​ដោយ​៖ ដេប៉ូ / ភ្នំពេញ​៖ រោងចក្រ សហគ្រាស និង​សិប្បកម្ម ចំនួន ១១ ប្រភេទ ត្រូវបាន​អនុ​ញ្ញា ឱ្យ​បើក​ដំណើរការ ជាធម្មតា នៅ​អំឡុងពេល​បិទ​ខ្ទប់ រាជធានី​ភ្នំពេញ និង​ក្រុង​តាខ្មៅ​។ នេះ​បើតាម​ការឱ្យ​ដឹង ពី​សំណាក់​ក្រសួង​ការងារ និង​បណ្តុះបណ្តាល​វិជ្ជាជីវៈ​។​

​បើ​យោងតាម​សេចក្តីសម្រេច របស់​ក្រសួង​ការងារ នៅ​ថ្ងៃទី​១៥ ខែមេសា ឆ្នាំ​២០២១​នេះ បានបញ្ជាក់​ប្រាប់ថាៈ សម្រាប់​ប្រភេទ​រោងចក្រ សហគ្រាស និង​សិប្បកម្ម ដែល​ត្រូវបាន​អនុញ្ញាត ឱ្យ​ដំណើរការ​សកម្មភាព អាជីវកម្ម ក្នុងអំឡុងពេល នៃ​ការអនុវត្ត វិធាន​ការបិទ​ខ្ទប់​ជា បណ្តោះអាសន្ន នូវ​ភូមិសាស្ត្រ​រាជធានី​ភ្នំពេញ និង​ក្រុង​តាខ្មៅ នៃ​ខេត្តកណ្តាល មាន​ដូចខាងក្រោម​៖

១) ផលិត​ម្ហូបអាហារ និង​គ្រឿង​ឧបភោគបរិភោគ ដោយ​រួមទាំង​ទីសត្តឃាត ដែលជា​តម្រូវ​ការចាំបាច់ ប្រចាំថ្ងៃ​។​
២)​សកម្មភាព​ការងារ ដែល​ពាក់ព័ន្ធ​នឹង​ការផ្ដល់​សេវាសាធារណៈ តាម​ការកំណត់ របស់​ស្ថាប័ន​នីមួយៗ ជាអាទិ៍ សេវា​ពន្លត់​អគ្គិភ័យ​, សេវា​ផ្គត់ផ្គង់​អគ្គិសនី​, ទឹកស្អាត​, សេវា​ប្រមូល និង​ដឹកជញ្ជូន​សំរាម​- សំណល់​រឹង ជាដើម​។​
៣) រាល់​សកម្មភាព​ការងារ មុខរបរ ឬ​អាជីវកម្ម ដែល​ដំណើរការ​តាមរយៈ​ប្រព័ន្ធ​អន​ឡាញ​។​
៤) សេវាកម្ម​ផ្គត់ផ្គង់​ទំនិញ ដែលជា​តម្រូវ​ការចាំបាច់ ប្រចាំថ្ងៃ ជាអាទិ៍ ហាង​លក់ទំនិញ ផ្សារ​លក់ដុំ ផ្សារ ឬ​ទីតាំង​លក់​គ្រឿង​ឧបភោគបរិភោគ ដែលមាន​សណ្តាប់ធ្នាប់ ផ្សារ​ម៉ា​ត និង​ភោជនីយដ្ឋាន​-​អាហា​រដ្ឋា​ន ដែល​លក់​ជា​អាហារ​វេច​ខ្ចប់​, ស្ថានីយប្រេងឥន្ធនៈ – ហ្គាស​។​
៥) ការផ្គត់ផ្គង់​សេវា ដែលជា​តម្រូវ​ការចាំបាច់ ប្រចាំថ្ងៃ ជាអាទិ៍ សេវា​សង្គ្រោះបន្ទាន់​, សេវា​សុខាភិបាល និង​ឱសថស្ថាន​, សេវា​ប្រៃសណីយ៍ – ទូរគមនាគមន៍​, សេវា​ធនាគារ និង​ហិរញ្ញវត្ថុ និង​សេវា​ធានារ៉ាប់រង ប៉ុន្តែ​ត្រូវ​កាត់បន្ថយ​ចំនួន បុគ្គលិក​បម្រើការ ឱ្យមក​នៅត្រឹម​កម្រិត​អប្បបរមា​។​
៦) សេវាកម្ម​សណ្ឋាគារ និង​ផ្ទះសំណាក់ ។​
៧) សេវាកម្ម​ដឹកជញ្ជូន​ទំនិញ ចាំបាច់ ដើម្បី​បម្រើឱ្យ​ភូមិសាស្ត្រ ដែល​ត្រូវបាន​បិទ​ខ្ទប់​។​
៨) សេវាកម្ម​ដឹកជញ្ជូន​ទំនិញ​ទូទៅ​ចេញ​-​ចូល ឬ​ឆ្លងកាត់​ភូមិសាស្ត្រ ដែល​ត្រូវបាន​បិទ​ខ្ទប់​ដើម្បី​បម្រើ ឱ្យ​វិស័យ​សង្គម – សេដ្ឋកិច្ច​នៃ​ប្រទេស​។​
៩) ការផលិត​សម្ភារ​បរិក្ខារ​ពេទ្យ និង​ថ្នាំពេទ្យ​។​
១០) ការដ្ឋាន​សំណង់​ដែលមាន​កន្លែង​ស្នាក់​នៅជាប់​ការដ្ឋាន​សំណង់ ។​
១១) សកម្មភាព​ការងារ មុខរបរ ឬ​អាជីវកម្ម​ចាំបាច់​ដទៃទៀត ដោយមាន​ការអនុញ្ញាត ពី​អាជ្ញា​ធរមាន សមត្ថកិច្ច​។​

​ក្នុង​សេចក្តីសម្រេច​ខាងលើនេះ ក្រសួង​ការងារ បានបញ្ជាក់​ពី​ការអនុញ្ញាត ឱ្យ​បុគ្គលិក​ផ្នែក​សន្តិសុខ​, រដ្ឋបាល​, ហិរញ្ញវត្ថុ​, ផ្គត់ផ្គង់ និង​ដឹកជញ្ជូន នៃ​រោងចក្រ សហគ្រាស និង​សិប្បកម្ម ដែល​ត្រូវ​បានឱ្យ​ផ្អាក ដំណើរការ​អាជីវកម្ម ចំនួន​មិន​លើសពី ២៥ នាក់ ក្នុង​មួយ​រោងចក្រ សហគ្រាស មក​បំពេញការងារ ជាធម្មតា ដើម្បី​ធានា​សេវា​អប្បបរមា និង​គ្រប់គ្រង​សន្និធិ​ទំនិញ និង​ផលិតផល របស់ខ្លួន​។​

​ក្រៅពីនេះ សម្រាប់​រាល់​សកម្មភាព​ការងារ មុខរបរ ឬ​អាជីវកម្ម ដែល​ត្រូវបាន​អនុញ្ញាត ដូច​បាន​រៀបរាប់​ខាងលើ បុគ្គល គ្រប់រូប មាន​កាតព្វកិច្ច​ត្រូវអនុវត្ត​វិធានការ​សុខាភិបាល​រួមមាន​ការពាក់​ម៉ាស់ និង​ការរក្សា​គម្លាត​សុវត្ថិភាព ព្រមទាំង​ត្រូវ​ប្រកាន់ខ្ជាប់ នូវ​ការធ្វើ​អនាម័យ ដើម្បី​សម្លាប់​មេរោគ និង​ការ​វាស់​កម្ដៅ ដើម្បី​ប្រយុទ្ធ​នឹង​ទប់ស្កាត់ ការឆ្លង​រាលដាល នៃ​ជំងឺ​កូ​វីដ​-១៩៕/V

​សូម​មើល​សេចក្តីសម្រេច ខាងក្រោម​៖