ដោយ៖ មុនីរ័ត្ន / ភ្នំពេញ៖ សម្ភារៈសុខាភិបាលជាច្រើន រួមនឹងថវិកាមួយចំនួន បម្រើការងារប្រយុទ្ធ ប្រឆាំងជំងឺកូវីដ១៩ ត្រូវបាននគរបាល ក្រុងហូជីមិញ និងនគរបាល ខេត្តឡុង អាង នៃសាធារណរដ្ឋ សង្គមនិយមវៀតណាម ឧបត្ថម្ភជូននគរបាល រាជធានីភ្នំពេញ នគរបាលខេត្តស្វាយរៀង និងនគរបាល ខេត្តព្រៃវែង នៃព្រះរាជាណាចក្រកម្ពុជា ដើម្បីយកទៅប្រើប្រាស់ ប្រយុទ្ធប្រឆាំង ជំងឺកូវីដ១៩ នៅគ្រាដែលនគរបាល នៃក្រុង ខេត្ត នៃប្រទេសទាំង២ បាននឹងនៅជួរមុខ ចូលរួមក្នុងកិច្ចសហប្រតិបត្តិ ការ ដើម្បីប្រយុទ្ធ ប្រឆាំងនឹងជំងឺកូវីដ១៩ ដែលជំងឺដ៏កាចសាហាវនេះ បានកំពុងឆ្លងរីករាលដាល នៅក្នុងសហគមន៍ នៃប្រទេសកម្ពុជា និងប្រទេសវៀតណាម ដែលនាំឱ្យប្រជាពលរដ្ឋ នៃប្រទេសទាំង ២ នេះ ស្លាប់ជាបន្តបន្ទាប់។
ពិធីប្រគល់ និងទទួលសម្ភារៈសុខាភិបាល បានធ្វើឡើង នៅច្រកទ្វារព្រំដែនអន្តរជាតិព្រៃវលិ៍្ល ខេត្តស្វាយរៀង និងច្រកទ្វារព្រំដែនអន្តរជាតិ ប៊ិន ហៀប ខេត្តឡុង អាង គណៈប្រតិភូនគរបាល រាជធានីភ្នំពេញ ខេត្តស្វាយរៀង និងខេត្តព្រៃវែង ដឹកនាំដោយ លោកឧត្តមសេនីយ៍ត្រី ជីវ លី ស្នងការរង នៃស្នងការដ្ឋាននគរបាល រាជធានីភ្នំពេញ តំណាងលោកឧត្តមសេនីយ៍ឯក ស ថេត អគ្គស្នងការរង នគរបាលជាតិ និងជាស្នងការនគរបាល រាជធានីភ្នំពេញ។ ចំណែកភាគី នគរបាលក្រុងហូជីមិញ និងនគរបាលខេត្ត ឡុង អាង ដឹកនាំប្រតិភូ ដោយលោក ឧត្តមសេនីយ៍ត្រី កៅ ដាំងហឹក ស្នងការរងនគរបាល ក្រុងហូជីមិញ តំណាងលោកឧត្តមសេនីយ៍ត្រី ឡេង ហុង ណាម ស្នងការនគរបាល ក្រុងហូជីមិញ។ ក្នុងនោះមានការអញ្ចើញចូលរួម ពីលោកស្នងការរង ទទួលការងារព្រំដែន នៃស្នងការដ្ឋានគរបាល ខេត្តស្វាយរៀង និងខេត្តព្រៃវែង និងវត្តមានស្នងការរង នគរបាលខេត្តឡុង អាង ។
នៅក្នុងឱកាសនោះ លោក ឧត្តមសេនីយ៍ត្រី កៅ ដាំងហឹក ស្នងការរងនគរបាល ក្រុងហូជីមិញ បានលើកឡើងថា ការឧបត្ថម្ភនូវគ្រឿង សម្ភារៈសុខាភិបាល និងថវិកា នៅពេលនេះ គឺជាការបង្ហាញនូវ ការបង្កើនកិច្ចសហប្រតិបត្តិការ រឹតចំណងមិត្តភាព សាមគ្គីភាព រវាងនគរបាលក្រុងហូជីមិញ នគរបាលខេត្តឡុង អាង នៃប្រទេសវៀតណាម ជាមួយនគរបាល រាជធានីភ្នំពេញ នគរបាល ខេត្តស្វាយរៀង និង ខេត្តព្រៃវែង ឱ្យកាន់តែរឹងមាំ និងការចែករំលែក បទពិសោធន៍ សម្រាប់ចូលរួម ប្រយុទ្ធ ប្រឆាំងជំងឺកូវីដ១៩ ដែលជំងឺកូវីដ១៩ កំពុងប្រឈម ចំពោះមុខ នៃការរាតត្បាត នៅក្នុងប្រទេស ទាំង២ គឺវៀតណាម -កម្ពុជា។
លោក ឧត្តមសេនីយ៍ត្រី កៅ ដាំងហឹក ក៏បានលើកឡើងទៀតថា នគរបាលកម្ពុជា និងនគរបាល វៀតណាម កន្លងមក បានសហការគ្នាយ៉ាងល្អ ក្នុងការបង្ការ ទប់ស្កាត់ ជំងឺឆ្លងកូវីដ១៩ មិនឱ្យឆ្លងចូលទៅវិញទៅមក រវាងប្រទេសវៀតណាម និង កម្ពុជា នោះឡើយ ។ ជាងនេះថែមទៀត លោកក៏បានជម្រាបជូន គណៈប្រតិភូនគរបាល រាជធានីភ្នំពេញ នគរបាលខេត្តស្វាយរៀង និងព្រៃវែង ឱ្យដឹងថា អំពីសភាពការណ៍ ជំងឺឆ្លងកូវីដ១៩ នៅក្នុងប្រទេសវៀតណាម បច្ចុប្បន្ននេះ នៅតែមានកត្តា ស្មុគស្មាញច្រើន ហើយការឆ្លងចូលក្នុងសហគមន៍ អាចផ្ទុះឡើងគ្រប់ពេលនិងគ្រប់ទីកន្លែង ហើយកម្លាំងនគរបាល ក្រុងហូជីមិញ និងនគរបាលខេត្តឡុង អាង សហការជាមួយ នគរបាល វៀតណាមទាំងមូល បាននៅឈរជួរមុខ ក្នុងការប្រយុទ្ធប្រឆាំងជំងឺកូវីដ១៩។ ការឧបត្ថម្ភជូននូវ សម្ភារៈសុខាភិបាល និងថវិកា នៅពេលនេះ គឺមានចំនួនតិចតួចប៉ុណ្ណោះ ប៉ុន្តែជាការជួយគ្នា ទៅវិញទៅមក នៅគ្រាដែលប្រទេសទាំង២ កំពុងជួបការលំបាក ដោយបញ្ហាជំងឺឆ្លងកូវីដ១៩។
ចំណែកលោកឧត្តមសេនីយ៍ត្រី ជីវ លី ស្នងការរង នៃស្នងការដ្ឋាននគរបាល រាជធានីភ្នំពេញ និងលោកស្នងការនគរបាល ខេត្តស្វាយរៀង និងលោកស្នងការនគរបាល ខេត្តព្រៃវែង បានថ្លែងអំណរគុណ យ៉ាងជ្រាលជ្រៅបំផុត ចំពោះលោកស្នងការនគរបាល ក្រុងហូជីមិញ និងស្នងការនគរបាល ខេត្តឡុងអាង ប្រទេសវៀតណាម ដែលបានបរិច្ចាគនូវ សម្ភារៈសុខាភិបាល និងថវិកា មួយចំនួន ជូនដល់នគរបាល រាជធានីភ្នំពេញ និង នគរបាលខេត្តទាំង២ ស្វាយរៀង ព្រៃវែង ដើម្បីបំពេញតម្រូវការចាំបាច់ សម្រាប់កងកម្លាំងនគរបាលកម្ពុជា ប្រើប្រាស់បង្ការកូវីដ១៩ ទន្ទឹមដែល នគរបាលរាជធានីភ្នំពេញ នគរបាលខេត្តស្វាយរៀង និងខេត្តព្រៃវែង កំពុងបំពេញភារកិច្ច យ៉ាងសកម្ម ចូលរួមប្រយុទ្ធប្រឆាំងជំងឺឆ្លងកូវីដ១៩ នៅក្នុងសហគមន៍។
លោកឧត្តមសេនីយ៍ត្រី ជីវ លី លើកឡើងទៀតថា បច្ចុប្បន្ននេះ កម្ពុជា និងវៀតណាម ជាប្រទេស ជិតខាងដ៏ល្អនឹងគ្នា នៅគ្រប់កាលៈទេសៈនៃការលំបាក តែងតែជួយគ្នាទៅវិញទៅមក ដោយមិន បោះបង់គ្នា នោះឡើយ ជាពិសេសទន្ទឹមដែលប្រទេសទាំង២ កំពុងរាតត្បាត ដោយជំងឺឆ្លងកូវីដ១៩ បានសហការនឹងផ្តល់ព័ត៌មានគ្នាទៅវិញទៅមក ក្នុងការទប់ស្កាត់ជំងឺកូវីដ១៩ មិនឱ្យនាំចូល រវាងប្រទេសទាំង ២ នោះឡើយ។ កិច្ចការងារនេះ លោកក៏សំណូមពរ ភាគីនគរបាលវៀតណាម បន្តសហការគ្នា ឱ្យកាន់ប្រសើរថែមទៀត ដើម្បីប្រយុទ្ធប្រឆាំងជំងឺកូវីដ១៩ នេះឱ្យកាន់តែមានប្រសិទ្ធ ភាព និងឈានទៅដល់ការកាត់ផ្តាច់ កុំឱ្យឆ្លងរីករាលចូល នៅក្នុងសហគមន៍ នៃប្រទេសទាំង២ កម្ពុជា-វៀតណាម។
សូមបញ្ជាក់ថា សម្ភារៈសុខាភិបាល ដែលនគរបាលក្រុងហូជីមិញ សហការជាមួយនគរបាលខេត្តឡុង អាង ឧបត្ថម្ភជូននោះ រួមមានៈស្នងការដ្ឋាននគរបាល រាជធានីភ្នំពេញ ទទួលបានម៉ាស់ ចំនួន ១២ កេសធំ ស្មើនឹង ៣ ម៉ឺនម៉ាស់ ថ្នាំសម្លាប់មេរោគ ចំនួន ៣០ ធុង ថវិកាចំនួន ២០០ លានដុង និងឯកសណ្ឋានមួយចំនួន។ ស្នងការដ្ឋាននគរបាល ខេត្តស្វាយរៀង និងស្នងការដ្ឋាននគរបាល ខេត្តព្រៃវែង ក្នុងមួយខេត្ត ទទួលបានម៉ាស់ ៤ កេសធំ, ថ្នាំសម្លាប់មេរោគ ២០ ធុង និងថវិកា ១០០ លានដុង វៀតណាម៕/V
