​ប្រែ​សម្រួល : កញ្ញា​ដា​លី​ស ៖ កាលពី​ថ្ងៃ​អង្គារ​ទី​១៣​មេសា ប្រធានាធិបតី​អាម៉េរិ​លលោក ចូ បៃ​ដិនបាន​ជំរុញ​ឱ្យ​ប្រធានាធិបតី​រុស្ស៊ី​វ្ល៉ា​ឌី​មៀរ ពូ​ទីន “​បន្ថយ​ភាព​តានតឹង​”​បន្ទាប់​ពី​ការបង្កើន​កម្លាំង​​យោធា​រុស្ស៊ី​នៅតាម​ព្រំដែន​អ៊ុ​យក្រែន នៅក្នុង​ការតេ​ទូរស័ព្ទ​ដ៏​តឹងតែង​ជា​លើក​ទី​ពីរ​របស់​មេដឹកនាំ​ទាំង​ពីរ​នៅ​ដើម​អាណត្តិ​ដ៏​ក្មេងខ្ចី​របស់​លោកបៃ​ដិន​។​

​យោង​តាម​សេត​វិមាន លោកបៃ​ដិ​នក៏​ប្រាប់​លោកពូទីន​ដែរថា សហរដ្ឋ​អាម៉េរិក​នឹង “​ធ្វើ​សកម្មភាព​យ៉ាង​ម៉ឺងម៉ាត់​ក្នុង​ការការពារ​ផលប្រយោជន៍​ជាតិ​របស់​ខ្លួន​”​ទាក់ទិន​នឹង​ការ​ជ្រៀតចូល​តាម​​អ៊ី​ន​ធឺ​ណេត​និង​ការជ្រៀតជ្រែក​ក្នុង​ការបោះ​ឆ្នោត​ពី​សំណាក់​រុស្ស៊ី​។ សេត​វិមាន​បាន​និយាយថា​លោកបៃ​ដិនបាន​ស្នើ​ឱ្យ​មាន​កិច្ច​ប្រជុំ​កំពូល​មួយ​នៅក្នុង​ប្រទេស​ទី​បី​នៅ​ប៉ុន្មាន​ខែ​ខាងមុខនេះ​ដើម្បី​​ពិភាក្សា​ពី​បញ្ហា​ពេញលេញ​រវាង​សហរដ្ឋ​អាម៉េរិក និង​រុស្ស៊ី​។​

​ទំនាក់ទំនង​រវាង​បៃ​ដិ​ន​និង​ពូ​ទីនមាន​ភាព​រង្គោះរង្គើ​តាំងពី​ការចាប់ផ្តើម​រដ្ឋបាល​ថ្មី​របស់​អាម៉េរិក​មកម្ល៉េះ​។ ​លោកបៃ​ដិន​កំពុង​ថ្លឹងថ្លែង​សកម្មភាព​ប្រឆាំ​ង​នឹង​រុស្ស៊ី​សម្រាប់​យុទ្ធនាការ​លួច​តាម​អ៊ី​ន​ធឺ​ណេត​ហៅថា SolarWinds ការជ្រៀតជ្រែក​របស់​រុស្ស៊ី​ក្នុង​ការបោះឆ្នោត​ប្រធានាធិបតី​ឆ្នាំ ២០២០ របាយការណ៍​​ស្តី​ពី​ប្រាក់រង្វាន់​របស់​រុស្ស៊ី​លើ​ការសម្លាប់​ទាហាន​អាម៉េរិក​នៅ​អា​ហ្វ​ហ្គានី​ស្ថាន និង ការបំពុល​និង​ការ​ដាក់​គុក​មេដឹកនាំ​ប្រឆាំង​រុស្ស៊ី លោក អា​ឡិច​សី ណា​វ៉ាល់​នី​។​

​មាន​ការព្រួយបារម្ភ​កាន់តែ​ខ្លាំង​ឡើង​នៅ​បស្ចិម​ប្រទេស​អំពី​ការកើនឡើង​នៃ​ការរំលោភ​បទ​ឈប់​បាញ់​នៅ​ភាគ​ខាងកើត​អ៊ុយ​ក្រែន​កន្លែង​ដែល​ក្រុម​បំបែក​ខ្លួន​និង​កងទ័ព​អ៊ុយ​ក្រែន​បាន​ជាប់​នៅក្នុង​​ជម្លោះ​ចាប់តាំងពី​ការ​កាត់​យក​ឧបទ្វីប​គ្រី​មេ​របស់​អ៊ុយ​ក្រែន​ពី​សំណាក់​រុស្ស៊ី​ក្នុង​ឆ្នាំ ២០១៤ ។ ការតេតា​មទូរស័ព្ទ​របស់លោក​បៃ​ដិន​ជាមួយ​លោកពូ​ទីនបាន​កើតឡើង​ខណៈ​ក្រុមអ្នកការទូត​ជាន់​ខ្ពស់​អាម៉េរិក​​និង​មេដឹកនាំ​ណា​តូ​បាន​ថ្កោលទោស​ចំពោះ​ការបង្កើន​កងទ័ព​រុស្ស៊ី​រាប់ពាន់​នាក់​នា​ពេល​ថ្មីៗ​នេះ​។​

​សេត​វិមាន​បាន​និយាយ​នៅក្នុង​សេចក្តីថ្លែងការណ៍​មួយ​ថា​”​ប្រធានាធិបតីបៃដិ​ន​បាន​សង្កត់ធ្ងន់​លើ​ការ​ប្តេជ្ញាចិត្ត​ឥត​ងាក​រ៉េ​របស់​សហរដ្ឋ​អាម៉េរិក​ចំពោះ​អធិបតេយ្យភាព​និង​បូរណភាព​ទឹកដី​របស់​​អ៊ុ​យក្រែន​”​។ សេត​វិមាន​បាន​បន្ថែមទៀតថា លោកបៃ​ដិនបាន​បញ្ជាក់​យ៉ាង​ច្បាស់​ថា រុស្ស៊ី​ត្រូវតែ “​បន្ថយ​ភាព​តានតឹង​”៕

លោកចូ បៃ​ដិន