ប្រែ​សម្រួលៈ​វាសនា​/​ញូ​វ ដែ​ល្លី​៖ សាកសព​រាប់សិប​ដែល​គេ​ជឿ​ថា​ជា​ជនរងគ្រោះ​ដោយកូវី​ដ​១៩ បាន​អណ្តែត​មកទើ​តាម​មាត់​ទន្លេ​គង្គានៅ​ឥណ្ឌា​ខាងជើង​។​

​ជំងឺ​ឆ្លងកូវី​ដ​១៩​បាន​រីក​រាលដាល​លឿន​ចូល​តំបន់​ជនបទ​ដ៏​ធំ​ល្វឹងល្វើយ​របស់​ឥណ្ឌា​ដោយ​បញ្ជូន​អ្នកជំងឺ​ចូល​បណ្តា​មន្ទីរពេទ្យ​មូលដ្ឋាន​យ៉ាង​ជោរជន់​ខណៈ​ឈាបនដ្ឋាន​និង​ទី​បញ្ចុះសព​ក៏​រវល់​ស្ទើរ​ពេញ​២៤​ម៉ោង​ផង​ដែរ​។​

​មន្ត្រី​មូលដ្ឋាន​លោក អា​សូក គុ​មារ បាន​និយាយថា សាកសព​ប្រមាណ​៤០​បាន​អណ្តែត​មកទើ​តាម​មាត់​ទន្លេ​ក្នុង​ស្រុក​ប៊ូសា ជិត​ព្រំដែន​រវាង​រដ្ឋ​ប៊ី​ហា និង អ៊ុត​តា ប្រា​ដែស​ដែល​ជា​រដ្ឋ​ក្រីក្រ​បំផុត​២​របស់​​ឥណ្ឌា​។​«​យើង​បាន​ប្រាប់​ទៅ​មន្ត្រី​ពាក់ព័ន្ធ​អោយ​ស្រង់​សាកសព​ទាំងអស់​ដើម្បី​យក​ទៅ​កប់​ឬ​ដុត​»​។​

​សារព័ត៌មាន​ខ្លះ​បាន​និយាយថា ចំនួន​សាកសព​ដូច្នេះ​អាច​មាន​ប្រមាណ​១០០ ដោយ​មួយចំនួន​ហើម​និង​ត្រូវ​បាន​ដុត​ឆេះ​ខ្លះ និង​អាច​ស្ថិតនៅ​ក្នុង​ទន្លេ​អស់​ពេល​ជាច្រើន​ថ្ងៃ​។​

​អ្នកស្រុក​បាន​ប្រាប់​សារព័ត៌មាន​បារាំង​ថា គេ​ជឿ​ថា សាកសព​ទាំងនេះ​ត្រូវ​បាន​ទម្លាក់​ចូល​ក្នុង​ទន្លេ​ដោយសារតែ កន្លែង​បូជា​ជោរជន់​ដោយ​សាកសព​ច្រើនពេក ឬ​ក៏​ដោយសារ​តែ​សាច់ញាតិ​មិន​អាច​រក​​អុស​ដុត​សព​បាន​។​

​អ្នកស្រុក​ម្នាក់​ឈ្មោះ កា​មេស​វ៉ា ប៉ានដេ​បាន​និយាយថា​«​វា​គួរ​អោយ​រន្ធត់​ណាស់​»​។​

​យោង​តាម​ស្ថិតិ​ផ្លូវការ មនុស្ស​ប្រមាណ​៤.០០០​នាក់​បាន​ស្លាប់​ដោយកូវី​ដ​១៩​នៅ​ឥណ្ឌា​ក្នុង​មួយថ្ងៃៗ និង​ការស្លាប់​សរុប​ដោយ​ជំងឺ​នេះ​ឡើង​ជិត​ដល់​២៥០.០០០​នាក់​ហើយ​៕

​រូប​កាលពី​ថ្ងៃ​៥​ឧសភា បង្ហាញ​ការ​បូជាសព​អ្នក​កើតកូ​វីដ​១៩ នៅ​ជាប់​មាត់​ទន្លេ​គង្គារ​