​ប្រែ​សម្រួលៈ​វាសនា​/​បាងកក​៖​ថៃ​កាលពី​ថ្ងៃ​១៥​មេសា​បាន​រាយការណ៍​អំពី​ការ​ឆ្លងកូវី​ដ​១៩​ថ្មី​ចំនួន​១.៥៤៣​នាក់ ដែល​ជា​កំណើន​នៃ​ការឆ្លង​យ៉ាងគំហុក​បំផុត​ចាប់តាំងពី​ជំងឺឆ្លង​នេះ​បានចាប់ផ្តើម​បង្ហាញ​​វត្តមាន​របស់​វា​នៅក្នុង​ព្រះរាជាណាចក្រ​នេះ​។​ការឆ្លង​ខ្ពស់បំផុត​សំរាប់​ការផ្ទុះកូ​វីដ​១៩​នៅ​រលក​ទី​៤​នាពេលនេះ បណ្តាលអោយ​អាជ្ញាធរ​ត្រៀម​រឹតត្បិត​ការជួបជុំ​និង​ចរាចរណ៍​មនុស្ស​សាជាថ្មី​រួម​មាន​ការ​​បិទ​សាលារៀន​និង​ក្លិប​កម្សាន្ត​។​

​ទោះជា​យ៉ាងណា រដ្ឋ​មន្ត្រី​សុខាភិបាល​បាន​និយាយថា រដ្ឋាភិបាល​មាន​ជំនឿ​ថា​នឹង​អាច​គ្រប់គ្រង​វិបត្តិកូ​វីដ​១៩​បច្ចុប្បន្នេះ​បាន​ដោយ​មិន​ចាំបាច់​បិទ​ខ្ទប់​ទូទាំង​ប្រទេស​ទេ​។​

​ថៃ​តាំងពី​មុន​មក​បាន​ចាត់ចែង​បានល្អ​ក្នុង​ការទប់ស្កាត់​ការចម្លង​វីរុស​កូរ៉ូណា​មកពី​ប្រទេស​ផ្សេងៗ តែ​ការផ្ទុះ​ជំងឺ​ថ្មី​នេះ​បាន​កើតឡើង​នៅពេល​មនុស្ស​ជាច្រើន​ធ្វើដំណើរ​ក្នុងអំឡុងពេល​ចូលឆ្នាំ​សង្ក្រាន្ត​​ថ្មី និង​ការចាក់​សាំង​បង្ការ​វីរុស​កូរ៉ូ​ណា​នៅ​មាន​កំរិត​ទាប​នៅឡើយ​។​

​នៅពេល​ត្រូវ​បាន​សួរថា​តើ​នឹង​មាន​ការបិទ​ខ្ទប់​( lockdowns)​ឡើង​វិញ​ទេ មន្ត្រី​សុខាភិបាល​លោក ឆា​វេត​សាន ណា​ម​វ៉ាត បាន​និយាយថា​វិធានការ​ត្រូវបាន​បង្កើតឡើង​ផ្អែក​តាម​ចំនួន​ឆ្លង​នៅ​តំបន់​​មួយៗ​។​

​រដ្ឋ​មន្ត្រី​សុខាភិបាល លោក​អនុ​ទីន ឆាន​វី​រ៉ាក់​គុ​លបាននិយាយ​នៅក្នុង​សេចក្តីថ្លែងការណ៍​មួយ​ថា វិធានការ​រួម​មាន​កា​រ​បិទ​ទីតាំង​កម្សាន្ត​សប្បាយ ក្លិប បារ និង​កន្លែង​ម៉ាស្សា ព្រម​ទាំង​សាលារៀន​នៅ​ទូ​ទាំ​​ង​ប្រទេស​យ៉ាងហោចណាស់​២​សប្តាហ៍​។​សកម្មភាព​ពាក់ព័ន្ធ​មនុស្ស​៥០​នាក់​ឡើង​ក៏​នឹង​ត្រូវ​ហាមឃាត់ ហើយ​ខេត្ត​ចំនួន​១៨ រួម​មាន​ក្រុង​បាងកក​ត្រូវបាន​ចាត់ថ្នាក់​ជា​តំបន់​ក្រហម​(​ឆ្លង​ខ្លាំង​) និង​៥៩​ខេត្ត​​ទៀត​នៅ​ពណ៌​លឿង​នៅឡើយ​។​

​ភោជ្ជ​នី​យដ្ឋា​ននឹង​មិន​អនុញ្ញាតអោ​យលក់​គ្រឿង​ស្រវឹង​ទេ​នៅ​តំបន់​ក្រហម​និង​ត្រូវ​បិទ​នៅ​ម៉ោង​៩​យប់​។​

​អាជ្ញាធរ​ក៏​បាន​អំពាវនាវ​អោយ​ប្រជាជន​កំហិត​ការ​ធ្វើ​ដំណើរ​និង​ចាប់ផ្តើម​ធ្វើការ​ចេញពីផ្ទះ​។​បណ្តា​ហាង​និង​ផ្សារ​លក់ដូរ​ក៏​នឹង​ត្រូវ​បិទ​នៅ​ម៉ោង​៩​យប់ ។​

​សូមបញ្ជាក់​ថា ការបិទ​ខ្ទប់​ធំ​នៅ​ថៃ​ដើម្បី​ទប់ស្កាត់​ការរីក​រាលដាល​កូវី​ដ​១៩ គឺ​ត្រូវបាន​ធ្វើឡើង​នៅ​ចុង​ខែ​មីនា​ឆ្នាំ​មុន​ហើយ​បំរាម​គោរ​ចរ​ត្រូវបាន​ដាក់​ប្រើ​នៅ​ខែ​មេសា​ក្នុង​ឆ្នាំ​ដដែល​មុន​បន្ធូរបន្ថយ​​មក​វិញ​ក្រោយ​ទប់ស្កាត់​វីរុស​បាន​គួរសម​។​

​ក្នុងចំណោម​អ្នក​ឆ្លង​ថ្មី​កាលពី​ថ្ងៃ​ព្រហស្បតិ៍ មាន​៤០៩​នាក់​នៅ​ក្រុង​បាងកក ដែល​ជា​មជ្ឈមណ្ឌល​ផ្ទុះ​កូវី​ដ​១៩​បច្ចុប្បន្ន​នៅ​ថៃ​។​

​ចំនួន​ឆ្លង​ថ្មី​នេះ​ធ្វើអោយ​ថៃ​មាន​អ្នក​ឆ្លង​សរុប ៣៧.៤៥៣​នាក់ និង​៩៧​នាក់​ស្លាប់​៕

​រដ្ឋ​មន្ត្រី​សុខាភិបាល លោក​អនុ​ទីន ឆាន​វី​រ៉ាក់​គុល អះអាងថា អាជ្ញាធរ​អាច​គ្រប់គ្រង​វិបត្តិកូ​វីដ​១៩​បាន និង​មិន​ចាំបាច់​បិទ​ខ្ទប់​មួយ​ប្រទេស​ទេ​