​ដោយ​៖ ដេប៉ូ / ភ្នំពេញ​៖ លោក​គឹម​សន្តិភាព រដ្ឋលេខាធិការ និង ជា​មន្ត្រី​នាំពាក្យ ក្រសួងយុត្តិធម៌ បានបញ្ជាក់ នៅ​ថ្ងៃទី​១៦ ខែ មេសា ឆ្នាំ ២០២១​នេះ ឱ្យដឹងថា សាល​សវនាការ​របស់ សាលាដំបូង​រាជធានី ខេត្ត សម្រាប់​កាត់ក្តី ត្រូវបាន​ត្រៀម​រួចរាល់​អស់ហើយ សម្រាប់​កាត់ក្តី ក្នុងករណី​អ្នក​បំពាន​វិធានការ​រដ្ឋបាល និង​សុខាភិបាល ក្នុងការ​ទប់ស្កាត់ ការឆ្លង​រាលដាល នៃ​ជំងឺ​កូ​វីដ​-១៩​។​

​គួរ​បញ្ជាក់ថា កាលពី​កន្លងមកនេះ ក្រសួងយុត្តិធម៌ បានបង្ហាញ​ពី​វិធានការ​ទណ្ឌកម្ម ចំពោះ​ការមិន​គោរព​វិធានការ ដើម្បី​ទប់ស្កាត់ ការឆ្លង​រាលដាល នៃ​ជំងឺ​កូ​វីដ​-១៩ ដែល​ក្នុងនេះ មាន​ទាំង​ការផ្តន្ទាទោស ជា​ពិន័យ​ប្រាក់កាស និង​ទោស​ដាក់ពន្ធនាគារ​ផងដែរ​។​

​ចំពោះ​បទល្មើស​ទាំងនេះ មានដូចជា​បទ​គេចវេះ ពី​ការធ្វើ​ច​ត្តា​ឡី​ស័ក ឬ​គេច​ចេញពី​ទីកន្លែង ធ្វើ​ច​ត្តា​ឡី​ស័ក​, បទ​គេច​វះ​ពី​ការព្យាបាល ឬ​គេច​ចេញពី​ទីកន្លែង​ព្យាបាល​, បទ​ចម្លង​ដោយ​ចេតនា នូវ​ជំងឺ​កូ​វីដ​-១៩ ដល់​អ្នកដទៃ​, បទ​មិន​គោរព​វិធានការ​រដ្ឋបាល​, ការមិន​អនុវត្ត​កាតព្វកិច្ច​ពាក់​ម៉ាស , ការមិន​អនុវត្ត​កាតព្វកិច្ច រក្សា​គម្លាត​សុវត្ថិភាព ជាដើម​៕/V