ដោយៈ មុនី​រ័ត្ន​/​ភ្នំពេញ​: លោក កៅ ទី មេធាវី​តំណាង​ឲ្យ​ក្រុមហ៊ុន​ឡាយ​អិន តារា ឯ​.​ក បាន​ប្ដឹង​ពី​ឈ្មោះ​លឹម ហេង ភេទ​ប្រុស មាន​ទីលំនៅ​បច្ចុប្បន្ន​ផ្ទះ​លេខ​១៦៣ ផ្លូវ​៣៦៩ ភូមិ​ដើម​ចាន់ សង្កាត់​ច្បារអំពៅ​ទី​២ ខណ្ឌ​ច្បារអំពៅ រាជធានី​ភ្នំពេញ ពីបទ​រំលោភ​លើ​ទំនុកចិត្ត និង​បទ​បរិហាកេរ្ដិ៍​។​

​លោក​មេធាវី កៅ ទី បាន​ជម្រាបជូន​ឯកឧត្តម​ព្រះរាជអាជ្ញា​ថា កាលពី ថ្ងៃទី​១៤ ខែសីហា ឆ្នាំ​២០២០ ឈ្មោះ លឹម ហេង បានមក​ទំនាក់ទំនង​ទិញ​គម្រោង​សាងសង់​អគារ​ខុន​ដូ​សហកម្មសិទ្ធិ​៣៦​ជាន់​សម្រាប់​សាងសង់​ខុន​ដូ សហកម្មសិទ្ធិ​៣៦​ជាន់​ដោយ​ភាគី​ទាំងពីរ​យល់ព្រម​អនុវត្តតាម​ប្រការ​នីមួយៗ ដែល​បានចែង​នៅក្នុង កិច្ចសន្យាលក់​-​ទិញ​គម្រោង​សាងសង់ ព្រមទាំង​បាន​ផ្តិតមេដៃ​ស្ដាំ​ទទួលស្គាល់​នៅលើ​កិច្ច សន្យា​លក់​-​ទិញ​គម្រោង រួចហើយ បាន​បន្ត​ចុះ​កិច្ចសន្យាលក់​-​ទិញ​គម្រោង​សាងសង់​អគារ​ខុន​ដូ សហកម្មសិទ្ធិ ៥៣​ជាន់ និង​ដំបូល​ទ រ៉ា​ស់​(​ជាន់​ក្រោម​ដី​ពីរ​ជាន់ ជាន់​ផ្ទាល់​ដី ជាន់​ឡៅតឿ ជាន់​ទី​១ ដល់​ជាន់​ទី​៥២ និង​ដំបូល​ទ រ៉ា​ស់ គម្រប​ជណ្តើរ ) ព្រមទាំង​បាន​ផ្តិតមេដៃ​ស្ដាំ​ទទួលស្គាល់ និង​អនុវត្តតាម​ប្រការ​នីមួយៗ នៅក្នុង​កិច្ចសន្យាលក់ ទិញ​គម្រោង​សាងសង់​ខាងលើ​។​

​មេធាវី​បាន​បញ្ជាក់ថា ចំពោះ​គោលការណ៍ លក់ ទិញ គម្រោង​សាងសង់ ខាងលើនេះ គឺ​ដើម្បី​ផ្តល់ជូន កញ្ចប់​ថវិកា ក្នុងការ​ឧបត្ថម្ភ កំ​រ៉ៃ​ជើងសារ ដល់​ក្រុម ទីផ្សារ (Sale & Marketing Agent) ក្នុង​គោលដៅ​ស្វែងរក ក្រុមហ៊ុន ទទួល​ការសាងសង់​ឲ្យ​មក​ក្រុមហ៊ុន​យើងខ្ញុំ​តែប៉ុណ្ណោះ​។ ការប្រើប្រាស់​កិច្ចសន្យាលក់​ទិញ​នេះ គឺ​ដើម្បី​ផ្ដល់​ទំនុកចិត្ត​ទៅវិញទៅមក ក្នុងការ​រៀបចំ​ផែនការ​រដ្ឋបាល ឡើង​គម្រោង​សាងសង់ រវាង​ម្ចាស់​គម្រោង នឹង​ក្រុមហ៊ុន​ទទួល​សាងសង់​។ ឈ្មោះ​លឹម ហេង មិនបាន​ផ្តល់​ឯកសារ លក្ខន្តិកៈ​ក្រុមហ៊ុន​ទទួល​សាងសង់ សៀវភៅ​ស្នាដៃ​របស់​ក្រុមហ៊ុន ទទួល​សាងសង់ Letter of Interest (LOI) របស់​ក្រុមហ៊ុន​ទទួល​សាងសង់ ដោយ​ពុំ​មានការ​ណាត់ជួប​ជាក់លាក់​របស់​ក្រុមហ៊ុន​ទទួល​ការសាងសង់​ជាមួយ ក្រុមហ៊ុន​របស់​យើងខ្ញុំ ដើម្បី​ទទួលយក​ឯកសារ​រដ្ឋ​បាល​សាងសង់ ផ្នែក​បច្ចេកទេស​របស់ Architect ដើម្បី​ធ្វើការ​សាងសង់ ដែល​ក្រុមហ៊ុន​យើងខ្ញុំ​តែងតែ​ស្នើសុំ​ឲ្យ​មកជួប​តាមរយៈ ក្រុមហ៊ុន ប៊ី អិន សឹ​ប ផ្លា​យ ឯ​.​ក តំណាង ដោយ​ឈ្មោះ លឹម ហេង ដូចដែល​បានចែង ក្នុង​កិច្ចសន្យាលក់​ទិញ គម្រោង​សាងសង់ ក្នុង​គោលបំណង ដើម្បី ស្វែងរក​ដៃគូ​សហការ ក្រុមហ៊ុន​ទទួល ការសាងសង់ មក​ឲ្យ​ក្រុមហ៊ុន យើងខ្ញុំ​។ ហើយ​ក្រុមហ៊ុន​យើងខ្ញុំ តែងតែ​ចេញ លិខិតអញ្ជើញ​ឈ្មោះ លឹម ហេង ដែលជា​អ្នក​ចុះកិច្ចសន្យា​ទិញ លក់​គម្រោង​សាងសង់ ជា​ច្រើនសារ​ច្រើនលើក តែ​ពុំដែល​បានមក​ជួប​ជាមួយ​រដ្ឋបាល​ក្រុមហ៊ុន​យើងខ្ញុំ​ឡើយ​។ ដោយមាន​ចេតនា​ក្នុងការ​គេចវេស និង​មាន​ចេតនា​ប្រើប្រាស់​ថវិកា​ក្នុង​គោលបំណង បង្អាក់ ឲ្យ​ខកខាន​មិន​ឲ្យ​មាន ការសាងសង់​បាន ចំពោះ​គម្រោង​សាងសង់​របស់​ក្រុមហ៊ុន​យើងខ្ញុំ ។ លើសពីនេះ មាន​លេច​ឭ​ព័ត៌មាន​ពី​ខាងក្រៅ​ថា បុគ្គល ឈ្មោះ លឹម ហេង នេះ​ដើរ​ប្រមូល​ផ្តុំគ្នា ដើម្បី​បរិហារកេរ្តិ៍ និង​បង្កាច់​បង្អួច ពី​ឈ្មោះ ក្រុមហ៊ុន​យើងខ្ញុំ ទៅកាន់​សាធារណៈ ហើយ​លួច ស្វែងរក​វិធី​ឲ្យ ក្រុមហ៊ុន​ដ គូ​សហការ​របស់​ក្រុមហ៊ុន​យើង លើ​គម្រោង​សាងសង់​ខាងលើនេះ បាត់​ទំនុក​ចិត្តនឹង​ដក​ការសហការ​ពី​ក្រុមហ៊ុន យើងខ្ញុំ ដោយ​មិនដឹង​ខ្លួនឯង​ថា​ខុស​។ ជាហេតុ​ធ្វើ​ឲ្យ​មានការ​ប៉ះពាល់​យ៉ាងធ្ងន់ធ្ងរ​ដល់​ក្រុមហ៊ុន​របស់​យើងខ្ញុំ​ជាមួយនឹង​ដៃគូ​សហការ​ក្នុងការ​សាង សង់​អគារ​៥២​ជាន់ឡើង ដែល​ជះឥទ្ធិពល​ពី​ការយឺតយ៉ាវ ដោយ​ពុំមាន​លទ្ធផល​សម្រាប់​ក្រុមហ៊ុន​របស់​យើងខ្ញុំ​ដែល​បាន​សន្យាថា​នឹង​តម្រូវ​ឲ្យ​មានការ​សាងសង់​នៅ​ដើមឆ្នាំ​២០២១ នៅក្នុង​អំឡុង ខែមករា និង ខែកុម្ភៈ នេះ​ជូនទៅ​អ្នកលក់​-​ទិញ​គម្រោង​(Pre-Sale)​។ ដោយ​មើលឃើញ​ពី​ការ​ខូចប្រយោជន៍​ដ៏​សម្បើម នេះហើយ​ពុំមាន​ភាពច្បាស់​ការ និង​គ្មាន​ទំនួល​ខុសត្រូវ ពី​ក្រុមហ៊ុន ប៊ី អិន សឹ​ប ផ្លា​យ ឯក តំណាង​ដោយ​ឈ្មោះ លឹម ហេង ក្នុងការ​ខកខាន​មិន​ផ្ដល់​ឯកសារ​រដ្ឋបាល​គ្រប់គ្រាន់ ពី​ក្រុមហ៊ុន​សំណង់ ដែល​ទទួលបាន​ការសាងសង់​ជាក់លាក់​មក​ឲ្យ​ក្រុមហ៊ុន​យើងខ្ញុំ រហូតមកដល់​បច្ចុប្បន្ន​នេះ​
​ជាមួយគ្នានេះ លោក​មេធាវី កៅ ទី បាន​សំណូមពរ​ស្នើសុំ​ឲ្យ​ព្រះរាជអាជ្ញា​ចោទប្រកាន់​ទៅលើ​ឈ្មោះ លឹម ហេង ទៅតាម​ច្បាប់ ។ សុំ​ឲ្យ​ឈ្មោះ លឹម ហេង សង​ការខូចខាត​លើ​ទំហំ​ទឹកប្រាក់​ជាក់ស្តែង​។​

​ចំណែក​លោក លឹម ហេង បានដាក់​ពាក្យបណ្តឹង​ប្តឹង​លោក ឌួង សីហ​វរៈ​តារា​ពរ អគ្គនាយក​ក្រុមហ៊ុន ឡាយ អិន តារា និង លោក ផុន ដា​ណែ​ត និង លោកស្រី សួង ស៊ីណា ជា​តំណាង​ក្រុមហ៊ុន ពីបទ​ឆបោក និង​បាន​ចោទប្រកាន់ថា បាន​លក់​គម្រោង​សាងសង់​អគារ​ខុន​ដូរ​សហកម្មសិទ្ធិ ចំនួន​៣៦​ជាន់ និង គម្រោង​សាងសង់​អគារ​ខុន​ដូរ​សហកម្មសិទ្ធិ ចំនួន​៥៣​ជាន់ និង ដំបូល​ទែ​រ៉ា​ស់ (​ជាន់​ក្រោម​ដី​២​ជាន់ ជាន់​ផ្ទាល់​ដី ជាន់​ឡៅតឿ​) ជាន់​ទី​១ ដល់​ជាន់​ទី​៥២ និង ដំបូល​ទែ​រ៉ា​ស់​គម្រប​ជណ្តើរ ថា «​គម្រោង​ខ្យល់​» ក្នុង​ចេតនា ឆបោក​ប្រាក់​រាប់ម៉ឺន​ដុល្លារ ។​
​ជនរងគ្រោះ បាន​សំណូមពរ​ឱ្យ​តុលាការ និង សមត្ថកិច្ច មេត្តា​ចាត់វិធានការ​តាមផ្លូវ​ច្បាប់ ចំពោះ​ជនសង្ស័យ​ទាំង​៣​នាក់ ផង ព្រមទាំង​ស្នើ​ដល់​ខាង​លោក​អគ្គនាយក​អន្តោប្រវេសន៍ មេត្តា ហាមឃាត់​ការធ្វើដំណើរ​រ​បស់ជនស​ង្ស័​យ​ទាំង​៣​នាក់ ព្រោះ​បារម្ភ ថា ជនសង្ស័យ អាច​គេចខ្លួន​ទៅ​ក្រៅប្រទេស​៕