ដោយ​៖ រ៉ា​ម៉ន / ភ្នំពេញ​៖ ប្រធាន​គណៈកម្មការ​ជាតិ​គ្រប់គ្រង និង​ដឹកនាំ​ការអនុវត្ត វិធាន​ការបិទ​ខ្ទប់ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ បាន​ប្តេជ្ញាចិត្ត​ថា នឹង​បំបាត់​ជំងឺ​កូ​វីដ​-១៩ ឱ្យបាន​ក្នុង​រយៈពេល ១៤ ថ្ងៃ ខណៈដែល​រាជរដ្ឋាភិបាល សម្រេច​បិទ​ខ្ទប់​រាជធានី​ភ្នំពេញ និង​ខេត្តកណ្តាល រយៈពេល ១៤ ថ្ងៃនេះ​។​

​ការប្តេជ្ញាចិត្ត​រួមគ្នា បំបាត់​ជំងឺ​កូ​វីដ​-១៩ ខាងលើនេះ បានធ្វើ​ឡើង ក្នុង​កិច្ចប្រជុំ​បន្ទាន់​មួយ តាមរយៈ video conference នៅ​ម៉ោង ៣ រសៀល រហូតដល់​ម៉ោង ៦​និង​១៩​នាទី ល្ងាច​ថ្ងៃទី​១៥ ខែមេសា ឆ្នាំ​២០២១ នេះ ដោយមាន​ការចូលរួម​ប្រជុំ ពី​លោក ឃួ​ង ស្រេង អភិបាល​រាជធានី​ភ្នំពេញ និង​ជា​អនុប្រធាន​អចិន្ត្រៃយ៍ នៃ​គណៈកម្មការ​ជាតិ​គ្រប់​គ្រ ង​និង​ដឹកនាំ​ការអនុវត្ត វិធាន​ការបិទ​ខ្ទប់ នៅ​សាលា​រាជធានី​ភ្នំពេញ​។​

​លោក អូន ព័ន្ធមុនីរ័ត្ន បាន​មានប្រសាសន៍ថាៈ កិច្ចប្រជុំ តាមរយៈ video conference នេះ មាន​គោលបំណង ឱ្យ​គ្រប់ភាគី​អ្នកពាក់ព័ន្ធ ទាំងអស់ អនុវត្ត​ឱ្យបាន​ជោគជ័យ ទៅតាម​សេចក្តីសំរេច របស់​រាជរដ្ឋាភិបាល ក្នុង​ការបិទ​ខ្ទប់ ដើម្បី​បំបាត់​ជំងឺ​កូ​វីដ​-១៩ ដែល​ការងារ​នេះ យើង​ត្រូវធ្វើ​ឱ្យបាន​លទ្ធផល ល្អប្រសើរ ក្នុង​រយៈពេល ១៤ ថ្ងៃ ដោយ​មិន​ប៉ះពាល់ ដល់​ជីវភាព​រស់នៅ របស់​ប្រជាពលរដ្ឋ ។​

​លោក អូន ព័ន្ធមុនីរ័ត្ន បាន​ជំរុញ​ឱ្យ​សមាជិក​ទាំងអស់ នៅក្នុង​ជួរ​គណៈកម្មការ​ជាតិ​គ្រប់គ្រង និង​ដឹកនាំ​ការអនុវត្ត វិធាន​ការបិទ​ខ្ទប់​នេះ រួមគ្នា​ជួយ​រដ្ឋបាល​រាជធានី​ភ្នំពេញ អនុវត្ត​សេចក្តីសំរេច របស់​រាជរដ្ឋាភិបាល ក្នុង​ការបិទ​ខ្ទប់ ដើម្បី​បំបាត់​ជំងឺ​កូ​វីដ​-១៩ ក្នុង​រយៈពេល ១៤ ថ្ងៃនេះ ទទួលបាន​ជោគជ័យ​។​

​លោក ឃួ​ង ស្រេង ក្នុង​កិច្ចប្រជុំ​នោះ បាន​មានប្រសាសន៍ ពី​កា​េ​ងារ​មួយចំនួន ដែល​អាជ្ញាធរ បាន​កំពុង​អនុវត្ត ដោយ​រដ្ឋបាល​រាជធានី បាន​ប្រើប្រាស់ កម្លាំង​មាន​សមត្ថកិច្ច ដាក់​តាម​គោលដៅ ចំនួន ២៧ គោលដៅ ដើម្បី​អនុវត្ត ការសំរេច​បិទ​ខ្ទប់​នេះ បានដាក់​ចេញ ជា​វិធានការ ចំពោះ​ទំនិញ​ឡើងថ្លៃ ដោយ​រដ្ឋបាល​រាជធានី​ភ្នំពេញ បានឱ្យ​ម្ចាស់​កុងស៊ី កាប់​ជ្រូក គោ និង​អាជីវករ លក់ដូរ​សាច់ គ្រឿង​ហូបចុក ធ្វើ​កិច្ចសន្យា មិនអោយ​ឡើងថ្លៃ ខណៈដែល​ពួកគាត់ បាន​ឡើងថ្លៃ​សាច់ជ្រូក សាច់គោ ក្នុងដំណាក់កាល​នេះ​។ រដ្ឋបាល​រាជធានី​ភ្នំពេញ បាន​ប្រើប្រាស់​កម្លាំង​ល្បាត​ជាប្រចាំ នៅ​តំបន់​ដែល​បានកំណត់ ជា​តំបន់​ពណ៌​ក្រហម ដែលជា​តំបន់​ងាយ​ឆ្លង ជំងឺ​កូ​វីដ​-១៩​។​

​លោក ឃួ​ង ស្រេង បាន​បញ្ជាក់ថា​៖ ការទប់ស្កាត់​ការរីក​រាលដាល ជំងឺ​កូ​វីដ​-១៩ នេះ ដាច់ខាត ត្រូវតែមាន​ការចូលរួម ពី​ប្រជាពលរដ្ឋ បើ​មិនមាន​ការចូលរួម ពី​ប្រជាពលរដ្ឋ​ទេ នោះ​យើង​មិនអាច​ទទួលបាន ជោគជ័យ​ទេ ។ លើ​បញ្ហា​នេះ រដ្ឋបាល​រាជធានី​ភ្នំពេញ បាន​ចលនា​ជាមួយ ប្រជាពលរដ្ឋ​ហើយ ហើយ​ប្រជាពលរដ្ឋ ជាង ៩០ ភាគរយ បាន​ចូលរួម​ជាមួយ​អាជ្ញាធរ និង​រាជរដ្ឋាភិបាល ។​

​ជាក់ស្តែង នៅតាម​ដងផ្លូវ​នានា ខណៈ​អនុវត្ត​នូវ ការសម្រេច​បិទ​ខ្ទប់​នេះ ឃើញថា មាន​ប្រជាពលរដ្ឋ ប្រមាណ​តែ ២ ទៅ ៣ ភាគរយ​ប៉ុណ្ណោះ ដែល​ពួកគាត់​ធ្វើ​ចរាចរណ៍​តាមផ្លូវ ហើយ​ប្រជាពលរដ្ឋ​ទាំងនោះ ភាគច្រើន​ទៀតសោត ជា​ប្រជាពលរដ្ឋ ដែលមាន​ការចាំបាច់ ក្នុង​ការងារ ទៅ​ចាក់​វ៉ាក់សាំង និង​ទៅ​ទទួល​សេវា​សុខាភិបាល ជាដើម​។​

​គួរ​បញ្ជាក់ថា ក្នុង​កិច្ចប្រជុំ​នេះ បាន​ផ្តោតលើ​ការអនុវត្ត វិធាន​ការបិទ​ខ្ទប់​នេះ អោយមាន​ប្រសិទ្ធភាព មិន​ប៉ះពាល់ ដំណើរការ​រស់នៅ របស់​ប្រជាពលរដ្ឋ , រក្សាបាន​ស្ថ​រ​ភាព​ទំនិញ លំហូរ​ទំនិញ , ការអនុវត្ត​ធ្វើយ៉ាងណា កាត់ផ្តាច់ ជា​កង់ៗ​ជំងឺ​កូ​វីដ​-១៩ ។ ការពង្រឹង​លើ​ការធ្វើ​ច​ត្តា​ឡី​ស័ក ការស្រាវជ្រាវ​រក​អ្នកជំងឺ​កូ​វីដ​-១៩ ការធ្វើ​តេស្ត​សំណាក ការចាក់​វ៉ាក់សាំង និង​ការ​គាំពារ ដល់​ប្រជាពលរដ្ឋ​ក្រីក្រ ងាយ​រងគ្រោះ​៕/V​