ដោយ​៖ ដេប៉ូ / ភ្នំពេញ​៖ អង្គការ UNICEF Cambodia បានឱ្យដឹងថា​៖ ប្រទេស​កម្ពុជា ស្ថិតក្នុង​ចំណោម​ប្រទេស ចំនួន ១៧ ដំបូង ក្នុង​ពិភពលោក ដែល​ផ្ដល់​អាទិភាព ដល់​ការចាក់​វ៉ាក់សាំង កូ​វីដ​១៩ ដល់​គ្រូបង្រៀន​។​

​បើតាម​ទំព័រ​ហ្វេ​ស​ប៊ុ​ករ​បស់ អង្គការ UNICEF Cambodia ឱ្យដឹងថា ការចាក់​វ៉ាក់សាំង ដល់​គ្រូបង្រៀន ទូទាំង​ផ្ទៃ​ប្រទេស គឺជា​ជំហាន​មួយទៀត ក្នុងការ​ធានាថា កុមារ​អាច​ត្រឡប់ ទៅ​សាលារៀន​វិញ ដោយ​សុវត្ថិភាព​។​

​គួរ​បញ្ជាក់ថា កាលពីពេល​ថ្មីៗ មកនេះ ក្រសួង​អប់រំ យុវជន និង​កីឡា បាន​បិទ​បញ្ចប់​យុទ្ធនាការ ចាក់​វ៉ាក់សាំង​បង្ការ​ជំងឺ​កូ​វីដ​-១៩ ជូន​បុគ្គលិក​អប់រំ បុគ្គលិក​កិច្ចសន្យា និង​បុគ្គលិក​អង្គការ​ដៃគូ​អភិវឌ្ឍន៍ ក្នុង​វិស័យ​អប់រំ ក្នុង​ជំហាន​ទី​១​។​

​បើតាម​ក្រសួង​អប់រំ បានឱ្យដឹង​ដែរ​ថា គិតដល់​ត្រឹម​ថ្ងៃទី​០៣ ខែឧសភា ឆ្នាំ​២០២១ ជា​លទ្ធផល នៅ​ទូទាំងប្រទេស យុទ្ធនាការ​ជំហាន​ទី​១ សម្រេចបាន​ការចាក់​វ៉ាក់សាំង ទាំង ២ ដូ​ស ជូន​បុគ្គលិក​អប់រំ បុគ្គលិក​កិច្ចសន្យា ដែល​បម្រើការ​ក្នុង​អង្គភាព​អប់រំ នៅ​ថ្នាក់ជាតិ ថ្នាក់ក្រោម​ជាតិ គ្រឹះស្ថានសិក្សា សាធារណៈ និង​ឯកជន ព្រមទាំង​បុគ្គលិក នៃ​អង្គការ​ដៃគូ​អភិវឌ្ឍន៍ ក្នុង​វិស័យ​អប់រំ សរុប​ចំនួន ១១៦.៥៦៣ នាក់ ត្រូវជា ៧៤ ភាគរយ នៃ​ចំនួន​សរុប ១៥៨.០០០ នាក់​។​

​សម្រាប់​នៅ​រាជធានី​ភ្នំពេញ បុគ្គលិក​អប់រំ បាន​ចាក់​វ៉ាក់សាំង ទាំង ២ ដូ​ស ចំនួន ២៤.៨០០ នាក់ និង​ក្រុមការងារ បាន​ជួយ​ចាក់​វ៉ាក់សាំង ដូ​ស​ទី​២ ជូន​បុគ្គលិក​ស្ថាប័ន​ផ្សេងៗ ប្រជាជន និង​ព្រះសង្ឃ បាន ចំនួន ៤៥.៤០០ នាក់​៕/V​