ភ្នំពេញៈ​​រាជរដ្ឋាភិបាល​កម្ពុជា​បានសម្រេច​បញ្ចប់ការបិទ​ខ្ទប់​ភូមិសាស្ត្រ​រាជធានីភ្នំពេញ និង​ក្រុង​តាខ្មៅ​នៃ​ខេត្តកណ្តាល​ក្តី​​ក៏​បញ្ហា​បម្រាម​គោចរ​មិនត្រូវ​បញ្ចប់​ទេ​ដោយនៅ​រក្សា​ពី​ម៉ោង​២០(៨​យប់​)​ដល់​ម៉ោង​៣ ដដែល​។​នេះ​បើ​យោងតាម​​សេចក្តីណែនាំ​ស្តីពី​ការពង្រឹង​ការអនុវត្ត​វិធានការ​ចាំបាច់​មួយចំនួន​ដើម្បី​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​-១៩ បន្ទាប់ពី​រាជរដ្ឋាភិបាល​បានសម្រេច​បញ្ចប់​ការបិទ​ខ្ទប់​ភូមិសាស្ត្រ​រាជធានី​ភ្នំពេញ​និង​ក្រុង​តាខ្មៅ​ខេត្តកណ្តាល នៅ​ថ្ងៃទី​៤​ខែឧសភា​នេះ​។​

​សេចក្តី​នៅ​ចំណុច​ទី​៩​បានបញ្ជាក់​ថា​៖”- គណៈ​អភិបាល​រាជធានី ខេត្ត​ត្រូវ​ពិនិត្យ​រៀបចំ​ដាក់ចេញ បម្រាម​គោចរ​ពី​ចន្លោះ​ម៉ោង ២០ (​ម្ភៃ​) ដល់​ម៉ោង ៣ (​បី​) សម្រាប់​ភូមិសាស្ត្រ​ទាំងមូល​ឬ​ផ្នែក​ណាមួយ​ដែល ស្ថិតក្រោម​សមត្ថកិច្ច​របស់ខ្លួន ប៉ុន្តែ ត្រូវ​យកចិត្តទុកដាក់​ធានា​ឱ្យបាន​នូវ​ការធ្វើដំណើរ​និង​ការធ្វើសកម្មភាព ការងារ​ចាំបាច់​មួយចំនួន ជាអាទិ៍ ការធ្វើដំណើរ​របស់​ម​ន្ត្រី​រាជការ​និង​កងកម្លាំងប្រដាប់អាវុធ​គ្រប់​ប្រភេទ ការដឹកជញ្ជូន​ទំនិញ និង​គ្រឿង​ឧបភោគបរិភោគ , ការធ្វើដំណើរ​ដោយ​មូលហេតុ​សុខភាព​បន្ទាន់​, , ការដឹកជញ្ជូន​ទំនិញ​យុទ្ធសាស្ត្រ​របស់​រដ្ឋ​សេវា​សង្គ្រោះបន្ទាន់ និង​សេវា​សុខាភិបាល ទាំង​រដ្ឋ និង​ឯកជន​, ឱសថស្ថាន​សេវា​ពន្លត់​អគ្គិភ័យ​, សេវា​ផ្គត់ផ្គង់​អគ្គិសនី និង​ទឹកស្អាត​,​សេវា​ប្រតិបត្តិការ​ផ្នែក​ទូរគមនាគមន៍ , ទីតាំង​ផលិត​គ្រឿងឧបភោគ​បរិភោគ និង​ទំនិញ​យុទ្ធសាស្ត្រ​ដែល​ប​មើ ឱ្យ​ការប្រយុទ្ធ​និង​ទប់ស្កាត់​ជំងឺ​កូ​វីដ​-១៩, ទីតាំង​ផលិត​និង​ផ្គត់ផ្គង់​ឱសថ អាល់កុល អុកស៊ីហ្សែន និង​សម្ភារៈ បរិក្ខា​វេជ្ជសាស្ត្រ​ផ្សេងទៀត​, ស្ថានីយប្រេងឥន្ធនៈ​- ហ្គាស​, សេវា​សណ្ឋាគារ និង​ផ្ទះសំណាក់ , ការបំពេញ កាតព្វកិច្ច​ដែល​បម្រើ​ផលប្រយោជន៍​សាធារណៈ និង​ករណី​ចាំបាច់ ឬ​សេវាសាធារណៈ​ចាំបាច់​ដទៃទៀត​៕