ប្រែ​សម្រួល : កញ្ញា​ដា​លី​ស​/​បាល់ទាត់ ៖ នៅ​ចុង​សប្តាហ៍​នេះ​មាន​ការប្រកួត​បាល់ទាត់​ក្នុង​លី​ក​អឺរ៉ុប​ធំៗ​ទាំង​៥ ហើយក៏​មាន​ការប្រកួត​ខាប់​អាល្លឺម៉ង់​ផង​ដែរ​។ ប៉ុន្តែ​យើង​លើកយក​តែ​៣​គូ​នៅក្នុង​ក្របខ័ណ្ឌ EPL មក​វិភាគ​ជូន​ប៉ុណ្ណោះ​។

– Crystal Palace vs Man City

​នេះ​នឹង​ក្លាយ​ជា​ការប្រកួត​គួរឱ្យ​ចាប់អារម្មណ៍​មួយ​សម្រាប់​ក្រុម​មេឃ​ខៀវ Manchester City ព្រោះ​ពួកគេ​ស្ថិត​នៅ​ពាក់កណ្តាល​ផ្លូវ​នៃ​វគ្គ​ពាក់កណ្តាល​ផ្តាច់ព្រ័ត្រ Champions League ជាមួយ​ក្រុម PSG​។ នៅពេល​ដំណាលគ្នា​ដែរ ប្រសិនបើ Man City ឈ្នះ​ការប្រកួត​នេះហើយ Man Utd ចាញ់ Liverpool នៅ​ថ្ងៃអាទិត្យ នោះ Man City នឹង​ក្លាយជា​ជើងឯក​របស់​អង់គ្លេស​។​

​ប៉ុន្តែ​ប្រាកដ​ណាស់ Man City នឹង​ទុក​ភ្នែក​ម្ខាង​សម្លឹង​មើល​លើ​ការប្រកួត​ជើង​ទី ២ របស់​ពួកគេ​ជាមួយ PSG នៅក្នុង​ផ្ទះ​ខ្លួន​ឯង​។ មាន​ការអបអរ​យ៉ាង​សម្បើម​ក្នុងចំណោម​អ្នកគាំទ្រ​កាលពី​ពាក់កណ្តាល​សប្តាហ៍​សម្រាប់​ក្លិប ខណៈ​ពួកគេ​បាន​វាយបក​ពី​ចាញ់​១​គ្រាប់​មុន​មក​ផ្តួល PSG ២-១ ហើយ​ឥឡូវ City បាន​បោះ​ជើង​មួយ​ជំហាន​ទៅ​វគ្គ​ផ្តាច់ព្រ័ត្រ​ហើយ​។

​ទម្រង់​លេង​ក្នុង​លី​ក​កំពូល​របស់​មេឃ​ខៀវ​គឺ​ល្អ​ណាស់ ជាមួយ​នឹង​ជ័យជម្នះ ៤ លើក​ពី ៥ លើក​ចុងក្រោយ​របស់​ពួកគេ និង ក្រៅ​ទឹកដី Man City មាន​កំណត់ត្រា​ល្អ​ដាច់​គេ​នៅក្នុង​លី​ក និង​ទទួលបាន ៣៩ ពិន្ទុ​ពី ៤៨ ពិន្ទុ​។​

Crystal Palace ស្ថិត​នៅ​ចំណាត់ថ្នាក់​លេខ ១៣ មាន ៣៨ ពិន្ទុ​និង​មាន ១១ ពិន្ទុ​ខ្ពស់ជាង​តំបន់​កាត់ចោល​។ រដូវ​កាល​របស់​ឥន្ទ្រី​ខៀវ​បាន​ចប់​ហើយ​ឥឡូវនេះ​ព្រោះ​មាន​សុវត្ថិភាព​ពី​ការ​កាត់ចោល ហើយ​ដូច​ឃើញ​ជាក់ស្តែង​ហើយ ទម្រង់​លេង​របស់​ពួក​ចាប់ផ្តើម​ធ្លាក់ចុះ ដោយ​មិន​ខ្វល់ខ្វាយ​រឿង​ស្តារ​ជើង​ឡើងវិញ​នោះ​ឡើយ ក្នុងនោះ​២​ប្រកួត​ចុង​ក្រោយ​របូត​រហូត ៦ គ្រាប់​។

​ការប្រកួត​ក្នុងផ្ទះ​ចុងក្រោយ​របស់​ឥន្ទ្រី​ខៀវ​គឺ​បាន​បញ្ចប់​ទៅ​ក្នុង​លទ្ធផល​ចាញ់ ៤-១ ទល់​នឹង​ក្រុម​តោ​ខៀវ Chelsea បើទោះបីជា​កាលពី​ខែ​មុន​ក្រុម​របស់​លោក រ៉​យ ហុដ​សុន ទប់ Manchester United ក្នុង​លទ្ធផល ០-០ ក៏ដោយ​។​

​ក្នុងជំនួប​ជើង​ទី​មួយ​ដើមរដូវ​កាល​នេះ​គឺ Man City ឈ្នះ ២-០ ថ្ងៃនេះ​យើង​រំពឹង​ពួកគេ​ឈ្នះ​ក្នុង​លទ្ធផល​ដដែល​។

– Chelsea vs Fulham

​ការប្រកួត​នេះ​តែងតែ​មាន​អត្ថន័យ​សម្រាប់​ពួកគេ​ពី​ព្រោះ​វា​ជា​ការប្រកួត​ក្នុង​សង្កាត់​ហ្វូល​ហែម​តែ​មួយ​សម្រាប់​ក្រុម​ទាំង​ពីរ​នៅក្នុង​ទីក្រុង​ឡុង​ដ៍ ដូច្នេះ​យើង​រំពឹង​ការប្រកួត​នេះ​នឹង​លេង​ចេញពី​មហិច្ឆតា​ស្នេហា​បាល់ទាត់​រៀងៗ​ខ្លួន​។​

​ជា​ការពិត​ណាស់​តោ​ខៀវ​នឹង​មាន​ប្រៀប​ឈ្នះ​ជាង​លើ​ការប្រកួត​នេះ ហើយ​មាន​គម្លាត​គុណភាព​ឆ្ងាយ​ណាស់​រវាង​ក្រុម​ទាំងពីរ​។ ឧទាហរណ៍​ជាក់ស្តែង Chelsea នឹង​លេង​ជាមួយ Real Madrid នៅ​សប្តាហ៍​ក្រោយ​ដើម្បី​ព្យាយាម​ឡើង​ទៅ​វគ្គ​ផ្តាច់ព្រ័ត្រ​នៃ​ក្របខ័ណ្ឌ Champions League ។ ដោយឡែក ក្រុម​ឈូកស Fulham អាច​នឹង​ត្រូវ​កាត់ចោល​ទៅ​ក្របខ័ណ្ឌ Championship នៅ​សប្តាហ៍​ក្រោយ​។​

​ក្រោម​ការដឹកនាំ​របស់​លោក ថូ​ម៉ាស់ ធូ​ខល់ ក្រុម Chelsea ពិតជា​លេង​អស្ចារ្យ​ខ្លាំងណាស់ ហើយ​ចាញ់​តែ ១ ប្រកួត​គត់​ក្នុង​រយៈពេល ៣ ខែ​ដែល​លោក​ទទួល​បន្ទុក​ដឹកនាំ​ក្លិប​នៅ​ក្របខ័ណ្ឌ Premier League ។ កាលពី​ពាក់កណ្តាល​សប្តាហ៍ ពួកគេ​បាន​ធ្វើដំណើរ​ទៅកាន់​ប្រទេស​អេ​ស្ប៉ា​ញ កន្លែង​ដែល​ពួក​គេ​លេង​ស្មើ ១-១ ជាមួយ​ក្រុម​ស្តេច​ស Real Madrid នៅ​វគ្គ​ពាក់កណ្តាល​ផ្តាច់ព្រ័ត្រ​ជើង​ទី​មួយ​នៃ​ក្របខ័ណ្ឌ Champions League ។​

​តោ​ខៀវ​ត្រូវការ​ជ័យជម្នះ​នេះ​ដាច់ខាត​ដើម្បី​ព្យាយាម​ដណ្តើម​ចំណាត់ថ្នាក់​កំពូល​ទាំង ៤ ហើយ​ក្រុម​ញញួរ​ធំ West Ham តាម​ពីក្រោយ​ពួក​គេ​តែ ៣ ពិន្ទុ​ប៉ុណ្ណោះ ហើយ​ក្រុម​តោ​ខៀវ​ច្បាស់​ជា​ព្យាយាម​ដណ្តើម​យក​លេខ​៣​ពី Leicester ប្រសិន​បើ​ពួកគេ​អាចធ្វើ​បាន​។​

​ក្រុម Fulham បាន​ប្រយុទ្ធ​តស៊ូ​យ៉ាង​ក្លាហាន​ប៉ុន្តែ​មើល​ទៅ​ពួកគេ​ប្រហែល​គេច​មិន​ផុត​ពី​ការ​កាត់ចោល​នោះទេ​។ ក្រុម​ឈូក​សមានតែ ២៧ ពិន្ទុ និង​មាន ៧ ដាច់​ឆ្ងាយ​ពី​តំបន់​សុវត្ថិភាព ហើយ​អាច​នឹង​ដាច់ ១០ ពិន្ទុ​នៅ​ចុង​សប្តាហ៍​នេះ​។ និយាយ​ឱ្យ​ខ្លី កូនក្រុម​របស់​លោក​ស្កុត ផាក​ឃើ ត្រូវ​តែ​ឈ្នះ​ការប្រកួត​នេះ​ដាច់ខាត​។​

​ព្យាករណ៍ ៖ ដោយហេតុ​ថា Chelsea មិន​ដែល​ចាញ់ Fulham ក្នុងជំនួប​២០ លើកចុងក្រោយ យើង​រំពឹង​ពួកគេ​ឈ្នះ​ទៀត​ក្នុង​លទ្ធផល​យ៉ាង​ហោច ២-០​។

– MAN UTD VS LIVERPOOL

​ក្រុម​បិសាច​ក្រហម Man Utd និង​ហង្ស​ក្រហម Liverpool បានបង្ហាញ​ទម្រង់​លេង​គួរឱ្យ​ធុញទ្រាន់​កាល​នៅ​ទឹកដី Anfield ដោយ​បញ្ចប់​ទៅ​ក្នុង​លទ្ធផល ០-០ ហើយ​អ្វី​ដែល​រឹតតែ​ធុញ​ជាង​នេះ​ទៀត​គឺ​ស៊ុត​បាន​ម្នាក់​៤ និង ៣​ជើង​រៀងៗ​ខ្លួន​ពេញ ៩០ នាទី​។​

​កូនក្រុម​របស់លោក អូ​ឡេ ហ្គា​ន់​ន័​រ សូល​ឃ្យែ ប្រាកដ​ណាស់​នឹងមាន​ទំនុកចិត្ត​ច្រើន​ជាង​ហង្ស​ក្រហម ព្រោះ​ឥឡូវ​កំពុង​ឈរ​នៅ​លេខ​២ ក្របខ័ណ្ឌ Premier League និង​ចាញ់​តែ​ម្តង​គត់​ក្នុង​ការប្រកួត ១២ លើក​ចុងក្រោយ​របស់​ពួកគេ​។ ហើយ​កាលពី​ថ្ងៃ​ព្រហស្បតិ៍ បិសាច​ក្រហម​បាន​វាយបក​យកឈ្នះ​លើ Roma វិញ​ក្នុង​លទ្ធផល ៦-២ ក្រោយ​ត្រូវ​ក្រុម​ភ្ញៀវ​នាំ​មុខមុន ២-១ នៅ​តង់​ទី​មួយ​ក្នុង​ក្របខ័ណ្ឌ Europa League​។​

​ជាមួយគ្នានេះដែរ Liverpool ទើប​តែ​ស្គាល់​រសជាតិ​ជ័យជម្នះ​តែ​ម្ដង​គត់​ក្នុង​ការប្រកួត ៦ លើក​ចុងក្រោយ​របស់​ពួកគេ​នៅ​គ្រប់​ការប្រកួត​ទាំងអស់ ហើយ​លទ្ធផល​ឈ្នះ​នោះ​ទៀតសោត​កើត​ឡើង​លើ​ក្រុម​យុវជន Aston Villa ក្នុង​លទ្ធផល ៤-១​។​

​កូនក្រុម​របស់លោក ជួ​ហ្គិន ក្លប់ ខកខាន​ក្នុង​ការរក​គ្រាប់​បាល់​នៅក្នុង​ការប្រកួត​ក្របខ័ណ្ឌ Premier League ចំនួន ៤ លើកចុងក្រោយ ខណៈ​ពួកគេ​ឡើង​ហួស​វគ្គ​ទី​៤ នៃ​ពានរង្វាន់ FA Cup តែ​ម្ដង​គត់​ក្នុង​រយៈពេល ៥ រដូវ​កាល​ចុងក្រោយ​។​

* កំណត់ត្រា​ត្រួសៗ​នៃ​ក្រុម​ទាំងពីរ​

– ផូល ផុ​កបា រកបាន ៣ គ្រាប់​ពី​ការ​ស៊ុត​នៅ​ខាងក្រៅ​ប្រអប់​គ្រោះថ្នាក់​ក្នុង ៣ ប្រកួត​ចុងក្រោយ​របស់​គេ​។​
– ហង្ស​ក្រហម Liverpool រក​បាន​តែ ៥ គ្រាប់​ប៉ុណ្ណោះ​ក្នុង ៦ ប្រកួត​ចុងក្រោយ ចាប់តាំងពី​ពួកគេ​ឈ្នះ ៧-០ លើ Crystal Palace កាលពី​ខែ​ធ្នូ​។​
– ៧ ប្រកួត​ក្នុងចំណោម ១០ លើកចុងក្រោយ​រវាង​ទាំង​ពីរ​បញ្ចប់​ទៅ​ដោយ​លទ្ធផល​ស្មើគ្នា ដោយ Liverpool ឈ្នះ ២ និង United ឈ្នះ​ម្តង​។​
– បិសាច​ក្រហម​ចាញ់​តែ​មួយ​ប្រកួត​គត់​ក្នុងចំណោម ១៦ លើកចុងក្រោយ​ក្នុងស្រុក​របស់​ពួកគេ​។​

​លទ្ធផល​ព្យាករណ៍ ៖ Man Utd ២-១ Liverpool ៕

​តារាង​ការប្រកួត​បាល់ទាត់