ដោយ​: ម៉េង​ឆៃ / ភ្នំពេញ​: ចាប់តាំងពី​ព្រឹក​ថ្ងៃទី​៥​ឧសភា ដែលជា​ថ្ងៃ​ចុងក្រោយ​នៃ​ការអនុវត្ត​វិធានការ ហាមឃាត់​ការធ្វើដំណើរ​ឆ្លងកាត់​ពី​រាជធានី​ភ្នំពេញ ទៅកាន់​បណ្ដា​ខេត្ត និង​ពី​តាម​បណ្តា​ខេត្ត ចូលមក​ភ្នំពេញ បែរ​ជាមាន​អ្នកដំណើរ​ជាច្រើន​ខុសធម្មតា បាន​ព្យាយាម​ធ្វើដំណើរ​ចេញពី​រាជធានី​ភ្នំពេញ ច្រើនជាង​សព្វមួយដង​។

​កំណើន​ប្រជាពលរដ្ឋ ធ្វើដំណើរ​ចេញពី​ភ្នំពេញ ទៅតាម​បណ្តា​ខេត្ត មាន​ទាំង​ឡាន​និង​មាន​ទាំង​អ្នកធ្វើដំណើរ​តាម ម៉ូតូ​ផង បាន​កកកុញ​នៅ​ព្រំប្រទល់​រាជធានី​ភ្នំពេញ និង​ខេត្តកណ្តាល តាម​ស្ទើរតែ​ផ្លូវជាតិ​សំខាន់ៗ កាលពី​ព្រឹក រហូទដល់​ព្រលប់​ថ្ងៃទី​៥ ខែឧសភា​។​

​កងកម្លាំង​នគរបាល ប្រចាំការ​នៅ​ច្រកចេញចូល​តាមផ្លូវ​ជាតិ​សំខាន់ៗ បាន​បញ្ជាក់ថា មាន​ប្រជាពលរដ្ឋ​មួយចំនួន ហាក់ដូចជា​យល់ច្រឡំ​ថា នៅ​ថ្ងៃទី​៥​ឧសភា​នេះ បញ្ចប់​ការបិទ​ខ្ទប់​រាជធានី​ភ្នំពេញ​ដែល​អាច​បើក​ឲ្យ​ចរាចរណ៍ ចេញចូល​ក្រុង​ឡើងវិញ​។ ប៉ុន្តែ​តាមពិត គឺ​ទាល់តែ​ដល់​ម៉ោង ១២​កណ្តាល​អា​ធ្រា​ត្រ ឈានចូល​ថ្ងៃទី​៦​ឧសភា ពោលគឺ​នៅ​យប់​ថ្ងៃទី​៥​ឧសភា​នេះ​ទើប​នគរបាល​ដក​ប៉ា​រ៉ា​ស​អនុញ្ញាត​ឲ្យ​ឆ្លងកាត់​ធ្វើដំណើរ​ចេញចូល​ភូមិសាស្ត្រ​ភ្នំពេញ តាម​សេចក្តីសម្រេច​របស់​រាជ​រដ្ឋាភិបាល​។​

​យ៉ាងណាក៏ដោយ មន្ត្រី​កងកម្លាំង ដែល​ប្រចាំ​ការអនុវត្ត​វិធាន​ការបិទ​ខ្ទប់ នៅតាម​បណ្តា​គោលដៅ តាមផ្លូវ​ជាតិ​នានា ដែលជា​ច្រកចេញចូល​រាជធានី​ភ្នំពេញ នៅតែ​បន្ត​រឹតបន្តឹង​ការធ្វើដំណើរ​ចេញចូល កាលពី​ថ្ងៃទី​៥​ឧសភា ហើយ​ប្រជាពលរដ្ឋ អ្នកធ្វើដំណើរ ដែល​មិនមាន​លិខិតស្នាម​អនុញ្ញាត មិនត្រូវ​បានអនុញ្ញាត​ឲ្យ​ចេញ ឬ​ចូល​រាជធានី​ភ្នំពេញ​ឡើយ​។​

​ក៏ប៉ុន្តែ​ចាប់ពី​ម៉ោង​សូន្យ ថ្ងៃទី​៦ ខែឧសភា​នេះ គឺ​ព្រំប្រទល់​រាជធានី​ភ្នំពេញ និង​ខេត្តកណ្តាល គ្រប់​ផ្លូវ​ទាំងអស់ លែង​បិទ​ទៀតហើយ​។ ដូច្នេះ​ប្រជាពលរដ្ឋ​គ្រប់រូប មាន​សិទ្ធិ​ធ្វើដំណើរ​បាន​ដោយ​សេរី​។​

​តាមមើល​ចរន្ត​នៅ​ថ្ងៃទី​៥​ឧសភា​នេះ គឺ​អ្នករស់នៅ​ភ្នំពេញ នឹង​ចេញទៅ​ខេត្ត ច្រើនជាង​ខេត្ត ចូលមក​ភ្នំពេញ​។ មូលហេតុ ដោយសារតែ​អ្នក​ភ្នំពេញ កាលពីពេល​ចូលឆ្នាំ មិនបាន​ទៅ​ស្រុក ហើយ​ម្យ៉ាងទៀត មិនបាន​ធ្វើដំណើរ​ទៅណា​ហើយ បែរជា​ត្រូវ​បិទ​ខ្ទប់ ជាប់​នៅតែ​ក្នុងផ្ទះ ហើយ​បើ​ធ្វើដំណើរ​បាន ក៏បាន​ជិតៗ​ផ្ទះ អស់​ពេល ៣​សប្តាហ៍​មកហើយ​។ នេះ​ចំពោះតែ​អ្នក​នៅ​តំបន់​លឿង តែបើ​នៅ​តំបន់​លឿងទុំ និង​តំបន់​ក្រហម​វិញ កាន់តែ​យ៉ាប់​ជាង​អ្នករស់នៅ​តំបន់​លឿង​ជាយៗ​ក្រុង​ទៅទៀត​។ ដូច្នេះហើយ នៅពេល​បើក​ក្រុង​ឡើង​នេះ អាច​នឹងមាន​អ្នក​ចេញទៅ​ភ្នំពេញ ទៅ​ស្រុក​ច្រើន​គ្នា មើលទៅ​។​

​ចំណែក​អ្នក​ខេត្ត ចូល​ក្រុង​វិញ ប្រហែល​ជាមាន​តិចតួច និង​តែ​លើ​អ្នក​ដែល​ចាំបាច់​បំផុត​ប៉ុណ្ណោះ ព្រោះថា ពេលនេះ ភ្នំពេញ ក្លាយជា​តំបន់​ដែលមាន​ហានិភ័យ​ខ្ពស់​នៃ​ការឆ្លង​រាលដាល​ជំងឺ​កូ​វីដ​១៩ មិនទាន់​ថមថយ​នៅឡើយ​ទេ​។ មួយថ្ងៃៗ ចូល​ខ្ទង់​រាប់រយ​នាក់ ឆ្លង​កូ​វីដ នៅឡើយ​។​

​ប៉ុន្តែ​ក្នុង​កាលៈទេសៈ​ទាំង​អ្នក​នៅ​ក្រុង និង​ទាំង​អ្នក​នៅ​ខេត្ត ក៏​ពុំទាន់​គួរ​ចល័ត ធ្វើដំណើរ​ចេញ ឬក៏​ចូល​ភ្នំពេញ​នោះទេ​។ មូលហេតុ កូ​វីដ​មិនទាន់​បាត់​ឆ្លង​នៅឡើយ​ទេ​។ ម្យ៉ាង​តាម​បណ្តា​ខេត្ត​នានា ក៏បាន​ចាត់វិធានការ​តឹងរឹង រហូតដល់​មាន​ខេត្ត​ខ្លះ តម្រូវ​ឲ្យ​យក​អ្នក​ចំណូល​ថ្មី ទៅធ្វើ​តេស្ត និង​ធ្វើ​ច​ត្តា​ឡី​ស័ក ១៤​ថ្ងៃ ដើម្បី​តាមដាន​សុខភាព​ថែមទៀត​។​

រូបថតៈនាព្រឹកថ្ងៃពុធ ទី០៥ ខែឧសភានេះលោក ឃួង ស្រេង អភិបាលរាជធានីភ្នំពេញ និងជាអនុប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងរាជធានីភ្នំពេញ បានអញ្ជើញចុះពិនិត្យទីតាំងចាក់វ៉ាក់សាំងការពារជំងឺកូវីដ១៩ ជូនបងប្អូនកម្មករ កម្មការិនី និងបងប្អូនប្រជាពលរដ្ឋទូទៅដែលរស់នៅក្នុងតំបន់ក្រហម ក្នុងមូលដ្ឋានខណ្ឌមានជ័យ ខណ្ឌពោធិ៍សែនជ័យ ខណ្ឌដង្កោ និងខណ្ឌកំបូល រាជធានីភំ្នពេញ។

​យ៉ាងណាក៏ដោយ បើ​ថា នៅតែ​ត្រូវ​ទៅ​ខេត្ត ចេញពី​ភ្នំពេញ ឬក៏​ត្រូវតែ​ចូលមក​ភ្នំពេញ ក៏​សូម កុំ​ភ្លេច​បណ្តាំ​របស់​អ្នកជំនាញ​សុខាភិបាល​យើង ៣ ចំណុច​។ ទី​១-​គ្រប់គ្នា​បន្ត​អនុត្ត​ន៍​គោលការណ៍​ជា​ចាំបាច់​បំផុត «៣​កុំ ៣​ការពារ ចាក់​វ៉ាក់សាំង និង​កុំ​ធ្វើ​ចរាចរណ៍ ប្រសិនបើ​មិនចាំបាច់​»​។ ទី​២- ទីតាំង ដែល​ត្រូវ​ប្រមូលផ្ដុំ​មនុស្ស ដូចជា ហាង​លក់ទំនិញ ទីផ្សារ ភោជនីយដ្ឋាន អាហា​រដ្ឋា​ន ឬ​កន្លែង​លក់ដូរ​របស់របរ​ប្រចាំថ្ងៃ ជាដើម ត្រូវមាន​អ្នកត្រួតពិនិត្យ បាញ់​អាល់កុល វាស់​កំដៅ និង​ត្រូវ​រៀបចំ​ឲ្យ​អតិថិជន​ខ្លួន​រក្សា​គម្លាត​សុវត្ថិភាព យ៉ាងតិច ១​ម៉ែត្រ​កន្លះ​ពីគ្នា​។ ទី​៣-​បុគ្គល​ម្នាក់ៗ សូមកុំ​ភ្លេចខ្លួន ត្រូវ​ចេះ​សម្លឹងមើល​កន្លែង​ណា ឆ្លង​ខ្លាំង ឬ​មិនមាន​ឆ្លង ដោយ​ចូលរួម​សហការ​អនុវត្ត​ន៍​វិធានការ​សុវត្ថិភាព ជៀសវាង​ចេញទៅ​កន្លែង​បិទ​ខ្ទប់​។

​ចូរ​កុំភ្លេចថា យើង​ម្នាក់ៗ មិនដឹង​ជាមាន​កើត​កូ​វីដ ឬ​អត់​ឡើយ​។ ក្នុងនោះ ម្នាក់ៗ សុទ្ធតែ​គិត​ខ្លួនឯង​ថា មាន​សុខ​ភាពល្អ មិនកើត​ជំងឺឆ្លង​កូ​វីដ​នេះ​ទេ​។ ដូច្នេះ​ក៏​អាច​ចេញទៅ​ស្រុកកំណើត ឬក៏​ជួបជុំ​បងប្អូន​សាច់​ញា​ត្តិ​។ ប៉ុន្តែ​បើសិនជា​អ្នក​ទៅ​ពី​ភ្នំពេញ ទៅលេង​ស្រុក លេង​ម្តាយ​ឪពុក តា​យាយ​នៅ​ស្រុក ហើយ​ថ្លោះធ្លោយ បែរជា​ខ្លួនឯង​នេះ ផ្ទុក​ជំងឺ​កូ​វីដ​១៩ ដោយ​មិនដឹង​ខ្លួន នោះ​គឺជា​ការ​ចម្លងជំងឺ​ដល់​អ្នកផ្ទះ ដល់​សាច់​ញា​ត្តិ ពិសេស​ឪពុកម្តាយ តា​យាយ ដែល​ចាស់ៗ ហើយ​មិនដឹង​អ្វី​សោះ​។ ករណីនេះ មាន​រួចហើយ អ្នក​លបលួច​ទៅលេង​ស្រុក ក្នុងអំឡុងពេល​បិទ​ខ្ទប់​រាជធានី​ភ្នំពេញ ហើយ​បាន​ឆ្លង​ជំងឺ​កូ​វីដ​១៩ ដោយ​មិនដឹង​ខ្លួន​។​

​បើសិនជា​ដូច្នេះ​មែន ករណី​ចម្លង​នេះ គឺជា​វិប្បដិសារី​ខ្លួនឯង​មួយ ព្រោះ​បាន​ចម្លងជំងឺ​ដល់​សាច់​ញា​ត្តិ​នៅ​ស្រុក​ហើយ ហើយ​បើ​ប៉ះ​លើ​មនុស្ស​ចាស់ ដែលមាន​ជំងឺ​ប្រចាំកាយ​ស្រាប់​ទៀត នោះ​ហានិភ័យ​ខ្ពស់ ក្នុងការ​បាត់បង់​ជីវិត ថែម​ទៀតផង​។

​ដូច្នេះ​អំឡុងពេល​បើក​ក្រុង​ពេលនេះ គួរ​ណាស់​តែ​រង់ចាំ​ឲ្យ​ស្ងប់​កូ​វីដ​បន្តិចទៀត​សិន ចាំ​ចេញ​ទៅលេង​ស្រុក ឬ​ធ្វើដំណើរ​ទៅ​ខេត្ត ព្រោះ​យើង​មើលមិនឃើញ​ជំងឺ​កូ​វីដ ដែល​ឥត​ស្រមោល​នេះ​ទេ​។ រីឯ​អ្នក​ខេត្ត​វិញ ក៏​គួរតែ​បង្អង់​បន្តិចទៀត​សិន​ដែរ ចាំ​ចូល​ភ្នំពេញ​។ យើង​អាច​ស៊ូទ្រាំ​បាន ៣-៤​អាទិត្យ ដោយ​យកឈ្នះ​កូ​វីដ​ដោយ​ជោគជ័យ​មកហើយ ចុះ​ហេតុអ្វី ដែល​យើង​មិនអាច​ទ្រាំ​បន្តិចទៀត​បាន​នោះ​?៕​សរន​