ដោយៈ ជា សីហៈ​/​ភ្នំពេញៈ ក្រសួង​រ៉ែ​និង​ថាមពល នៅថ្ងៃនេះ រហូតដល់​ថ្ងៃទី​០៦ ខែ ឧសភា កំពុងតែ​ទទួល​រៀបចំ​ជា​ម្ចាស់ផ្ទះ​នៃ​កិច្ចប្រជុំ​ក្រុមការងារ​អនុវិស័យ​ថាមពល កកើតឡើង​វិញ​និង​កិច្ចប្រជុំ​ពាក់ព័ន្ធ តាម​ប្រព័ន្ធ​អន​ឡាញ ។

​ប្រភព​ដដែល​បាន​អះអាងថា នេះ​គឺជា​កិច្ចប្រជុំ​អន្តរជាតិ ស្តីពី​ការបង្កើន​បណ្តាញ​សិក្សា ស្រាវជ្រាវ​និង​អភិវឌ្ឍន៍​ថាមពល​កកើត​ឡើងវិញ​សម្រាប់​តំបន់​អាស៊ាន (Workshop on Nodal Network of Renewable Energy (RE) Research and Development) ដែល​ត្រូវ បានរៀបចំ​ឡើង​ដោយ​ក្រសួង​រ៉ែ​និ​ថាមពល ក្រោម​កិច្ចសហប្រតិបត្តិការ​ក​ម្ម​វិធី ថាមពល​អាស៊ាន​-​អាល្លឺម៉ង់ (ASEAN-German Energy Programme)​។​

​កម្មវិធី​នេះ​ដឹកនាំ​ដោយ​លោក វិចទ័រ ហ្សូ​នា អគ្គនាយក​នៃ​អគ្គនាយកដ្ឋាន​ថាមពល និង​ជា​ឧ​ត្ត​ម​មន្ត្រី​ថាមពល​អាស៊ាន ដោយមាន​ការអញ្ជើញ​ចូលរួម​ពី​បណ្តា​សមាជិក ក្រុមការងារ​អនុវិស័យ​ថាមពល​កកើតឡើង​វិញ​នៃ​ប្រទេស​អាស៊ាន​ទាំង​១០ តំណាង ពី​បណ្តាញ​សកល​វិទ្យាល័យ​អាស៊ាន (AUN) សហព័ន្ធ​វិស្វកម្ម​អាស៊ាន (AFEO) លេខាធិការដ្ឋាន​អាស៊ាន (ASEAN Secretariat) និង​បណ្តា​ស្ថាប័ន​អន្តរជាតិ​ពាក់ព័ន្ធ ដទៃទៀត ។

​របៀបវារៈ​នៃ​កិច្ចប្រជុំ​នេះ​ខាងលើ រួមមាន​១. ទិដ្ឋភាព​ទូទៅ​របស់​កម្មវិធី​ថាមពល អាស៊ាន​-​អាល្លឺម៉ង់​, សារៈសំខាន់​នៃ​ការបង្កើត​កម្មវិធី​បណ្តា​ញ​នៃ​ការសិក្សា​ស្រាវជ្រាវ និង​អភិវឌ្ឍន៍​ថាមពល​កកើត​ឡើងវិញ​អាស៊ាន​, ពិនិត្យ និង​ពិភាក្សា​សកម្មភាព​សំខាន់ៗ របស់​បណ្តាញ​នេះ ដើម្បី​គាំទ្រ​ការអនុវត្ត​ផែនការ​សកម្មភាព​នៃ​កិច្ចសហប្រតិបត្តិការ ថាមពល​អាស៊ាន ដំណាក់កាល​ទី​២ ឆ្នាំ​២០២១-២០២៥ និង​ការចុះ​អនុស្សារណៈ យោគយល់​គ្នា​លើ​កិច្ចសហប្រតិបត្តិការ​ប​ណ្តា​ញ​នៃ​ការសិក្សា​ស្រាវជ្រាវ និង​អភិវឌ្ឍន៍ ថាមពល​កកើត​ឡើងវិញ​អាស៊ាន រវាង​ដៃគូរ ៕​/PC