ដោយ​: មុនី​រ័ត្ន / ភ្នំពេញ​: ដោយមាន​បញ្ជាក់​ហេតុផល​ច្បាស់លាស់ និង​មាន​បញ្ហា​ខ្វះខាត​ផ្នែក​ជីវភាព​របស់​ស្ត្រី​ឈ្មោះ ហេង អ៊ុក និង​ប្តី ដែល​បើកបរ​ល្មើស​វិធាន​ការបិទ​ខ្ទប់ មិនត្រូវ​បានធ្វើការ​ផាកពិន័យ​នោះទេ​។

​អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខ​សីហា បាន​ឲ្យ​ដឹងថា កាលពី​ថ្ងៃទី​២០ ខែមេសា វេលា​ម៉ោង ៥​និង​៣០​នាទី​រសៀល កម្លាំង​គណៈបញ្ជាការ​ឯកភាព​ខណ្ឌដូនពេញ បានធ្វើ​ការឃាត់​មនុស្ស ២​នាក់ ពាក់ព័ន្ធ​លើ​ករណី​ល្មើស​វិធាន​ការបិទ​ខ្ទប់​រាជធានី​ភ្នំពេញ នៅត្រង់ចំណុច​ផ្លូវ​ព្រះសីហនុ កែង​ផ្លូវ​ព្រះមុនីវង្ស សង្កាត់​ចតុមុខ ខណ្ឌដូនពេញ ដោយ​ត្រូវបាន​កម្លាំងចម្រុះ នៃ​គណៈបញ្ជាការ​ឯកភាព​ខ​ណ្ឌ​ដូនពេញ ដឹកនាំ​ដោយ​លោក ម៉ុក ច័ន្ទ​ករុណា អភិបាលរងខណ្ឌ ដោយ​បានចេញ​ប័ណ្ណ​ផាកពិន័យ ដែលមាន​រយៈពេល​៣០​ថ្ងៃ ដោយ​ទុកពេល​ឲ្យ​អ្នក​ល្មើស​មក​បង់ប្រាក់​ពិន័យ រហូតដល់​រសៀល​ថ្ងៃទី​៤ ខែឧសភា ឆ្នាំ​២០២១​នេះ ក្រុមការងារ​ព័ត៌មាន និង​ប្រតិកម្ម​រហ័ស នៃ​ស្នងការដ្ឋាន​នគរបាល​រាជធានី​ភ្នំពេញ បានឃើញ​វីដេអូ​ខ្លី​ប​របស់​បងស្រី ដោយបាន​និយាយ​អំពី​មូលហេតុ ដែល​គាត់​ជិះ​ចេញ​ក្រៅ​ល្មើ​សនឹង​វិធានការ ដើម្បី​យក​ទឹកដោះគោ និង​ម្ហូប​ទៅ​ឲ្យ​កូនតូច​របស់គាត់ ហើយ​ថែមទាំង​បញ្ជាក់ប្រាប់​ពី​ទុក្ខលំបាក នៃ​ការខ្វះខាត​ក្នុងដំណាក់កាល​នេះ ស្រប​ពេលដែល​គាត់​ពីរ​នាក់​ប្តី​ប្រពន្ធ​ជាជាង​សំណង់​ផង​នោះ ទើប​សមត្ថកិច្ច​នៃ​អធិការដ្ឋាន​នគរបាល​ខណ្ឌដូនពេញ ធ្វើការ​ស្រាវជ្រាវ​រក​គាត់ និង​បាន​អញ្ជើញ​គាត់​មក​សាលាខណ្ឌ​ដូនពេញ​។

​អ្នកនាំពាក្យ​បន្តថា ដោយ​ឃើញ​ពី​ស្ថាន​ភាពលំបាក​ជាក់ស្តែង និង​ហេតុផល​ច្បាស់លាស់ លោក​អភិបាល​ខណ្ឌដូនពេញ បានសម្រេច​មិន​ធ្វើការ​ផាកពិន័យ​គាត់​នោះទេ ហើយ​ថែមទាំង​ផ្តល់​អំណោយ​មួយចំនួន​ជូន​គាត់ ដើម្បី​ដោះស្រាយ​ជីវភាព​ក្នុងដំណាក់កាល​នេះ​ផងដែរ​។​

​គាត់​ទាំង​២​នាក់​ប្តី​ប្រពន្ធ មានឈ្មោះ​ដូចខាងក្រោម :
១. ឈ្មោះ ធឿន ប៊ុនធឿន ភេទ​ប្រុស អាយុ ៣០​ឆ្នាំ មុខរបរ​ជាងសំណង់​
២. ឈ្មោះ ហេង អ៊ុក ភេទ​ស្រី អាយុ ២៩​ឆ្នាំ មុខរបរ​ជាងសំណង់
​អ្នក​ទាំងពីរ​ខាងលើ ស្នាក់នៅ​ការដ្ឋាន​សំណង់​ផ្លូវ ៥០​ម៉ែត្រ ខណ្ឌមានជ័យ ជិះ​ម៉ូតូ​មួយគ្រឿង​ម៉ាក C 125 ពាក់​ស្លាក​លេខ​ភ្នំពេញ 1FD-1073។​

​គួរ​បញ្ជាក់ថា គិត​ចាប់​ពីថ្ងៃ​អនុវត្ត​វិធាន​ការបិទ​ខ្ទប់​ក្នុងភូមិ​សាស្ត្រ រាជធានី​ភ្នំពេញ​ពីថ្ងៃ​ទី​១៥ មេសា មកដល់​ត្រឹម​ថ្ងៃទី​៤ ខែឧសភា ឆ្នាំ​២០២១ សមត្ថកិច្ច​បាន​ពិន័យ​អន្តរការណ៍​លើ​អ្នក​ល្មើស​វិធាន​ការបិទ​ខ្ទប់ ចំនួន​៣២១​នាក់​៕​