ដោយៈ​មុនី​រ័ត្ន​/​ភ្នំពេញ : គិត​ចាប់ពី​ថ្ងៃទី​២០ ខែកុម្ភៈ មកដល់​ថ្ងៃទី​៥ ខែឧសភា ឆ្នាំ​២០២១​និង​ការបិទ​ខ្ទប់ ភូមិសាស្ត្រ​រាជធានី​ភ្នំពេញ និង​ក្រុង​តាខ្មៅ នៃ​ខេត្តកណ្តាល​សមត្ថកិច្ច​បា​ន​ឃាត់ខ្លួន​មនុស្ស​ជាង ២​ពាន់​នាក់ ដែល​ល្មើ​សនឹង​បម្រាម​។​ក្នុង​នោះបាន​បញ្ជូនទៅ​តុលាការ ផាកពិន័យ​អន្តរការណ៍ និង​ធ្វើ​កិច្ចសន្យា អប់រំ​ណែនាំ​។​

​អ្នកនាំពាក្យ​អគ្គស្នងការដ្ឋាន​នគរ​បាល​ជាតិ​លោក​ឧ​ត្ត​ម​សេនីយ៍​ឯក ឆាយ គឹម​ខឿន បាន​ប្រាប់​អ្នកកាសែត នៅ​រសៀល​ថ្ងៃទី​៦​ខែឧសភា​នេះ​ថា លទ្ធផល​នៃ​ការបង្ក្រាប​សកម្មភាព​ល្មើស​បម្រាម​របស់​រាជរ​ដ្ឋា​ភិ​បាល គិត​ចាប់ពី​ថ្ងៃទី​២០ ខែកុម្ភៈ មកដល់​ត្រឹម​ថ្ងៃទី​៥ ខែឧសភា សមត្ថកិច្ច​បាន​ឃាត់ខ្លួន​មនុស្ស​បញ្ជូនទៅ​តុលាការ​ចំនួន ១២៧​ករណី ស្មើ​មនុស្ស ៧៥៥​នាក់ (​ស្រី ១៤៦​នាក់​) , បង់ពិន័យ​អន្តរការណ៍​ចំនួន ៥៣​ករណី ស្មើ​មនុស្ស ១៩២​នាក់ (​ស្រី ២៦​នាក់​) និង​ធ្វើ​កិច្ចសន្យា អប់រំ បាន​ចំនួន ៤៨៤​ករណី ស្មើ​មនុស្ស​ចំនួន ១៤២២​នាក់ (​ស្រី ៣៦៩​នាក់​)​។​

​រីឯ​អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក​សាន សុខ​សីហា បាន​បញ្ជាក់ថា​ក្នុងដំណាក់កាល​នៃ​ការអនុវត្ត​បម្រាម​គោចរ ក៏ដូចជា​ការបិទ​ខ្ទប់​ភូមិសាស្ត្រ​រាជធានី​ភ្នំពេញ ចាប់ពី​ថ្ងៃទី​១៥ មេសា មកដល់​ត្រឹម​ថ្ងៃទី​០៥ ខែឧសភា សមត្ថកិច្ច​បាន​ឃាត់ខ្លួន​មនុស្ស​ចំនួន ៤៧៨​នាក់ ដោយ​ក្នុងនោះ​តុលាការ​បានចេញ​ដីកាឃុំខ្លួន​ដាក់ពន្ធនាគារ​ចំនួន ១០​នាក់ , បញ្ជូនទៅ​តុលាការ​ចំនួន ៣​នាក់ ,​ធ្វើការ​អប់រំ​ណែនាំ​ចំនួន ៨៣​នាក់ , បញ្ជូន​ទៅធ្វើ​ច​ត្តា​ឡី​ស័ក​ចំនួន ៣១​នាក់ និង​ពិន័យ​អន្តរការណ៍​ចំនួន ៣៤៩​នាក់​៕សរន