​មាន​ចំនួន ១៣,៤៥ លាន​ករណី​។ សហរដ្ឋ​អាម៉េរិក​នាំមុខ​គេ​ដោយ​មាន​ឆ្លង​សរុប ៣១,២ លាន​ករណី​។​

​ទិន្នន័យ​បានបង្ហាញ​ថា អ្នកស្លាប់​ក្នុងប្រទេស​ឥណ្ឌា​ក្នុងពេល​ត្រឹម​មួយ​យប់​មាន​ចំនួន ៩០៤ នាក់ ដោយ​សរុប​គឺ​ស្លាប់ ១៧០.១៧៩ នាក់​។​

​ប្រេ​ស៊ីល​មិនទាន់​បាន​រាយ​ការណ៍​អំពី​ចំនួន​អ្នក​ស្លាប់​នៅ​ថ្ងៃ​ចន្ទ​នេះ​នៅឡើយ​ទេ​។​

​យោង​តាម​ទិន្នន័យ​ពី​ក្រសួង​សុខាភិបាល​របស់​ឥណ្ឌា​បានឱ្យដឹង​ថា​រហូត​មក​ទល់​ពេល​នេះ ឥណ្ឌា​បាន​ចាក់​ថ្នាំ​បង្ការ​ចំនួន ១០៤,៥ លាន​ដូស​។​

​បន្ទាប់​ពី​រាយការណ៍​ករណី​ឆ្លង​កើនឡើង​ជា​រៀងរាល់ថ្ងៃ​អស់​រយៈពេល​ជាច្រើន​ខែ​នៅ​ដើមឆ្នាំ​នេះ ប្រទេស​អាស៊ី​ខាងត្បូង​មួយ​នេះ​ឥឡូវ​កំពុងតែ​ប្រឈម​មុខ​នឹង​វិបត្តិ​សុខភាព​ខណៈ​រលក​ទី​ពីរ​ដ៏​សាហាវ​បាន​​បណ្តាល​ឱ្យ​អ្នកជំងឺ​ជោរជន់​ពេញ​មន្ទីរពេទ្យ បង្ក​ឱ្យ​មាន​កង្វះ​ការផ្គត់ផ្គង់​វ៉ាក់សាំង និង​បង្ខំ​ឱ្យ​រដ្ឋ​មួយ​ចំនួន​បិទ​ផ្នែក​ជាច្រើន​៕

​ចំនួន​អ្នក​ស្លាប់​នៅ​ឥណ្ឌា​ក្នុង​រយៈពេល​២៤​ម៉ោង​ចុងក្រោយ​គឺ ៩០៤ នាក់និងឆ្លង ១៦៨.៩១២ នាក់