រកឃើញ​អ្នកជំងឺ​កូ​វីដ​១៩ ទៅ​ចាក់​វ៉ាក់សាំង​លើក​ទី​២ មណ្ឌល​សុខភាព​ឃ្មួញ និង​មណ្ឌល​សុខភាព គីឡូម៉ែត្រ​លេខ​៩ ខណៈ​អ្នកជំងឺ​កូ​វីដ​១៩ ចំនួន​២​នាក់​ផ្សេងទៀត គឺជា​បុគ្គលិក ធ្វើការ​នៅ​ផ្សារ​ម៉ាក្រូ​

252

​ដោយៈ សុផល / ភ្នំពេញ​៖ ក្រសួងសុខាភិបាល បាន​រកឃើញ​អ្នកជំងឺ​កូ​វីដ​១៩ ទៅ​ចាក់​វ៉ាក់សាំង លើក​ទី​២ នៅ​មណ្ឌល​សុខភាព​ឃ្មួញ និង​មណ្ឌល​សុខភាព គីឡូម៉ែត្រ​លេខ​៩ ខណៈ​អ្នកជំងឺ​កូ​វីដ​១៩ ចំនួន​២​នាក់​ផ្សេងទៀត ជា​អ្នកធ្វើការ​នៅ​ផ្សារ​ម៉ាក្រូ​។​

​មណ្ឌល​សុខភាព​ឃ្មួញ មាន​ទីតាំង​ស្ថិតនៅ ភូមិ​បន្លា​ស្អិត សង្កាត់​ឃ្មួញ ខណ្ឌ​សែន​សុខ រាជធានី​ភ្នំពេញ ហើយ​អ្នកជំងឺ​កូ​វីដ​១៩ បាន​ទៅ​ចាក់​វ៉ាក់សាំង​លើក​ទី​២ នៅ​ទីតាំង​នេះ នៅក្នុង​លេខ​រៀង​ទី ៤៨ កាលពី​ថ្ងៃទី​៣០ ខែមេសា ឆ្នាំ​២០២១​។​

​មណ្ឌល​សុខភាព គីឡូម៉ែត្រ​លេខ​៩ មាន​ទីតាំង​ស្ថិតនៅ ផ្លូវជាតិ​លេខ​៥ សង្កាត់​ច្រាំង​ចំរេះ​១ ខណ្ឌឫស្សីកែវ​។ អ្នកជំងឺ​កូ​វីដ​១៩ បាន​ទៅ​ចាក់​វ៉ាក់សាំង​លើក​ទី​២ នៅ​ទីតាំង​នេះ នៅ​ថ្ងៃទី​៣០ ខែមេសា ឆ្នាំ​២០២១​។​

​ផ្សារ​ម៉ាក្រូ មាន​ទីតាំង​ស្ថិតនៅ​សង្កាត់​ភ្នំពេញ​ថ្មី ខណ្ឌ​សែន​សុខ រាជធានី​ភ្នំពេញ​។ អ្នកជំងឺ​កូ​វីដ​១៩ ចំនួន ២ នាក់ ជា​បុគ្គលិក​ធ្វើការ នៅទីនេះ ខាង​ផ្នែក​ត្រី នៃ​តំបន់​អាហារ​ស្រស់​។ អ្នកពាក់ព័ន្ធ ជា​ប្រជាពលរដ្ឋ ដែល​ទៅ​ដើរ​ផ្សារ និង​អ្នក​ដែលមាន​ទំនាក់ទំនង ជាមួយ​បុគ្គលិក​នៅទីនេះ ចាប់ពី​ថ្ងៃទី​២០ ដល់​ថ្ងៃទី​២៨ ខែមេសា ឆ្នាំ​២០២១​។​

​អនុគណៈកម្មការ​ស្រាវជ្រាវ​កូ​វីដ​១៩ បាន​អំពាវនាវ​ដល់​ប្រជាពលរដ្ឋ និង​បុគ្គល​ពាក់ព័ន្ធ នៅ​ទីតាំង​ទាំង បី​នេះ សូម​ដាក់ខ្លួន ដាច់ដោយឡែក និង​យកចិត្តទុកដាក់ តាមដាន​សុខភាព​របស់ខ្លួន រយៈពេល ១៤ ថ្ងៃ ចាប់ពី​ថ្ងៃ​ដែល​អ្នក​បាន​ប៉ះពាល់ ឬ​បាន​ទៅ​ទីកន្លែង មាន​ហានិភ័យ​នេះ​។ ប្រសិនបើ​មាន​រោគសញ្ញា ដូចជា​៖ គ្រុនក្ដៅ​, ក្អក​, កណ្ដាស់​, ឈឺបំពង់ក ឬ​ដកដង្ហើម​ខ្លីៗ ឬ សង្ស័យ សូមមេត្តា​ប្រញាប់ ទៅធ្វើ​តេស្ត រក​មេរោគ​កូ​វីដ​១៩៕/V​