ដោយ​: សុខុម / ស្ទឹងត្រែង​: ប្រជាពលរដ្ឋ រស់នៅ​ជាប់​នឹង​ព្រៃ​ឡង់​ខេត្តស្ទឹងត្រែង រិះគន់ថា មន្ត្រី​បរិស្ថាន ចុះ​អនុវត្ត​ច្បាប់ ប្រើ​សិទ្ធិអំណាច សម្លុត​គំរាម​បាញ់ និង​ចាប់​ដាក់គុក មកលើ​ពួកគាត់ ធ្វើអោយមាន ការភ័យខ្លាច​។ វិធី​ដោះស្រាយ​បែបនេះ បានកើត​ឡើង រាប់មិនអស់ ធ្វើឱ្យ​ប្រជាពលរដ្ឋ មិន​សប្បាយចិត្ត​។​

​លោក គង់ ថា ប្រជាពលរដ្ឋ នៅ​ភូមិ​អូរ​ឡង់ ស្រុក​សៀម​បូក ខេត្តស្ទឹងត្រែង បាន​និយាយ ថា លោក​មិន​ពេញចិត្ត ចំពោះ​ទង្វើ របស់​មន្ត្រី​ការពារ​ព្រៃ​ឡង់ នោះឡើយ ដោយសារ តែ​ខាង​បរិស្ថាន ប្រើ​សិទ្ធិអំណាច​កៀបសង្កត់ ហាមឃាត់​មិនឱ្យ​លោក ធ្វើ​របង​ព័ទ្ធ​ព្រៃ នៅ​ខាងក្រោយ​ភូមិ ដើម្បី​ចិញ្ចឹម​គោ​-​ក្របី​។​

​អ្នកស្រី សាយ រ៉ា រស់នៅ​ភូមិ​កំពង់​ប៉ាង ឃុំ​កាំ​ង​ចាម បាន​រៀបរាប់​ផងដែរ​ថា ក្រុមគ្រួសារ គាត់ ទៅ​រើស​ចន្ទី​នៅ​ចម្ការ ត្រូវ​ត្រូវ​មន្ត្រី​បរិស្ថាន ដេញ​បាញ់​។ ក្រោយពី​ហេតុការណ៍ កើតឡើង គ្រួសារ​អ្នកស្រី ក៏បាន​សម្រេចចិត្ត ដាក់ពាក្យ​បណ្ដឹង ទៅ​សមាគម​អាដហុក ខេត្តស្ទឹងត្រែង​សុំ​ឲ្យ​ជួយ​រក​យុត្តិធម៌​។​

​ពលរដ្ឋ បានលើកឡើង​ទៀតថា មន្ត្រី​បរិស្ថាន តែងតែ​ប្រើ​វិធី​សម្លុត​គំរាម អ្នក​កាប់ចម្ការ និង​ដឹកឈើ ទារលុយ​ជា​ថ្នូរ និង​ការមិន​បង្ក្រាប​។ មួយ​គ្រួសារ ក៏​ធ្លាប់​ត្រូវបាន​មន្ត្រី​បរិស្ថាន ជំរិត​ទារប្រាក់ ជាច្រើន​លាន​រៀល ហើយ​គ្រួសារ​នោះបាន​ប្ដឹង​ដល់​លោក​អភិបាល ខេត្តស្ទឹងត្រែង ជួយ​ដោះស្រាយ​ទៀតផង​។​

​លោក ទុំ សា​រុំ មេឃុំ​សៀម​បូក ជាប់​នឹង​តំបន់​ព្រៃ​ឡង់ បាន​និយាយថា ប្រជាពលរដ្ឋ រួមទាំង​រូបលោក ក៏​មិនដឹងថា ព្រៃ​ណា​ដែលជា​កន្លែង​អភិរក្ស របស់​បរិស្ថាន​ដែរ​។ ពេល​ប្រជាពលរដ្ឋ ចូលទៅ​ព្រៃ រក​អនុផល ធនធានធម្មជាតិ ឬក៏​ធ្វើ​ចម្ការ តែងតែ​ប៉ះ ទង្គិច​ជាមួយ​មន្ត្រី​បរិស្ថាន មានការ​ប្ដឹងផ្ដល់​ជាច្រើន ករណី​។​

​បន្ថែម​ពីនេះ លោក​មេឃុំ សៀម​បូក បាន​និយាយថា ប្រជាពលរដ្ឋ ចង់បាន​ឈើ​ធ្វើ​ផ្ទះ ស្នើសុំ​ច្បាប់​ភូមិ ឃុំ និង​មន្ត្រី​បរិស្ថាន ដើម្បី​ចូល​ព្រៃ​អា​ឈើ​។ តែ​ពេល​ដាក់​លិខិតស្នើ សុំ​ទៅ ដល់​មន្ត្រី​បរិស្ថាន បែរជា​បាត់​ដំណឹង​សូន្យ​។ លុះ​ពេល​ប្រជាពលរដ្ឋ រង់ចាំ​យូរពេក និង​មិន​យល់​ច្បាប់ទម្លាប់​ផង ក៏​នាំគ្នា​ចូល​ព្រៃ​អារឈើ ដឹក​យកមក​ធ្វើ​ផ្ទះ ហើយ​ត្រូវ មន្ត្រី​បរិស្ថាន ល្បាត​ជួប និង​ត្រូវ​ចាប់ចង ឬក៏​ពិន័យ​ជា​ប្រាក់​ជាដើម​។​

​លោក ឃីម សុខា មេឃុំ​កាំ​ង​ចាម បាន​ឲ្យ​ដឹងផង​ដែរ​ថា ប្រជាពលរដ្ឋ​របស់លោក ក៏​ជួបប្រទះ​ជាមួយ មន្ត្រី​បរិស្ថាន​ផងដែរ ខណៈពេល​ប្រជាពលរដ្ឋ មួយចំនួន ពិតជា​បាន​ចូលទៅ​កាប់​ព្រៃ ធ្វើ​ចម្ការ ក្នុង​ដែន​អភិរក្ស របស់​ដែនជម្រកសត្វព្រៃ​ព្រៃ​ឡង់​។ លោក​បាន​និយាយ​បន្តថា ករណី​ខាងលើនេះ បានកើត​ឡើង ជា​បន្តបន្ទាប់ ត្រូវបាន​ដោះស្រាយ​។​

​លោក ម៉ម ដា​រា ប្រធាន​ស្នាក់ការ​ដែន​ជម្រក សត្វព្រៃ​ឡង់ បាន​ប្រាប់​អ្នកសារព័ត៌មាន​ថា លោក​ធ្វើតាម​ច្បាប់​។ ច្បាប់​មិនត្រូវ​យោគយល់​ទេ​។ រឿង​មួយ​គ្រួសារ នៅ​ភូមិ​អូ​ឡង់ ធ្វើ​របង​ហ៊ុមព័ទ្ធ​ព្រៃ មាន​ជម្លោះ​ជាមួយ​មន្ត្រី​បរិស្ថាន​នោះ លោក​ធ្លាប់​អោយ​ពួកគាត់ ធ្វើ​កិច្ចសន្យា ហើយ​នៅតែ​ប្រព្រឹត្ត ដដែល​។ រឿងនេះ លោក​នឹង​កសាង​សំណុំរឿង ប្ដឹងទៅ​តុលាការ ពីបទ​រារាំង​មន្ត្រី​ជំនាញ​៕/V​-PC