ដោយ៖ ដេប៉ូ / ភ្នំពេញ៖ លោក ហេងសួរ រដ្ឋលេខាធិការ និងជាមន្ត្រីនាំពាក្យ ក្រសួងការងារ បានថ្លែងឱ្យដឹងថាៈ គិតរហូតមដល់ពេលនេះ មានរោងចក្រចំនួនសរុប ២០៦ រោងចក្រ បានមានវិជ្ជមានកូវីដ-១៩ និងកម្មករ ១.៦៧៣ នាក់ ដែលមានវិជ្ជមាន កូវីដ-១៩។
បញ្ជាក់នៅក្នុងសន្និសីទសារព័ត៌មាន ស្តីពីការបន្តបិទខ្ទប់ ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល ដើម្បីទប់ស្កាត់ការឆ្លងរាលដាល នៃជំងឺកូវីដ១៩ នៅថ្ងៃទី២៨ ខែមេសា ឆ្នាំ២០២១នេះ លោក ហេង សួរ បានឱ្យដឹងថាៈ ក្នុងចំណោម រោងចក្រ ទាំង ២០៦ ដែលមានវិជ្ជមានកូវីដ១៩ នេះ គឺនៅរាជធានីភ្នំពេញ មានចំនួន ១៣៤ រោងចក្រ ២៣ រោងចក្រ នៅខេត្តកណ្តាល តាកែវ ២៦ រោងចក្រ ខេត្តព្រះសីហនុ ១៦ រោងចក្រ ស្វាយរៀង ៤ រោងចក្រ កំពង់ឆ្នាំង ១ រោងចក្រ និងកំពង់ចាម ១ រោងចក្រ។ ក្នុងចំណោមនេះ គឺមានកម្មករចំនួនសរុប ១.៦៧៣ នាក់ ដែលមានវិជ្ជមានកូវីដ-១៩។ ក្នុងនេះ នៅរាជធានីភ្នំពេញ មានវិជ្ជមានកូវីដ ១៩ ចំនួន ១.៥៩៨ នាក់ ។ យ៉ាងណាក្តី ចំនួននេះ នឹងមានការប្រែប្រួល ដោយសារពេលនេះ គេកំពុងធ្វើតេស្តទៅលើកម្មករ និយោជិត នៅស្រុកអង្គស្នួល ដើម្បីរកវិជ្ជមានកូវីដ១៩ នេះបន្ថែមទៀត។
លោករដ្ឋលេខាធិការ ក្រសួងការងារ បានបញ្ជាក់បន្ថែមថាៈ នាពេលកន្លងមក មានកម្មករ និយោជិត ជាង ១៧.០០០ នាក់ ដែលបានជាប់ធ្វើចត្តាឡីស័កនាពេល កន្លងមក៕/V-PC
