ដោយ​៖​តារា​រិ​ទ្ធ​/​ភ្នំពេញ​៖ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បានចេញ​បទបញ្ជា​ឲ្យ​បើក​យុទ្ធនាកា​ចាក់​វ៉ាក់សាំង​កូ​វីដ ១៩ ដល់​ប្រជាពលរដ្ឋ​ចាប់ពី​អាយុ​១៨ ឆ្នាំ​ឡើងទៅ​ដោយ​ផ្តើមចេញពី «​តំបន់​ក្រហម​» ក្នុង​រាជធានី​ភ្នំពេញ ។ សម្តេច​បានចេញ​បញ្ជា​ឲ្យ​កងទ័ព​ដែល​កំពុង​ចាក់​វ៉ាក់សាំង​ឲ្យ​គ្រួសារ កងទ័ព​នៅ​រាជធានី​ភ្នំពេញ​បើក​យុទ្ធនាការ ។ នេះ​បើ​យោងតាម​សារ​សម្លេង​របស់​សម្តេច​តេ​ជោ ហ៊ុន សែន នា​យប់​ថ្ងៃទី​២៧ ខែមេសា ឆ្នាំ​២០២១​នេះ​។​

 

​តាមរយៈ​សារ​សំឡេង​ដែល​ផ្ញើ​ទៅ​សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ​និង​ផ្ញើ​ទៅ​លោកស្រី ឱ វណ្ណឌី​ន រដ្ឋលេខាធិការ​ក្រសួង​សុខា​ភិ បាល និង​ជា​ប្រធាន​គណៈកម្មការ​ចំពោះ​កិច្ច​ចាក់​វ៉ាក់សាំង​កូ​វីដ​១៩ សម្តេច​បានចេញ​បញ្ជា​ឲ្យ​ក្រសួងការពារជាតិ​ទទួល​ភារកិច្ច​ពី​គណៈកម្មការ​ចំពោះ​កិច្ច​ដើម្បី​បើក​យុទ្ធនាការ ថ្នាក់ជាតិ​ចាក់​វ៉ាក់សាំង​ដល់​ប្រជាពលរដ្ឋ​ក្នុង​តំបន់​ក្រហម​នេះហើយ​ក្នុង​យុទ្ធនាការ​នេះ​ត្រូវធ្វើ​ឲ្យ​បាន​លឿន​បំផុត​។​

​សម្តេច​តេ​ជោ ហ៊ុន សែន បាន​មានប្រសាសន៍ថា​៖ «​បន្តិចទៀត​ខ្ញុំ​ប្រាប់​ទៅ​លោកជំទាវ ឱ វណ្ណឌី​ន ហើយ​ឲ្យ​កងទ័ព​ចូលធ្វើ​តែម្តង​ដើម្បី​ចៀសវាង​ប្រជាជន​ចេញពី​តំបន់​ក្រហម មកចាក់​ខាងក្រៅ ចូល​ទៅរក​ទីតាំងនៅ​ក្នុង​ហ្នឹង​ដោយ​ទទួលយក​ភារកិច្ច​ពី​គណៈកម្មការ​ចំពោះ​កិច្ច​ឲ្យ​កងទ័ព​អនុវត្ត​តែម្តង​យក​វ៉ាក់សាំង​ចាក់​ជូន​ប្រជាជន​នៅ​តំបន់​ហ្នឹង​។​ហើយ កុំ​ខ្វល់​ថា​ប្រជាជន​មកពី​ត្រង់ណា ឲ្យ​តែ​យល់ព្រម​គឺ​ចាក់ ឲ្យ​តែម្តង​ហើយ​ចេញ​កាត​ឲ្យ​គាត់ ព្រោះ​នៅតែ​ប្រជាជន​យើង​ដ​ដែរ​គ្រាន់តែ​មកពី​ខ័​ណ្ឌ​នេះ ខ័​ណ្ឌ​នោះ តែ​យើង​ត្រូវមាន សណ្តាប់ធ្នាប់​ដោយសារ​យើង​ខ្វះ​កន្លែង​ចាក់ អញ្ចឹង​យើង​ត្រូវ​ឲ្យ​អាជ្ញាធរ​មូលដ្ឋាន​កំណត់ថា​ថ្ងៃនេះ ភូមិ​នេះ ថ្ងៃនោះ​ភូមិ​នោះ អញ្ចឹង​យើង​យើង​អាច​ចាប់ផ្តើម​យុទ្ធនា​ការចាក់​វ៉ា​ក់ សាំង​ដោយ​ប្រើ​កម្លាំង​កងទ័ព​ចាក់​តែម្តង ។ យក​តំបន់​ក្រហម​បើក​យុទ្ធនាការ​តែម្តង ដូ​ស​ទី​១​អាច​ចាប់ផ្តើម​មុន​ថ្ងៃទី ៥ ឧសភា​ក៏បាន​»​។​

​សម្តេច​បន្តថា​៖«​ចាក់​ត្រូវ​ចាក់​ប្រជាជន​នៅ​តំបន់​ក្រហម​នេះ​គឺ​ឲ្យ​កងទ័ព​ចូលធ្វើ​តែម្តង​ដើម្បី​បង្កើត​ធាតុ​សាំ​នៅក្នុង​ទីក្រុង​ភ្នំពេញ យើង​កុំ​រំ​ខានទៅ​គណៈកម្មការ​ចំពោះ​កិច្ច​ព្រោះ កងទ័ព​មានបទពិសោធន៍​ហើយ​ក្នុង​ការចាក់​ក្នុងភូមិ ឬ​ទីតាំង​ណាមួយ​នៅក្នុង​សង្កាត់​នោះ គ្រាន់តែ​កំណត់​ភូមិ​នេះ​ចាក់​ថ្ងៃនេះ ភូមិ​នោះ​ចាក់​ថ្ងៃនោះ ឬមួយ​ថ្ងៃ​ចាក់​២ ភូមិ​ហើយ ឲ្យ ប្រជាជន​ទៅ​ចាក់​ឲ្យ​តែ​អាយុ ១៨​ឆ្នាំ​ឡើង​រាប់ទាំង ជនបរទេស​ផងដែរ ធ្វើ​អានេះ​ឲ្យ​សម្រេច បើ​មិន​អញ្ចឹងទេ​នៅ​ទ្រេតទ្រោតៗ អន្ទង់​វែង​ឆ្នាំង​វែង វា​ពិបាក ដូចនេះ​ខ្ញុំ​ឯកភាព វ៉ា​ក់ សាំង​មកដល់​ស្អែក​និង​វ៉ាក់សាំង​ដែល​នៅសល់​ប្រគល់​ឲ្យ​កងទ័ព​តែម្តង ចាក់​នៅ​៤ ខ​ណ្ឌ័​ដែលជា​តំបន់​ក្រហម​តែម្តង​ចាក់​ស្រោច​តែម្តង រួចហើយ​គង់តែ​មកដល់​ទៀត​ទេ បើ​ចាក់ នេះ​មួយ​ដុំ នោះ​មួយ​ដុំ វា​គ្មាន​ប្រយោជន៍​ទេ »​។​

​បើតាម​សម្តេច​តេ​ជោ ហ៊ុន សែន បាន​បញ្ជាក់ថា​ថ្ងៃស្អែក​វ៉ាក់សាំង​យើង​និង​មកដល់​បន្ថែម​បូក​ទៅលើ​វ៉ាក់សាំង​ដែលមាន​នៅសល់​ប្រហែលជា ១ លាន​ដូ​ស ដូចនេះ​ចាក់​ឲ្យ​ប្រជា ជន​បាន​ប្រមាណ ៥០​ម៉ឺន​នាក់ ហើយ​យើង​នឹង​បន្ត​ចាក់​រហូត​អស់​ព្រោះ​វ៉ាក់សាំង​និង​មកដល់​ថ្មី​ទៀត យើង​និង​ចាក់​នៅ​ភ្នំពេញ​និង​ខេត្តកណ្តាល​ឲ្យ​អស់​ប្រជាជន​ប្រមាន​៣ លាន នាក់ ហើយ​បណ្តា​ខេត្ត​ត្រូវ​ផ្អាក​សិន ។ ដូចនេះ​ចាក់​ស្រោច​ទៅលើ​ប្រជាជន​នៅក្នុង ៤ ខ័​ណ្ឌ​នៅ​ភ្នំពេញ បូក​ទាំង​ខេត្តកណ្តាល ។

​សូមជម្រាបថា​គិត​ត្រឹម​ម៉ោង​៧​ព្រឹក ថ្ងៃទី​២៧ ខែមេសា ឆ្នាំ​២០២១​នេះ​កម្ពុជា​បាន​រកឃើញ​អ្នក​ឆ្លង​សរុប​ចំនួន ១១,០៦៣ នាក់​ក្នុងនោះ​ករណី​សហគមន៍​២០​កុម្ភៈ ចំនួន ១០,៥១៣​នាក់​, អ្នកជា​សះស្បើយ​ចំនួន ៣,៧០៤​នាក់​, អ្នក​កំពុង​សម្រាក​ព្យាបាល​ចំនួន ៧២៧០​នាក់​, អ្នកស្លាប់​ចំនួន ៨២​នាក់ និង​អ្នកជំងឺ​កូ​វីដ​១៩​ស្លាប់​ដោយ​ជំងឺ​ផ្សេង​មាន ចំនួន ៧​នាក់​៕​