ដោយ​: ម៉េង​ឆៃ / ភ្នំពេញ​: ចាប់តាំងពី​បើក​ការធ្វើដំណើរ​ឆ្លងខេត្ត កាលពី​ថ្ងៃទី​២៦ ខែមេសា ហើយ​បន្ត​ដល់​ការបញ្ចប់​ការបិទ​ខ្ទប់​រាជធានី​ភ្នំពេញ កាលពី​ថ្ងៃទី​៦ ខែឧសភា គឺមាន​ប្រជាពលរដ្ឋ​មួយចំនួន បានធ្វើ​ដំណើរ​ពី​ខេត្ត​មួយ​ទៅ​ខេត្ត​មួយ ពិសេស​ចេញពី​ភ្នំពេញ ទៅតាម​បណ្តា​ខេត្ត​នានា​។ ក្នុងការ​ចល័ត​ធ្វើដំណើរ​នេះ ជា​រៀងរាល់ថ្ងៃ រកឃើញ​អ្នក​ឆ្លង​កូ​វីដ​១៩ ដែល​សុទ្ធតែជា​ជន​ចំណូល​ថ្មី ហើយ​ភាគច្រើន​ចេញពី​ភ្នំពេញ និង​ខេត្ត​ព្រះសីហនុ ដែលជា​តំបន់​មានការ​ឆ្លង​រាលដាល​ធ្ងន់ធ្ងរ​នៃ​ជំងឺ​កូ​វីដ​១៩​។​

​កាលពី​ព្រឹក​ថ្ងៃទី​១០ ខែឧសភា រដ្ឋបាលខេត្ត​កំពង់ចាម បានប្រកាស​ពី​ករណី​រកឃើញ​វិជ្ជមាន​កូ​វីដ​១៩ ចំនួន ១៦​នាក់​ទៀត​។ អ្នក​ឆ្លង​កូ​វីដ​១៩ នៅ​ខេត្តកំពង់ចាម ទើប​រកឃើញ​ថ្មី​ទាំងនេះ ភាគច្រើន ជា​កម្មករ​កាត់ដេរ នៅ​ភ្នំពេញ ហើយ​ធ្វើដំណើរ​ទៅលេង​ស្រុក​។ ពេលទៅដល់​ស្រុក ក៏​ពិនិត្យ រកឃើញ​ឆ្លង​កូ​វីដ​។​

​នៅ​រសៀល​ថ្ងៃទី​១០​ឧសភា រដ្ឋបាលខេត្ត​កំពង់ចាម ក៏បាន​ប្រកាស​ពី​ករណី​ស្ត្រី​កម្មករ​កាត់ដេរ​ម្នាក់ មាន​ផ្ទៃពោះ ៧​ខែ បាន​ស្លាប់ ដោយសារ​ជំងឺ​កូ​វីដ​១៩​។ ស្ត្រី​ឈ្មោះ សាន គឹម​ឡាង អាយុ ២៧​ឆ្នាំ ជា​កម្មការិនី​រោងចក្រ​កាត់ដេរ GNT ហៅ អគារ​៣២ នៅ​ព្រៃ​ស ក្នុង​រាជធានី​ភ្នំពេញ​។ នៅ​ថ្ងៃទី​៦​ឧសភា នាង​បានធ្វើ​ដំណើរ​ជាមួយ​ប្តី​ឈ្មោះ ស៊ុន រ៉ា​យុទ្ធ មក​ស្រុកកំណើត នៅ​ភូមិ​ក្បាលកោះ ឃុំ​កោះអណ្តែត ស្រុក​ស្រី​សន្ធរ ខេត្តកំពង់ចាម​។​

​សេចក្តីប្រកាស បង្ហាញថា ស្ត្រី​រូបនេះ និង​ស្វាមី ត្រូវបាន​បញ្ជូនមក​យក​សំណាក និង​ដាក់​ឲ្យ​ធ្វើ​ច​ត្តា​ឡី​ស័ក នៅ​មណ្ឌល​ច​ត្តា​ឡី​ស័ក រដ្ឋបាលខេត្ត​កំពង់ចាម ដោយ​សង្ស័យ​មាន​ជំងឺ​កូ​វីដ​១៩ ព្រោះ​មកពី​តំបន់​ក្រហម រាជធានី​ភ្នំពេញ​។ នៅវេលា​ម៉ោង ៥​ល្ងាច​ថ្ងៃ​ដដែល ស្ត្រី​រូបនេះ បានចេញ​អាកា​រៈ ក្តៅខ្លួន ក្អក ហត់ ក្រុមគ្រូពេទ្យ​ប្រចាំការ នៅ​មណ្ឌល​ច​ត្តា​ឡី​ស័ក បាន​បញ្ជូនមក​សម្រាក​នៅ​មន្ទីរពេទ្យ​ខេត្ត និង​បានធ្វើ​តេស្ត​រហ័ស​កូ​វីដ​១៩ ទទួលបាន​លទ្ធផល​វិជ្ជមាន​កូ​វីដ​១៩​។

​សេចក្តីប្រកាស បន្តថា ដោយ​ការវិវត្ត​នៃ​ជំងឺ ចេះតែ​ធ្ងន់ធ្ងរ​ឡើង ហើយ​ស្ថានភាព​អ្នកជំងឺ​ហត់​ដង្ហក់​ខ្លាំង ដែល​តម្រូវ​ឲ្យ​ក្រុមគ្រូពេទ្យ ជួយសង្គ្រោះ​តាម​លក្ខណៈ​បច្ចេកទេស​យ៉ាង​យកចិត្តទុកដាក់ រួមទាំង​ការប្រើ​ម៉ាស៊ីន​ជំនួយ​ដង្ហើម​ផង​នោះ ក៏​នៅតែ​មិន​អា​ជួយសង្គ្រោះ​អ្នកជំងឺ​បាន​។ អ្នកជំងឺ បាន​ស្លាប់បាត់​បង់ជីវិត នៅ​ថ្ងៃទី​១០ ខែឧសភា ឆ្នាំ​២០២១ វេលា​ម៉ោង ០៦:០៥​នាទី​។​

​ជាការ​សន្និដ្ឋាន​របស់​ក្រុមគ្រូពេទ្យ បញ្ជាក់ថា ស្ត្រីជន​ជាតិខ្មែរ ឈ្មោះ សាន គឹម​ឡាង អាយុ ២៧​ឆ្នាំ បាន​ស្លាប់ បាត់បង់​ជីវិត ដោយ​រោគវិនិច្ឆ័យ​រលាក​សួត​ធ្ងន់ធ្ងរ ដោយសារ​វីរុស​កូ​វីដ​១៩ និង​មាន​ផ្ទៃពោះ ៧​ខែ​។​

​ដោយឡែក កាលពី​ថ្ងៃទី​៩ ខែឧសភា នៅ​ខេត្តសៀមរាប បាន​រកឃើញ​អ្នក​វិជ្ជមាន​ជំងឺ​កូ​វីដ​១៩ ថ្មី ចំនួន ៥​នាក់ កាលពី​ថ្ងៃទី​៧-៨-៩ ខែឧសភា ឆ្នាំ​២០២១​។ អ្នក​ទាំង ៥​នាក់​នោះ មាន ៤​នាក់ មកពី​ខេត្ត​ព្រះសីហនុ និង​ម្នាក់ មកពី​ភ្នំពេញ​។​

​ដូច្នេះ​បើ​ផ្អែក​តាម​ករណី​ឆ្លង​ថ្មី ដែល​ទើប​ប្រកាស​កាលពី​ថ្ងៃទី​៩ និង​ថ្ងៃទី​១០​ឧសភា នៅ​ខេត្តសៀមរាប និង​ខេត្តកំពង់ចាម គឺ​សុទ្ធតែជា​ករណី​នាំចូល​។ ពោលគឺ​អ្នក​ទៅ​ពី​ភ្នំពេញ និង​ខេត្ត​ព្រះសីហនុ ត្រូវបាន​រកឃើញ​កើត​ជំងឺ​កូ​វីដ នៅពេល​ទៅដល់​ស្រុកកំណើត នៅ​ខេត្តកំពង់ចាម និង​ខេត្តសៀមរាប​។ បណ្តា​ខេត្ត​ដទៃទៀត ក៏​មិន​ខុសពី​ខេត្តកំពង់ចាម និង​ខេត្តសៀមរាប​នេះ​ប៉ុន្មាន​ឡើយ​។​

​ជា​វិធានការ​ចំពោះមុខ នៅពេល​មាន​ជន​ចំណូលស្រុក​ថ្មី អាជ្ញាធរ​សមត្ថកិច្ច បាន​ចាត់វិធានការ​បន្ទាន់ ដោយ​ធ្វើតេស្ត និង​ធ្វើ​ច​ត្តា​ឡី​ស័ក​។ ចំពោះ​អ្នកជំងឺ ត្រូវបាន​បញ្ជូនទៅ​មន្ទីរពេទ្យ​ខេត្ត ហើយ​កំណត់​អត្ត​សញ្ញា​អ្នកពាក់ព័ន្ធ ជា​អ្នករួមដំណើរ និង​អ្នក​ប៉ះពាល់​ជាមួយ​អ្នកជំងឺ​នៅ​ស្រុកភូមិ ហើយ​បញ្ជូនមក​យក​សំណាក ធ្វើតេស្ត​ស្រាវជ្រាវ និង​ធ្វើ​ច​ត្តា​ឡី​ស័ក រយៈពេល ១៤​ថ្ងៃ ដើម្បី​តាមដាន​សុខភាព​។​

​មួយវិញទៀត បន្ទាប់ពី​យក​អ្នកជំងឺ​ចេញពី​ភូមិ ហើយ​អ្នកពាក់ព័ន្ធ​ក៏ត្រូវ​បាន​ប្រមូល​ធ្វើតេស្ត និង​ធ្វើ​ច​ត្តា​ឡី​ស័ក អាជ្ញាធរ​សមត្ថកិច្ច ក៏បាន​សម្រេច​បិទ​ភូមិ ដែលមាន​អ្នក​ឆ្លង​ជំងឺ​កូ​វីដ ថែម​ទៀតផង​។ វិធានការ​នេះ ដើម្បី​ទប់ស្កាត់​ការឆ្លង​រាលដាល​ជំងឺ​កូ​វីដ​១៩ ដែល​តាម​បណ្តា​ខេត្ត សុទ្ធតែជា​ករណី​នាំចូល​ពី​ក្រៅ​។​

​ដោយសារតែ​មួយរយៈ​ចុងក្រោយ​នេះ នៅតាម​បណ្តា​ខេត្ត​មួយចំនួន បាន​កើនឡើង​នូវ​ចំនួន​អ្នក​ឆ្លង​កូ​វីដ​១៩ ដែលជា​ករណី​នាំចូល ដូច្នេះហើយ ទើប​ក្នុងអំឡុង​ពេលនេះ ប្រជាពលរដ្ឋ​យើង ពិសេស​អ្នក​នៅ​ភ្នំពេញ ដែលជា​តំបន់​មាន​ហានិភ័យ​ខ្ពស់​ក្នុង​ការឆ្លង​កូ​វីដ​១៩ គួរតែ​កុំ​ទាន់​ប្រញាប់ប្រញាល់ ធ្វើដំណើរ​ទៅ​ខេត្ត​។ អ្នក​ខេត្ត ក៏​គួរតែ​បង្អង់​ចាំ​បន្តិចទៀត ចាំ​ឡើងមក​ភ្នំពេញ​។​

​ករណី​ស្ត្រី​កម្មករ​កាត់ដេរ មាន​ផ្ទៃពោះ ៧​ខែ ដែល​បាន​រកឃើញ​ឆ្លង​ជំងឺ​កូ​វីដ​១៩ នៅពេល​ទៅដល់​ស្រុក​កំណត់ នៅ​ខេត្តកំពង់ចាម គឺជា​ករណី​ថ្មី​មួយ ដែល​ត្រូវ​ពិចារណា​។ ករណីនេះ អាច​នាង​ឆ្លង​ជំងឺ​ដោយ​ពុំ​ដឹងខ្លួន នៅក្នុង​តំបន់​ក្រហម នៅ​ភ្នំពេញ ឬក៏​ពេលធ្វើ​ដំណើរ​ចេញពី​ផ្ទះជួល នៅ​តំបន់​ក្រហម នៅ​ព្រៃ​ស​នោះឯង ដែលជា​ឱកាស នាំ​ឲ្យ​កូ​វីដ អាច​ឆ្លង​បាន​។​

​ប៉ុន្តែ​យ៉ាងណាក៏ដោយ បើ​ថា ចាំបាច់​ណាស់ ត្រូវធ្វើ​ដំណើរ​ចេញពី​ភ្នំពេញ ទៅ​ស្រុកកំណើត ឬ​បំពេញការងារ​តាម​បណ្តា​ខេត្ត ក៏​សូម​ឲ្យ​ប្រកាន់​វិធានការ ៣​កុំ និង​៣​ការពារ​ជានិច្ច​។ នោះ​គឺ​ពាក់​ម៉ាស​ជាប់​ជានិច្ច ឧស្សាហ៍​លាង​សម្អាត​ដៃ និង​រក្សា​គម្លាត​សុវត្ថិភាព​។ នេះ​ជា​វិធី​សាមញ្ញៗ ដែល​អាច​ការពារ កុំ​ឲ្យ​ឆ្លង​ជំងឺ ដល់​ខ្លួន​ផង និង​ការពារ កុំ​ឲ្យ​ឆ្លង​ជំងឺ​ទៅ​អ្នកដទៃ​ផង បើសិនជា​ខ្លួនឯង មាន​ជំងឺ​កូ​វីដ​១៩ ដោយ​ពុំ​ដឹងខ្លួន​៕srn​