ដោយៈ មុនី​រ័ត្ន​/​ភ្នំពេញ : នៅក្នុង​អំឡុងពេល​នៃ​ការបិទ​ខ្ទប់​ភូមិសាស្ត្រ​រាជធានី​ភ្នំពេញ​ពីថ្ងៃ​ទី​១៥ ខែមេសា ដល់​ថ្ងៃទី​៥ ខែឧសភា ឆ្នាំ​២០២១ សមត្ថកិច្ច​បាន​ឃាត់ខ្លួន​មនុស្ស​ចំនួន​ជិត ៥០០​នាក់​។​ក្នុង​នោះបាន​បញ្ជូន ទៅ​តុលាការ ធ្វើការ​អប់រំ​ណែនាំ ធ្វើការ​ផាកពិន័យ​អន្តរការណ៍​។​ក្នុងចំណោម​មនុស្ស​នោះ​ក៏មាន​មន្ត្រីនគរបាល ផ្កាយ​ពីរ​ម្នាក់ មន្ត្រី​យោធា រួមទាំង​ប្រជាពលរដ្ឋ​ផងដែរ​។

រូបថតៈអ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក​សាន សុខ​សីហា

​អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក​សាន សុខ​សីហា​មានប្រសាសន៍ប្រាប់​រស្មី​កម្ពុជា នៅ​ព្រលប់​ថ្ងៃទី​៥ ខែឧសភា​នេះ​ថា នៅក្នុង​ដំណាក់កាល នៃ​ការអនុវត្ត​បម្រាម​គោល​ចរ​ក៏ដូចជា​ការបិទ​ខ្ទប់ រាជធានី​ភ្នំពេញ ចាប់ពី​ថ្ងៃទី​១៥ មេសា មកដល់​ត្រឹម​រសៀល​ថ្ងៃទី​៥ ខែឧសភា សមត្ថកិច្ច​បាន​ឃាត់ខ្លួន​មនុស្ស​ចំនួន ៤៧៨​នាក់ ដោយ​ក្នុងនោះ​តុលាការ​បានចេញ​ដីកាឃុំខ្លួន​ដាក់ពន្ធនាគារ​ចំនួន ១០​នាក់ , បញ្ជូនទៅ​តុលាការ​ចំនួន ៣​នាក់ បានធ្វើ​ការអប់រំ​ណែនាំ​ចំនួន ៨៣​នាក់ , បញ្ជូន​ទៅធ្វើ​ច​ត្តា​ឡី​ស័ក​ចំនួន ៣១​នាក់ និង​ពិន័យ​អន្តរការណ៍​ចំនួន ៣៤៩​នាក់​។​

​លោក​សាន សុខ​សីហា បាន​បន្តថា ចំពោះ​បុរស​ម្នាក់​ដែល​លក់ដូរ​នៅ​ផ្សារ​អូរឫស្សី​លួច​គេចវេស​ពី​ការធ្វើ​ច​ត្តា​ឡី​ស័ក ត្រូវបាន​តុលាការ​ចេញ​ដីកាឃុំខ្លួន​បណ្តោះអាសន្ន​ហើយ​នៅ​រសៀល​ថ្ងៃទី​៤ ខែឧសភា​។​

​គួរ​បញ្ជាក់ថា នៅក្នុង​ចំណោម​មនុស្ស​ទាំងនេះ គឺមាន​មន្ត្រីនគរបាល​ផ្កាយ​ពីរ ឈ្មោះ អ៊ុង ចាន់​ធួ​ក និង​បក្ខពួក​ពីរ ត្រូវបាន​សមត្ថកិច្ច​ឃាត់ខ្លួន​កាលពី​ថ្ងៃទី​១៦ ខែមេសា​នៅក្នុង​ទឹកដី​ខណ្ឌមានជ័យ​ពាក់ព័ន្ធ​ករណី​នាំ​កម្មករ ជួបជុំគ្នា​ផឹកស៊ី​ចាក់ធុងបាស់ ហើយ​ត្រូវបាន​តុលា​ការចេញ​ដីកាឃុំខ្លួន​ដាក់ពន្ធនាគារ​។ ឈ្មោះ សៀង រង្ស៊ី ក្លែង​ជា​នគរបាល​ផ្កាយ​ពីរ និង​ជិះ​រថយន្ត​ទំនើប​ពាក់​ស្លាក​លេខ នគរបាល ត្រូវបាន​ចាប់ខ្លួន​កាលពី​ថ្ងៃទី​១៧ ខែមេសា នៅ​ខណ្ឌ​ជ្រោយចង្វារ និង​តុលា​ការចេញ​ដីកា​ឲ្យ​ឃុំខ្លួន ពាក់ព័ន្ធ​ករណី រា​រារាំង​ការអនុវត្ត​វិធានការ​រដ្ឋបាល និង​ប្រើប្រាស់​ដោយ​គ្មាន​សិទ្ធិ​នូវ​យានយន្ត​សម្គាល់​ប្រើប្រាស់​ដោយ​នគរបាល​។ ឈ្មោះ ខៀវ ចាន់​សុ​ភ័​ត្ត្រា ជា​មន្ត្រី​យោធា​នៅ​សាកលវិទ្យាល័យ​ការពារជាតិ ត្រូវបាន​ឃាត់ខ្លួន​កាលពី​ថ្ងៃទី​២០ ខែមេសា ត្រូវបាន​តុលាការ​ចេញ​ដីកាឃុំខ្លួន ពាក់ព័ន្ធ​ករណី​វាយ​សមត្ថកិច្ច និង​រារាំង​វិធាន​ការបិទ​ខ្ទប់​។​

(រូបថតឯកសារ)

​សូមជម្រាបថា កាលពី​ថ្ងៃទី​១៤ ខែមេសា រាជរដ្ឋាភិបាល​បានចេញ​សេចក្តីសម្រេច​ស្តីពី​ការបិទ​ខ្ទប់​ភូមិសាស្ត្រ រាជធានី​ភ្នំពេញ និង​ក្រុង​តាខ្មៅ​នៃ​ខេត្តកណ្តាល ដើម្បី​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​-១៩ ។ ការបិទ​ខ្ទប់​ភូមិសាស្ត្រ​រាជធានី​ភ្នំពេញ និង​ក្រុង​តាខ្មៅ​នៃ​ខេត្តកណ្តាល ជា​បណ្ដោះអាសន្ន​សម្រាប់ រយៈពេល ១៤​ថ្ងៃ គិត​ចាប់ពី​វេលា​ម៉ោង​សូន្យ​នា​ថ្ងៃទី​១៥ ខែមេសា រហូតដល់​ថ្ងៃទី​២៨ ខែមេសា និង​បាន​បន្ត​ពីថ្ងៃ​ទី​២៨ ខែមេសា រហូតដល់​ថ្ងៃទី​៥ ខែឧសភា ដោយបាន​ធ្វើការ​បែងចែក​ភូមិសាស្ត្រ​បិទ​ខ្ទប់​ជា ៣ ។​ក្នុងនោះ​រួមមាន “​តំបន់​ក្រហម​” សម្រាប់​ភូមិសាស្ត្រ​ដែល មានការ​ឆ្លង​រាលដាល​ធ្ងន់ធ្ងរ​នៃ​ជំងឺ​កូ​វីដ​-១៩ ក្នុង​សហគមន៍ “​តំបន់​លឿងទុំ​” សម្រាប់​ភូមិសាស្ត្រ​ដែលមាន​ការឆ្លង​រាលដាល​កម្រិត​មធ្យម​នៃ​ជំងឺ​កូ​វីដ​-១៩ ក្នុង​សហគមន៍ និង “​តំបន់​លឿង សម្រាប់​ភូមិសាស្ត្រ​ដែលមាន​ការឆ្លង​រាលដាល​កម្រិត​ស្រាល​នៃ​ជំងឺ​កូ​វីដ​-១៩ ក្នុង​សហគមន៍​” និង​ក្នុង​គោលបំណង​ធានា​ដល់​ប្រសិទ្ធភាព​នៃ​ការគ្រប់គ្រង​ការឆ្លង​រាលដាល​នៃ​ជំងឺ​កូ​វីដ​-១៩ នៅក្នុង​ភូមិសាស្ត្រ​រាជធានី​ភ្នំពេញ និង​ក្រុង​តាខ្មៅ​នៃ​ខេត្តកណ្តាល និង​ទប់ស្កាត់​ជំងឺ​នេះ​មិនឱ្យ​ឆ្លង​រាលដាល​ទៅ​តំបន់​ផ្សេង​ទៀតហើយ​នៅ​ថ្ងៃទី​៤ ខែឧសភា ឆ្នាំ​២០២១ រាជរដ្ឋាភិបាល​បានចេញ​សេចក្តីណែនាំ​សម្រេច​បញ្ចប់​ការបិទ​ខ្ទប់​ភូមិសាស្ត្រ​រាជធានី​ភ្នំពេញ និង​ក្រុង​តាខ្មៅ​នៃ​ខេត្តកណ្តាល ចាប់ពី​ថ្ងៃទី​៦ ខែឧសភា ឆ្នាំ​២០២១ តទៅ ដោយ​ប្រគល់​សមត្ថកិច្ច​ជូន​អភិបាល​នៃ​គណៈ​អភិបាល​រាជធានី​ភ្នំពេញ និង​អភិបាល​នៃ​គណៈ​អភិបាលខេត្ត​កណ្តាល​ក្នុងការ​ដាក់ចេញ​វិធានការ​សមស្រប​និង​ចាំបាច់​នានា ដើម្បី​ឆ្លើយតបបាន​ទាន់ពេលវេលា​ទៅនឹង​ស្ថានភាព​វិវត្តន៍ ជាក់ស្តែង​នៃ​ការឆ្លង​រាលដាល​នៃ​ជំងឺ​កូ​វីដ​-១៩ នៅក្នុង​ភូមិសាស្ត្រ​ស្ថិតក្រោម​សមត្ថកិច្ច​របស់ខ្លួន​៕​សរន​