​ប្រែ​សម្រួល : កញ្ញា​ដា​លី​ស ៖ អតីត​រដ្ឋមន្ត្រីក្រសួង​ការពារជាតិ​លោក ម៉ាក អេ​ស្ពើនិ​យាយថា​សហរដ្ឋអាម៉េរិ​ក​គួរតែ​ដាក់ពង្រាយ​កងទ័ព​បន្ថែមទៀត​នៅតាម​សមុទ្រ​ខ្មៅ​ក្នុងប្រទេស​ប៊ុលហ្គារី​និង​រ៉ូ​ម៉ានី​​ដើម្បី​ទប់ស្កាត់​ការឈ្លានពាន​ពី​រុស្ស៊ី ខណៈ​ភាព​តានតឹង​រវាង​ទីក្រុង​មូ​ស្គូ​និង​ទីក្រុង​វ៉ាស៊ីនតោន​កាន់តែ​ក្តៅគគុក​។​

​លោក​អេ​ស្ពើ ដែល​ឥឡូវនេះ​ជា​សមាជិក​ម្នាក់​នៃ​វិទ្យាស្ថាន​ម៉ាក​ខេន​សម្រាប់​ភាពជា​អ្នកដឹកនាំ​អន្តរជាតិ​នៃ​សាកលវិទ្យាល័យ​រដ្ឋ​អា​រី​ហ្សូ​ណា បាន​និយាយថា​”​ខ្ញុំ​គិតថា​យើង​ចាំបាច់​ត្រូវ​បន្ត​ជំហរ​តតាំង​នឹង​រុស្ស៊ី​​ហើយ​ព្យាយាម​រារាំង​អាកប្បកិរិយា​អាក្រក់​របស់​ពួកគេ​”​។​

​លោក​អេ​ស្ពើ​បាន​និយាយ​ក្នុង​បទសម្ភាសន៍​ជាមួយ​ទីភ្នាក់ងារ​សារព័ត៌មាន​រ៉​យ​ទ័រ​កាលពី​ថ្ងៃ​អង្គារទី​១៣​មេសា​ថា​រដ្ឋាភិបាល​ក្រុង​វ៉ាស៊ីនតោន​គួរតែ​ស្វែងរក​ការធានា​ឡើងវិញ​ដល់​សម្ពន្ធមិត្ត​អឺរ៉ុប​និង​ជំរុញ​ដល់​​សម្ពន្ធមិត្ត​ណា​តូ​តាម​រយៈ​ការ​ដាក់​ពង្រាយ​កម្លាំង​បន្ថែម​ទៀត​នៅក្នុង​ប្រទេស​ប៉ូឡូញ “​ក្នុង​តំបន់​បាល់​ទិក ប្រសិនបើ​វា​សម​ហេតុផល និង កន្លែង​ដូចជា​រ៉ូ​ម៉ានី​និង​ប៊ុលហ្គារី ដោយ​ផ្អែក​លើ​មូលដ្ឋាន​ប្តូរ​វេន ប្រសិនបើ​មិន​អចិន្ត្រៃយ៍​”​។​

​ប្រធានាធិបតីចូបៃ​ដិនបាន​អំពាវនាវ​ដល់​ប្រធានាធិបតី​រុស្ស៊ី​លោក​វ្ល៉ា​ឌី​មៀរ​ពូ​ទីន​កាលពី​ថ្ងៃ​អង្គារ​ឱ្យ​កាត់បន្ថយ​ភាព​តានតឹង​ដែល​បង្កឡើង​ដោយ​ការបង្កើន​កងទ័ព​រុស្ស៊ី​នៅតាម​ព្រំដែន​អ៊ុ​យក្រែន និង បាន​ស្នើ​ឱ្យមាន​ជំនួប​កំពូល​របស់​មេដឹកនាំ​ដែល​កំពុង​បែកបាក់​គ្នា​ទាំង​ពីរ​រូប​នេះ ដើម្បី​ដោះស្រាយ​ជម្លោះ​ជាច្រើន​។​

​រុស្ស៊ី​បាន​ដណ្តើម​យក​តំបន់​គ្រី​មេពី​អ៊ុ​យក្រែន​ក្នុង​ឆ្នាំ ២០១៤​ហើយ​ការប្រយុទ្ធ​គ្នា​បាន​កើន​ឡើង​នៅ​ប៉ុន្មាន​សប្តាហ៍​ថ្មីៗ​នេះ​នៅ​ភាគ​ខាងកើត​អ៊ុយ​ក្រែន​កន្លែង​ដែល​កងកម្លាំង​រដ្ឋាភិបាល​បាន​ប្រយុទ្ធ​ជា​​មួយក្រុម​បំបែក​ខ្លួន​ដែល​គាំទ្រ​ដោយ​រុស្ស៊ី​នៅក្នុង​ជម្លោះ​រយៈពេល ៧ ឆ្នាំ ដែល​រដ្ឋាភិបាល​ក្រុង​គៀវ​និយាយថា​បាន​សម្លាប់​មនុស្ស ១៤.០០០ នាក់​។​

​នៅ​ពេល​គាត់​កំពុង​គ្រប់គ្រង​មន្ទីរ​បញ្ច​កោណ​កាលពី​ឆ្នាំមុន លោក​អេ​ស្ពើ​បាន​គាំទ្រ​ការ​ដាក់​ពង្រាយ​ទ័ព​ប្រហាក់ប្រហែលគ្នា​នេះ​ដែរ​ខណៈ​អតីត​ប្រធានាធិបតី​ដូណាល់​ត្រាំ​បាន​ប្រកាស​ពី​ចេតនា​កាត់​​បន្ថយ​កងទ័ព​អាម៉េរិក​នៅ​អាល្លឺម៉ង់​ប្រហែល​មួយ​ភាគ​បី ដោយ​និយាយ​ថា​ទីក្រុង​បែរ​ឡាំង​បាន​ឆ្លៀត​កេង​យក​ប្រយោជន៍​ពី​សហរដ្ឋ​អាម៉េរិក​ខណៈ​មិនបាន​បំពេញ​កាតព្វកិច្ច​ហិរញ្ញវត្ថុ​ដល់​ណា​តូ​។​

​សហរដ្ឋ​អាម៉េរិក​បាន​ប្រកាស​កាល​ពី​ថ្ងៃ​អង្គារ​ថា​ខ្លួន​នឹង​បង្កើន​កម្លាំង​របស់ខ្លួន​នៅក្នុង​ប្រទេស​អាល្លឺម៉ង់​ចំពេល​មាន​ភាព​តានតឹង​ចុង​ក្រោយ​ជា​មួយ​រុស្ស៊ី​ជុំវិញ​បញ្ហា​អ៊ុ​យក្រែន ដោយ​បោះបង់​ចោល​ផែនការ​របស់​ត្រាំ​ក្នុង​ការដក​កងទ័ព​ប្រហែល ១២.០០០ នាក់​នៃ​កងទ័ព​អាម៉េរិក​ចំនួន ៣៦.០០០ នាក់​នៅ​ទីនោះ​៕

​អតីត​រដ្ឋមន្ត្រីក្រសួង​ការពារជាតិ​លោក ម៉ាក អេ​ស្ពើ​