មន្ទីរ​សុខាភិបាល ខេត្តបន្ទាយមានជ័យ ប្រជុំ​ក្រុមការងារ​បច្ចេកទេស ព្យាបាល​ជំងឺ​កូ​វីដ​-១៩ និង​ក្រុមគ្រូពេទ្យ​ជួរមុខ ខណៈ​តួលេខ​អ្នក​ជម្ងឺ ហាក់​ចុះ​-​ឡើង​

172

​ដោយ​៖ ភ្នំ​ស្វាយ / បន្ទាយមានជ័យ​៖ មន្ទីរ​សុខាភិបាល ខេត្តបន្ទាយមានជ័យ ប្រជុំ​ក្រុមការងារ បច្ចេកទេស ព្យាបាល​ជំងឺ​កូ​វីដ​-១៩ ដែល​បានរៀបចំ ចំនួន ៩ កន្លែង នៅ​ខេត្តបន្ទាយមានជ័យ ។​ ​មុននេះ​ដែរ ក៏មាន​ប្រជុំ​រៀបចំ ពង្រឹង​ក្រុមគ្រូពេទ្យ​ជួរមុខ​។ កិច្ចប្រជុំ​នោះ ធ្វើឡើង ខណៈ​តួលេខ រកឃើញ​អ្នក​ជម្ងឺ​កូ​វីដ​១៩ ថ្មី ហាក់​បាន​ថយចុះ​-​កើនឡើង នៅ​ប៉ុន្មាន​ថ្ងៃ ចុងក្រោយ​នេះ ។​

​លោក​វេជ្ជបណ្ឌិត ឡេ ច័ន្ទ​សង្វាត ប្រធាន​មន្ទីរ​សុខាភិបាល នៃ​រដ្ឋបាលខេត្ត​បន្ទាយមានជ័យ ក្នុង​កិច្ចប្រជុំ កាលពី​ថ្ងៃទី​២ ខែឧសភា ឆ្នាំ​២០២១ បាន​និយាយថា​៖ ទោះជា​មានការ​លំបាក និង​ការ​ប្រឈម​ខ្ពស់ យ៉ាងណាក៏ដោយ ក៏​យុទ្ធ​មិត្ត​អាវ​ស (​គ្រូពេទ្យ និង​មន្ត្រី​សុខាភិបាល​) បាន​ប្តេជ្ញា​បន្ត​បំពេញ កាតព្វកិច្ច ដ៏​ឧត្តុង្គឧត្តម​នេះ ឲ្យ​សម្រេច​ជោគជ័យ​។​

​លោក​បានទទួល​ស្គាល់ នូវ​ការខិតខំ​ឥត​សំចៃ បាន​លទ្ធផល​ល្អ មាន​ប្រសិទ្ធភាព របស់​យុទ្ធ​មិត្ត អាវ​ស ដែល​អនុវត្តតាម​បទបញ្ជា និង​ទទួលខុសត្រូវ​ខ្ពស់ ក្នុងការ​បំពេញ​តួនាទី ភារកិច្ច ។ ក្នុងនាម​មន្ទីរ លោក​សូមអោយ​មន្ត្រី ដក​បទពិសោធន៍ ពង្រឹង និង​ធ្វើ​បច្ចុប្បន្នភាព​ថែមទៀត លើ​ការងារ​បច្ចេកទេស នៃ​ការពិនិត្យ ថែទាំ​ព្យាបាល អ្នក​ជម្ងឺ​កូ​វីត​១៩ ។​

​សូម​រំលឹក​ដែរ​ថា កាលពី​ថ្ងៃទី​៣០ ខែមេសា លោក​វេជ្ជបណ្ឌិត ឡេ ច័ន្ទ​សង្វាត ក៏បាន​ប្រជុំ​ដឹកនាំ និង​ការរៀបចំ​ក្រុមគ្រូពេទ្យ ជួរមុខ របស់​មន្ទីរពេទ្យ បង្អែក​ប៉ោយប៉ែត ដើម្បី​ពិភាក្សា​ការងារ បច្ចេកទេស ក្នុង​ការជួយ​សម្រាលកូន ជូន​ស្ត្រី​ឈី​ពោះ​គ្រប់​ខែ តែ​ជា​អ្នកមាន​វិជ្ជមាន​កូ​វីដ​-១៩ និង​ការ​តៀម​ក្រុម គ្រូពេទ្យ​វះកាត់ ផងដែរ​។ មន្ទីរ​សូម​អរគុណ ចំពោះ​ក្រុមគ្រូពេទ្យ ដ៏​អង់អាច ដែល​បាន​លះបង់​អ្វីៗ​គ្រប់យ៉ាង ដើម្បី​បុព្វហេតុ ប្រយុទ្ធ​នឹង​ជំងឺ​កូ​វីដ​-១៩ ។ ក្នុងនាម​ជា​ថ្នាក់ដឹកនាំ និង​មន្ត្រី​សុខាភិបាល ព្រមទាំង​ប្រជាពលរដ្ឋ ខេត្តបន្ទាយមានជ័យ​វ លោក​សូម​គោរព​ការដឹងគុណ និង​ការលះបង់​របស់ ក្រុមគ្រូពេទ្យ​យើង ទាំងអស់គ្នា ។

​គួរ​រំលឹក​ដែរ​ថា កាលពី​វេលា​ម៉ោង ៣​និង​១៥​នាទី ល្ងាច​ថ្ងៃទី​៣០ ខែមេសា ឆ្នាំ ២០២១ ក្រុមគ្រូពេទ្យ​ឆ្មប នៃ​ម​ន្ទូ​ី​រ​ពេទ្យ​បង្អែក​ប៉ោយប៉ែត ក្រុង​ប៉ោយប៉ែត បាន​ជួយ​សម្រាលកូន​ស្ត្រី គ្រប់​ខែ​ម្នាក់ ដោយ​ជោគជ័យ ដោយ​មិនបាច់​វះកាត់ ក្នុងស្ថានភាព​ដ៏​គ្រោះថ្នាក់ និង​មាន​ហានិភ័យ​ខ្ពស់​។ ពោលគឺ​ស្ត្រី​នោះ ជា​អ្នក​ជម្ងឺ​កូ​វីដ​១៩ ម្នាក់ នៅ​ក្រុង​ប៉ោយប៉ែត ។​

​សេចក្តីជូនដំណឹង​រប​ស់ រដ្ឋបាលខេត្ត​បន្ទាយមានជ័យ ជម្រាបជូន​សា​ធាណ​ជន អំពី​លទ្ធផល​នៃ​ការវិភាគ វត្ថុ​សំណាក​រក មេរោគ​កូ​វីដ​-១៩ កន្លងមក គឺ​៖ ១/ គិតពី​ថ្ងៃទី​២៥ ដល់ ២៩ ខែមេសា មាន ២៤៤ នាក់​។ ថ្ងៃទី​២៩ ខែមេសា មាន ៣៦ នាក់​។ ថ្ថៃទី​៣០ ខែមេសា មាន ៣៥ នាក់ និង​លទ្ធផល​ពី​ឧបករណ៍​តេស្ត រហ័ស ថ្ងៃទី​១ ខែឧសភា បឋម​មាន ៦២​នាក់ និង​ថ្ងៃទី​២ ឧសភា បឋម​មាន ៥១ នាក់ ៕/V​