​ប្រែ​សម្រួល : កញ្ញា​ដា​លី​ស​/CL វគ្គ ១​ភាគ​២ ជើង​ទី​១ ៖ ក្រុម Paris Saint Germain បើកទ្វារ​ផ្ទះ​ស្វាគមន៍​ក្រុម Manchester City សម្រាប់​ជំនួប​ជើង​ទីមួយ​ក្នុង​វគ្គ​ពាក់កណ្តាល​ផ្តាច់ព្រ័ត្រ​នៃ​ក្របខ័ណ្ឌ Champions League រដូវ​កាល ២០២០/២១ នៅ​យប់​ថ្ងៃ​ពុធ​នេះ​វេលា​ម៉ោង ២:០០ រំលង​អធ្រាត្រ​។​

​ក្រុម​ទាំង​ពីរ​កំពុង​ស្ថិត​ក្នុង​កាលវិភាគ​ការប្រកួត​មមាញឹក​ដូចគ្នា ដោយ City លេង​ការប្រកួត​លើក​ទី ៤ របស់​ខ្លួន​ក្នុង​ចន្លោះពេល ១១ ថ្ងៃ ខណៈ​ក្រុម​ម្ចាស់ផ្ទះ PSG នឹង​ត្រៀមខ្លួន​ប៉ះ​ក្រុម​ដដែល​នេះ​ក្នុង​រយៈពេល ១០ ថ្ងៃ​ទៀត​។​

​ទោះយ៉ាងណា ក្រុម​ទាំង​ពីរ​មិន​ខ្វះ​មហិច្ឆតា​លើ​កពាន Champions League លើកដំបូង​រៀងៗ​ខ្លួន​នោះ​ទេ​។ ហើយ PSG ប៊ិះ​តែ​នឹង​ស្គាល់​រសជាតិ​ពាន​នេះ​ទៅ​ហើយ​កាលពី​រដូវ​កាល​មុន ប៉ុន្តែ​ត្រូវ​ចាញ់ Bayern Munich នៅ​វគ្គ​ផ្តាច់ព្រ័ត្រ​។ ចំណែក City ទើប​តែ​ស្គាល់​រសជាតិ​ឡើង​មក​វគ្គ​ពាក់កណ្តាល​ផ្តាច់ព្រ័ត្រ​ពីរដង​ប៉ុណ្ណោះ​ក្នុង​ប្រវត្តិសាស្ត្រ​របស់​ខ្លួន​។

​នៅ​វគ្គ​១/៤​ផ្តាច់ព្រ័ត្រ PSG បាន​ជួប​សងសឹក Bayern បានសម្រេច​ដោយ​ឈ្នះ​ក្នុង​លទ្ធផល​សរុប​ទាំង​ពីរ​ជើង ៣-២​។ ពួកគេ​ឆ្លងកាត់​ផ្លូវ​ដ៏​ពិបាក​បំផុត​ទម្រាំ​ឡើង​មក​វគ្គ​ពាក់កណ្តាល​ផ្តាច់ព្រ័ត្រ ក្រោយ​ផ្តួល Barcelona ផង​ដែរ​នៅ​វគ្គ ១៦ ក្រុម​ចុង​ក្រោយ​ក្នុង​លទ្ធផល​សរុប ៥-២​។​

​ក្រុម​មេឃ​ខៀវ Manchester City បាន​ផ្តួល​ក្រុម Borussia Dortmund ជាមួយ​នឹង​ជ័យជម្នះ​ក្នុង​ការប្រកួត​វគ្គ ១/៤ បន្ទាប់​ពី​ផ្តួល Monchengladbach ក្នុង​វគ្គ​១៦​ក្រុម​ចុងក្រោយ​។ ពួកគេ​ក៏​ជា​ក្រុម​តែមួយគត់​ផងដែរ ដែល​មិន​ស្គាល់​រសជាតិ​ចាញ់​ក្នុង CL រដូវ​កាល​នេះ ដោយ​ឈ្នះ ៩ និង​ស្មើ​១ គឺ​ស្មើ Porto ។​

– ប្រវត្តិ PSG ទល់នឹង Man City

​ក្រុម​មេឃ​ខៀវ Man City មិន​ស្គាល់​ចាញ់​សោះ​ក្នុងជំនួប​ទាំង ៣ លើក​ជាមួយ PSG នៅ​អឺរ៉ុប​។ ទោះយ៉ាងណា ពួកគេ​ឈ្នះ​តែ​ម្ដង​គត់ នោះ​គឺ​នៅក្នុង​វគ្គ ៨ ក្រុម​ចុងជើង​ទី​ពីរ​ក្នុង CL ឆ្នាំ ២០១៥/១៦ នៅ​កីឡដ្ឋាន Etihad ដោយ​លទ្ធផល ១-០ ក្រោយ​ជើង​ទី​មួយ​ស្មើ ២-២ នៅ​ទឹកដី PSG​។ ជំនួប​មួយ​ផ្សេង​ទៀត​របស់​ពួកគេ​គឺ​នៅក្នុង​វគ្គ​ចែក​ពូ​ល​ពាន UEFA Cup រដូវ​កាល ២០០៨/០៩ ដែល​បញ្ចប់​ទៅ​សូន្យ​ស្មើ​។​

​កំណត់ត្រា​ជា​រួម​របស់ PSG ទល់​នឹង​ក្លិប​មកពី Premier League គឺ​ឈ្នះ ៧ ស្មើ ៨ និង​ចាញ់ ៨ ពី​ការប្រកួត ២៣ លើក​។ កំណត់ត្រា​ក្នុង​ទឹកដី​គឺ​ឈ្នះ ៤ ស្មើ ៤ និង​ចាញ់ ៣ ពី ១១ ប្រកួត​។​

City ធ្លាប់​ប៉ះ​ក្លិប​មក​ពី​បារាំង ១០ ដង​ក្នុង​ការប្រកួត​អឺរ៉ុប ហើយ​ពួកគេ​ឈ្នះ ៤ ស្មើ ៣ និង​ចាញ់ ៣​។ លេង​នៅ​ទឹកដី​បារាំង City ឈ្នះ ១ ស្មើ ២ និង​ចាញ់ ២ ពី ៤ ប្រកួត​។​

​ព្យាករណ៍ ៖ ក្រុម​ទាំង​ពីរ​ពូកែ​ស៊ុត​ដូចគ្នា ប៉ុន្តែ City លេង​មិន​ដែល​ចាញ់​ទេ​ក្នុង CL រដូវ​កាល​នេះ ដូច្នេះ​យើង​រំពឹង​ការប្រកួត​នេះ​មាន​គ្រាប់​បាល់​លើសពី​៣​គ្រាប់ ហើយ City អាច​មាន​ប្រៀប​ឈ្នះ​ឬ​ស្មើ​ពី​ការប្រកួត​នេះ​៕