សម្តេច​តេ​ជោៈ​ការចាក់​វ៉ាក់សាំង​បង្ការ​ជំងឺ​កូ​វីដ​១៩ ជូន​ពលរដ្ឋ​រស់នៅ​ក្រុងភ្នំពេញ និង​ខេត្តកណ្តាល ឲ្យ​រួចរាល់​នៅ​ខែឧសភា​-​មិថុនា​

208

ដោយៈ​បូព៌​ព្រឹក្ស​,តារារិទ្ធ,​ភ្នំពេញៈ នៅលើ​ទំព័រ​ហ្វេ​ស​បុក​សម្តេច ក្រោម​អត្ថបទ​«​តើ​កំពូល​កីឡាករ បាល់ទាត់ Messi និង Neymar អាច​ស្លាប់​ទេ ក្រោយ​ចាក់​វ៉ាក់សាំង​ចិន​? មាន​អ្នកលេង​ហ្វេ​ស​ប៊ុ​ក​ម្នាក់​ឈ្មោះ «Ben KH» បាន ខម​មិន​(Comment) ស្នើ​ដល់​សម្តេច​ថា «​ខ្ញុំបាទ​សូម​គោរព​សម្តេច​ពុក​។ ខ្ញុំបាទ​ស្នាក់នៅ​ភូមិ​៨ ក្រុមទី​៣០ សង្កាត់​បឹងកក់​១ ផ្លូវ​៥១៦ ខណ្ឌទួលគោក ខ្ញុំបាទ​និង​អ្នកភូមិ​អាយុ​ក្រោម​៦០​ឆ្នាំ ប្រហែល​៩៨​ភាគរយ មកដល់ពេលនេះ​មិនទាន់​បានទទួល​ការចាក់ វ៉ាក់សាំង លើក​ទី​១ នៅឡើយ​ទេ​។ សូម​សម្តេច​ពុក ជួយ​កូនចៅ​អោយបាន​ចាក់​និង​គេ​ផង​។ សូម​អរគុណ​»​។​

​ជាការ​ឆ្លើយតប​នឹង​សំណូមពរ​នេះ​នៅ​យប់​ថ្ងៃទី​២​ខែឧសភា​នេះ សម្តេច​តេ​ជោ ហ៊ុន សែន​នាយករដ្ឋមន្ត្រី​កម្ពុជា បានបញ្ជាក់​តប​ថា​«​នឹង​ចាក់​ជូន​គ្រប់ៗ​គ្នា​គ្រាន់​តែមាន​មុន​មាន​ក្រោយ​ព្រោះ​ពេទ្យ​យើង​មិន​អាចធ្វើ​មួយថ្ងៃ​ឬមួយ​សប្តាហ៍​អស់​ទេ​។​យើង​នឹង​ចាក់​ជូន​បងប្អូន​នៅ​ភ្នំពេញ​និង​ខេត្តកណ្តាល​ឱ្យ​រួចរាល់​ក្នុង​ខែឧសភា​និង​មិថុនា​២០២១​នេះ​។​ពេលនេះ​កំពុង​ប្រ​ម៉ូ​ល​ផ្តុំ​ការខិតខំ​ចាក់​នៅ​តំបន់​ក្រហម​ឱ្យបាន​មុន​»​។​

​ទន្ទឹមគ្នានេះ​សម្តេច​តេ​ជោ​នាក​រដ្ឋមន្ត្រី​កម្ពុជា​បាន​អំពាវនាវ​ឱ្យ​ប្រជាពលរដ្ឋ​រស់នៅ​រាជធានី​ភ្នំពេញ និង​ខេត្តកណ្តាល មានការ​អត់ធ្មត់​រង់​ចាំ​បន្តិចទៀត ដោយ​រាជរដ្ឋាភិបាល​ផ្តល់ជូន​វ៉ាក់សាំង​បង្ការ​ជំងឺ​កូ​វីដ​១៩​ជូន​ពួកគាត់​បាន គ្រប់ៗ​គ្នា​។ សម្តេច​បញ្ជាក់ថា ខ្ញុំ​ប្រើពាក្យ​ថា​ស្រោច​វ៉ាក់សាំង​ជូន​ប្រជាជន​នៅ​ភ្នំពេញ​ឱ្យមាន​ភាពស៊ាំ មិនឱ្យ​មាន​ឆ្លង​កូ​វីដ​១៩​តទៅទៀត​»​។​

​សូមបញ្ជាក់ថា ពេលនេះ​ក្រសួងការពារជាតិ កំពុងបើក​យុទ្ធនា​ការចាក់​វ៉ាក់សាំង​ជូន​ប្រជាពលរដ្ឋ​នៅ​តំបន់​ក្រហម ក្នុង​ខណ្ឌ​ចំនួន​៤ ក្នុង​រាជធានី​ភ្នំពេញ ដែលជា​តំបន់​មាន​ហានិភ័យ​ខ្ពស់ ដើម្បី​ទប់ស្កាត់​នូវ​ភាព​ធ្ងន់ធ្ងរ​នៃ​ការរីក រាលដាល​ជំងឺ​កូ​វីដ​១៩​។​

​នៅ​យប់​ថ្ងៃ​ដដែល​នេះដែរ សម្តេច​តេ​ជោ ហ៊ុន សែន បាន​ឆ្លើយតប​ទៅនឹង​គណនី Facebook ឈ្មោះ Din Din ថា​នឹង​ត្រៀម​ហៅ​កីឡាករ​បាល់ទាត់​លំដាប់​ពិភពលោក ចំនួន​២​រូប គឺ Messi និង Neymar មក​ទស្សនកិច្ច​ប្រទេស​កម្ពុជា ពេល​ស្ថានភាព​ជំងឺ​កូ​វីដ​១៩​ធូរស្រាល​។​

ការឆ្លើយតប​នេះ បន្ទាប់ពី​ម្ចាស់​ណ​នី Facebook ឈ្មោះ Din Din បានមក Comment យ៉ាង​ដូច្នេះ​ថា «​កូន​ស្នើ​ពុក ពេល​ឈប់​កូ​វីដ​១៩ ចង់​ឲ្យ​សម្តេច​ពុក​ហៅ Neymar និង​Messi មក​ខ្មែរ​យើង​មក​»​។​

សម្តេច​តេ​ជោ ហ៊ុន សែន មានប្រសាសន៍​តប​ថា «​ចាំ​ពុក​សាកល្បង​អញ្ជើញ​គាត់​មក​ទស្សនកិច្ច​ប្រទេស​យើង​»​។​

​សូមជម្រាបថា Messi តារាបាល់ទាត់​ឆ្នើម​ប្រចាំ​ក្លឹប​កំពូល​អេ​ស្ប៉ា​ញ Barcelona មាន​សញ្ជាតិ​អា​ហ្ស​ង់​ទីន និង Neymar តារាបាល់ទាត់​ឆ្នើម​ប្រចាំ​ក្លឹប​កំពូល​បារាំង Paris Saint-Germain មាន​សញ្ជាតិ​ប្រេ​ស៊ី​ល ដែល​សុទ្ធសឹង​ជា​ប្រទេស​ស្ថិតនៅ​អាម៉េរិក​ឡាទីន​៕