​ប្រែ​សម្រួលៈ​វាសនា​/​ញូវដែល្លី​៖​ជំនួយ​គ្រាអាសន្ន​ដំបូង​របស់​អាម៉េរិក បាន​ទៅ​ដល់​ឥណ្ឌា​កាលពី​ថ្ងៃ​សុក្រ​ទី​៣០​មេសា នៅ​ពេល​ប្រទេស​នេះ​កំពុង​តស៊ូ​នឹង​កំណើន​នៃ​ការឆ្លង​និង​ស្លាប់​ដោយកូវី​ដ​១៩​ដែល​​ធ្វើអោយ​ជោរជន់​មន្ទីរពេទ្យ​និង​កន្លែង​បូជាសព​។​

​គ្រឿង​ផ្គត់ផ្គង់​វេជ្ជសាស្ត្រ​នេះ​បាន​ទៅ​ដល់​នៅពេល​ឥណ្ឌា​បាន​រក​ឃើញ​អ្នក​ឆ្លង​ថ្មី​ចំនួន​៣៨៥.០០០​នាក់​និង​ជិត​៣.៥០០​នាក់​ទៀត​ស្លាប់​ដោយកូវី​ដ​១៩​នៅ​២៤​ម៉ោង​កន្លងទៅ​។​

​យន្តហោះ​ដឹកជញ្ជូន​យោធា​US Super Galaxy​មួយ​ដែល​ដឹក​ធុង​អុកស៊ីសែន​ជា​ង​៤០០ និង​គ្រឿង​បរិក្ខា​ពេទ្យ​ផ្សេងៗ​ព្រមទាំង​ប្រដាប់តេ​ស្តិ៍​កូវី​ដ​១៩​ជិត​១​លាន​បាន​ចុះ​នៅ​អាកាសយានដ្ឋាន​អន្តរជាតិ​​ក្រុង​ញូ​វ ដែល្លី​កាលពីដើមថ្ងៃ​សុក្រ​។​

​ការបញ្ជូន​ជំនួយ​ចេញ​ពី​មូលដ្ឋាន​យោធា​នៅ​រដ្ឋ​កាលីហ្វ័រ​ញ៉ា​នេះ​កើត​ឡើង​ក្រោយ​ការពិភាក្សា​នៅ​សប្តាហ៍​នេះ​រវាង​ប្រធានាធិបតី​អាម៉េរិក​លោក ចូ បៃ​ដិន និង​នាយករដ្ឋមន្ត្រី ណា​រ៉េ​នដ្រា ម៉ូ​ឌី របស់​ឥណ្ឌា​។​

​ពួក​មន្ត្រី​អាម៉េរិក បាន​និយាយថា យន្តហោះ​ជាច្រើន​ទៀត​ដែល​នឹង​ដឹក​គ្រឿង​បរិក្ខា​ពេទ្យ​ដែលជា​ជំនួយ​របស់​ក្រុមហ៊ុន​និង​បុគ្គល​ឯកជន​អាមឭេរិក នឹង​មកដល់​ឥណ្ឌា​នៅ​សប្តាហ៍​ក្រោយ​។​

​សូមបញ្ជាក់​ថា ប្រទេស​ជាង​៤០​បាន​សន្យា​ជួយ​បញ្ជូន​ជំនួយ​វេជ្ជសាស្ត្រ​ដល់​ឥណ្ឌា ជាពិសេស​អុកស៊ីសែន​។​ការសន្យា​ជួយ​ចេញមក​ពី​ប្រទេស​អង់គ្លេស រុស្ស៊ី កាតា អារ៉ាប់​រួម អូស្ត្រាលី​…​រួមមាន​ម៉ាស៊ីន​ផលិត​​អុកស៊ីសែន​ជិត​៥៥០​គ្រឿង ម៉ាស៊ីន​បន្សុត​អុកស៊ីសែន​ជា​ង​៤.០០០ ធុង​ខ្យល់​១០.០០០ ព្រមទាំង​ឡាន​ដឹក​ឧស្ម័ន​ចំនួន​១៧​គ្រឿង​។​

​ថ្នាំ​ព្យាបាល​កូវី​ដ​១៩​រាប់​ម៉ឺន​ដូស ព្រម​ទាំង​វត្ថុ​ធាតុ​ផលិត​ឳ​សថ​និង​ថ្នាំ​remdesivir​ក៏​ត្រូវ​បញ្ជូន​មក​ឥណ្ឌា​ផងដែរ​។​

​ជប៉ុន​ជា​ប្រទេស​ប្រកាស​ជួយ​ចុងក្រោយ​គេ ដោយ​កាលពី​ថ្ងៃ​សុក្រ​បាន​និយាយថា​ខ្លួន​នឹង​បញ្ជូន​ម៉ាស៊ីន​បន្សុត​ខ្យល់​++++++++++++++++++++++++++++++++++++++++++++++++++++++++ិអុកស៊ីសែន​៣០០​គ្រឿង​និង​ឧបករណ៍​ជំនួយ​ដង្ហើម​៣០០​ទៅកាន់​ឥណ្ឌា​ផងដែរ​។​

​មនុស្ស​ជាង​២០០.០០០​នាក់​ហើយ​បាន​ស្លាប់​ដោយកូវី​ដ​១៩​នៅ​ឥណ្ឌា​នៅពេល​ឥឡូវ ក្នុងនេះ​ជាង​៤៥.០០០​នាក់​ស្លាប់​នៅ​ខែ​មេសា​នេះ​៕

 យន្តហោះយោធាអាម៉េរិកដឹកជំនួយមកដល់អាកាសយានដ្ឋានIndira Gandhiកាលពីថ្ងៃ៣០មេសា

​អ្នកជំងឺ​ដេក​ក្នុង​សាល​អាហារ​មួយ​ដែល​ប្រែក្លាយ​ជា​បន្ទប់​ដាក់​អ្នកជំងឺ​កូវី​ដ​១៩​នៅ​ក្រុង​ញូវដែល្លី​