ដោយៈ​មុនី​រ័ត្ន​/​ភ្នំពេញៈ​កម្លាំង​សមត្ថកិច្ច​នៃ​ស្ន​ងា​ការដ្ឋាន​នគរបាល​រាជធានី​ភ្នំពេញ​បាន​បញ្ជូន​ខ្លួន​ជនសង្ស័យ​ម្នាក់​ដែលជា​អ្នកលេង​តី​ក តុ​ក ( TIK TOK) ទៅ​សាលាដំបូង​រាជធានី​ភ្នំពេញ ពាក់ព័ន្ធ​ករណី​បង្ហោះ​ឃ្លី​ប​វីដេអូ និយាយ​ញុះញង់​បំផុសបំផុល​ថា ចាក់​វ៉ាក់សាំង​បង្ការ​កូ​វីដ​១៩ នាំឱ្យ​មនុស្ស កាលពី​រសៀល​ថ្ងៃទី​១៣ ខែមេសា​។​

រូបថតៈជនសង្ស័យ​ឈ្មោះ គង់ សម្បត្តិ អាយុ​៣៥​ឆ្នាំ

​សមត្ថកិច្ច​បាន​ឲ្យ​ដឹងថា ជនសង្ស័យ​ឈ្មោះ គង់ សម្បត្តិ អាយុ​៣៥​ឆ្នាំ មាន​ស្រុកកំណើត នៅ​ភូមិ​ច្រេស ឃុំ​ត្រងិល ស្រុក​កំពង់​លេង ខេត្តកំពង់ឆ្នាំង បច្ចុប្បន្ន​ប្រកបមុខរបរ​កម្មករ ស្នាក់នៅ​បណ្តោះអាសន្ន ក្នុង​ការដ្ឋាន​ក្រុមហ៊ុន MCC នៅ​បណ្តោយ​ផ្លូវ​៦០​ម៉ែត្រ​សង្កាត់​ចាក់់អង្រែលើ​ខណ្ឌមានជ័យ​ត្រូវបាន​កម្លាំង​សមត្ថកិច្ច​ចាប់​ឃាត់​ខ្លួ​កាលពី​រសៀល​ថ្ងៃទី​១២ ខែមេសា​បន្ទាប់ពី​ជនសង្ស័យ​បាន​បង្ហោះ​ឃ្លី​ប​វីដេអូ​តាម TIK TOK ដែលមាន​គណនី​ឈ្មោះ ចង្ហាន់​ហ៊ុយ ខ្លឹមសារ​ថា “​សូម​អំពាវនាវ ហើយ​សូមបញ្ជាក់​ឱ្យបាន​ច្បាស់​ថា គេ​មិន​ឈឺ​ដូច​ដេញ​គេ​ឱ្យទៅ​ចាក់ បញ្ឆេះ​ឱ្យទៅ​ចាក់ ពេល​គេ​មិន​ចាក់​បញ្ឈប់​គេ​អ្នក​ងាប់​ចង់​ឱ្យគេ​ងាប់​និង​កាត់ត​ឃ្លី​ប​វីដេអូ​មួយទៀត​ដែលមាន​ខ្លឹមសារ​ថា​អូន​ឯង​ចាក់​ថ្នាំ​ទៅ​មិនបាច់​ភ័យព្រួយ​អី​ទេ មើល​ខាងក្រោយ​បង​ឃើញ​ទេ អត់​ភ័យព្រួយ​ទេ ប៉ុន្តែ​ចាក់​ទៅ​ឮ​តែ​ងាប់​មួយៗ គ្មាន​ឮ​អាណា​រស់​បានយូរ​សោះ​” ។​ជនសង្ស័យ​រូបនេះ​ក៏បាន​និយាយ​ឌឺដង​ដាក់​សមត្ថកិច្ច​ថាបើ​អញ​និយាយ បែបនេះ​សមត្ថកិច្ច​មាន​សមត្ថភាព​តាម​ចាប់​អញ​បានទេ​?​។

រូបថតៈជនសង្ស័យ​ឈ្មោះ គង់ សម្បត្តិ អាយុ​៣៥​ឆ្នាំ

លោក​ឧ​ត្ត​ម​សេនីយ៍​ទោ ប៊ុន សុ​សិក្ខា​ស្នងការរង​ទទួល​ផែន​ការងារ​សន្តិសុខ​នៃ​ស្នងការដ្ឋាន​នគរបាល រាជធានី​ភ្នំពេញ​បាន​ប្រាប់​ឱ្យដឹងថា​កម្លាំង​សមត្ថកិច្ច​បង្ក្រាប​ចាប់ខ្លួន​ជនសង្ស័យ​អនុវត្តតាម​បទបញ្ជា​ផ្ទាល់​របស់លោក​ឧ​ត្ត​ម​សេនីយ៍​ឯក ស ថេត អគ្គ​ស្នងការរង​នគរបាលជាតិ និង​ជា​ស្នងការ​នគរបាល​រាជធានី​ភ្នំពេញ​និង​មានការ សម្របសម្រួល​នីតិវិធី​អយ្យការ​អម​សាលាដំបូង​រាជធានី​ភ្នំពេញ​។​ជនសង្ស័យ​រូបនេះ​បាន​ឆ្លើយ​សារភាព​នៅ​ចំពោះមុខ​សមត្ថកិច្ច​ថា​គណនី (TIK TOK) ឈ្មោះ ចង្ហាន់​ហ៊ុយ គឺ​ពិតជា​គណនី (TIK TOK) របស់ខ្លួន ហើយ​បាន​បង្ហោះ​ឃ្លី​ប​វីដេអូ​ទាំង​២​លើក​ពាក់ព័ន្ធ​និង​ការរារាំង​ការអនុវត្ត​វិធានការ​ទប់ស្កាត់​ការឆ្លង​រាលដាល នៃ​ជំងឺ​កូ​វីដ​១៩ ពិតប្រាកដ​មែន មធ្យោបាយ​ប្រព្រឹត្ត​បទល្មើស​តាមរយៈ​ទូរស័ព្ទ​ម៉ាក​VIVO​។​

លោក​ឧ​ត្ត​ម​សេនីយ៍​ទោ ប៊ុន សុ​សិក្ខា បានបញ្ជាក់​ទៀតថា លើក​ទី​១ នៅ​ថ្ងៃទី​៨ ខែមេសា ឆ្នាំ​២០២១ ជនសង្ស័យ​បង្ហោះ​ឃ្លី​ប​វីដេអូ កាត់ត​សារ​សំឡេង​របស់​សម្តេច​តេ​ជោ​នាយករដ្ឋមន្ត្រី ហ៊ុន សែន មាន​រយៈពេល​១៤​វិនាទី ភ្ជាប់​និង​ការនិយាយរ​បស់ជនស​ង្ស័​យ​គង់ សម្បត្តិ នូវ​ខ្លឹមសារ (​សូម​អំពាវនាវ ហើយ​សូមបញ្ជាក់​ឱ្យបាន​ច្បាស់​ថា គេ​មិន​ឈឺ​ដូច​ដេញ​គេ​ឱ្យទៅ​ចាក់ បញ្ឆេះ​ឱ្យទៅ​ចាក់ ពេល​គេ​មិន​ចាក់​បញ្ឈប់​គេ អ្នក​ងាប់​ចង់​ឱ្យគេ​ងាប់​)​។ លើក​ទី​២, នៅ​ថ្ងៃទី​១០ ខែមេសា ឆ្នាំ​២០២១ ជនសង្ស័យ​បាន​បង្ហោះ ឃ្លី​ប​វីដេអូ មាន​រយៈពេល​១៤ វិនាទី ដែលមាន​ខ្លឹមសារ​(​អូន​ឯង​ចាក់​ថ្នាំ​ទៅ​មិនបាច់​ភ័យព្រួយ​អី​ទេ មើល​ខាងក្រោយ​បង​ឃើញ​ទេ អត់​ភ័យព្រួយ​ទេ ប៉ុន្តែ​ចាក់​ទៅ​ឮ​តែ​ងាប់​មួយៗ គ្មាន​ឮ​អាណា​រស់​បានយូរ​សោះ​) ដែល​បាន​បង្ហោះ​ចែកចាយ​តាម​បណ្តាញ​ព័ត៌មាន​សង្គម​៕​សរន​