ដោយ​: ម៉េង​ឆៃ / កំពង់ឆ្នាំង​: ករណី​អគ្គិភ័យ​មួយ បានកើត​ឡើង នៅ​ភូមិ​ខុន​រ៉ង ឃុំ​ខុន​រ៉ង ស្រុក​បរិបូណ៌ ខេត្តកំពង់ឆ្នាំង កាលពី​យប់​ថ្ងៃទី​៩ ខែឧសភា ឆ្នាំ​២០២១​។ ហេតុការណ៍​នោះ បានសម្លាប់​ស្ត្រី មាន​ផ្ទៃពោះ​បី​ខែ​ម្នាក់ និង​កូនប្រុស បួន​នាក់​ទៀត អាយុ​ចាប់ពី ៣​ឆ្នាំ​ដល់ ៩​ឆ្នាំ​។​

​ប៉ូលិស​បាន​ឲ្យ​ដឹងថា នៅក្នុង​គ្រោះ​អគ្គិភ័យ​នោះ មានតែ​បុរស​ជា​ប្ដី​ឈ្មោះ ន​ន់ សារ៉េត អាយុ ៣៨ ឆ្នាំ​ប៉ុណ្ណោះ ដែល​បាន​រួច​ផុតពី​គ្រោះថ្នាក់​ដល់​ជីវិត ព្រោះ​បាន​រត់​ចេញពីផ្ទះ ក្នុងពេល​ភ្លើង​កំពុង​ឆេះ​យ៉ាង​សន្ធោសន្ធៅ​។ ផ្ទះ​ឆេះ​នោះ ទំហំ ៧ ម៉ែត្រ គុណ ១២ ម៉ែត្រ ធ្វើ​ពី​ដែក ប្រក់​ស័ង្កសី ហើយ​ម៉ូតូ​រ៉ឺម៉ក​កង់​បី​មួយគ្រឿង និង​ទំនិញ ជា​ខោអាវ​ជជុះ​ជាង ៣ តោន ត្រូវបាន​ឆេះ​ខូចខាត​អស់ទាំង​ស្រុង​។​

កម្លាំង​សមត្ថកិច្ច បាន​ប្រើប្រាស់​រថយន្ត​ពន្លត់​អគ្គិភ័យ ចំនួន​បី គ្រឿង និង​ប្រើប្រាស់​ទឹក​អស់ ១៨ ម៉ែត្រគូប ទើប​អាច​ពន្លត់​អគ្គិភ័យ​នេះ ឲ្យ​រលត់​អស់​។​

​ដំបូង​សមត្ថកិច្ច​នគរបាល​ជំនាញ បាន​សន្និដ្ឋានថា គ្រោះ​អគ្គិភ័យ​នេះ អាច​បង្កឡើង​ពី​កា​រទូ​ស្សេ​ចរន្តអគ្គិសនី ឬ​ផ្ទុះ​កំប៉ុង​ហ្គាស ក្នុងពេល​ដាំ​ស្ល បណ្ដាល​ឲ្យ​ឆាបឆេះ​រាល​ដល់​គំនរ​ខោអាវ​ជជុះ ដែល​ជនរងគ្រោះ​បាន​ទិញ យកមក​ស្តុក​ទុក​លក់ នៅក្នុង​ផ្ទះ ព្រោះ​នៅមុន​ពេល​អ្នកភូមិ​ឃើញ​មាន​អណ្ដាតភ្លើង​ឆាបឆេះ​ចេញមកក្រៅ គឺ​គេ​ឮស្នូរ​សំឡេង​ផ្ទុះ​។​

​យ៉ាងណាក៏ដោយ ក្រោយ​កើតហេតុ​ការណ៍​នោះ សមត្ថកិច្ច​បាន​ស្រាវជ្រាវ​បន្ត​ដើម្បី​រក​មូលហេតុ​ពិត​នៃ​ការបង្ក​ឲ្យ មាន​ករណី​អគ្គិភ័យ​នេះ កើតឡើង​។ ភ្លាមៗ​នោះ បុរស​ជា​ប្ដី ឈ្មោះ ន​ន់ សារ៉េត ត្រូវបាន​សមត្ថកិច្ច ជួយ​អន្តរាគមន៍ បញ្ជូន​ទៅកាន់​មន្ទីរពេទ្យបង្អែក​ស្រុក​បរិបូណ៌ ដើម្បី​ពិនិត្យ​ព្យាបាល​។

​ប៉ូលិស​ថា ក្រោយ​កើតហេតុ​ភ្លាមៗ អារម្មណ៍​របស់លោក ន​ន់ សារ៉េត មិន​នឹងនរ​ទេ ម្ដង​យំ ម្ដង​សើច ហើយ​សន្លប់ ព្រោះ​រន្ធត់ចិត្ត ដោយសារ​ឃើញ​ប្រពន្ធ​កូន​គាត់​ស្លាប់​អស់​។​

​ប៉ុន្តែ​យ៉ាងណាក៏ដោយ មកដល់​ថ្ងៃទី​១២ ខែឧសភា​នេះ សំណុំរឿង​អគ្គិភ័យ​ភ្លើង​ឆេះ​ផ្ទះ​នៅ​ខេត្តកំពង់ឆ្នាំង​នេះ ត្រូវបាន​បំបែក ដោយ​អ្នកជំនាញ​ស៊ើបអង្កេត​ករណី​អគ្គិភ័យ​នៅ​អូស្ត្រាលី​បាន​សហការ​ជាមួយ​អាជ្ញាធរ សមត្ថកិច្ច​កម្ពុជា​។ នោះ​គឺ​បុរស ន​ន់ សារ៉េត បាន​ដុត​សម្លាប់​ប្រពន្ធ និង​កូន​បួន​នាក់​។ បុរស​រូបនោះ ត្រូវបាន​ចាប់ខ្លួន ហើយ​សមត្ថកិច្ច បញ្ជូនទៅ​តុលាការ​សាលាដំបូង ខេត្តកំពង់ឆ្នាំង ដើម្បី​ផ្តន្ទាទោស​ពីបទ​ឃាតកម្ម ទៅលើ​មនុស្ស ៥​នាក់​។​

​លោក James McCABE នាយក​ប្រតិបត្តិ​អង្គភាព​ការពារ​កុមារ (CPU) ថ្លែងថា​បន្ទាប់ពី​យើង​បាន​ត្រួតពិនិត្យ​កន្លែង កើតហេតុ និង​សាកសព​ទាំង​៥​នាក់ យើង​បាន​ចាប់អារម្មណ៍​ថា មាន​ភាពមិន​ប្រក​តី​យ៉ាងខ្លាំង​ជាច្រើន​ដែល​បានកើត ឡើង​នៅក្នុង​បរិវេណ​កន្លែងកើតហេតុ​នេះហើយ​សេចក្តីបំភ្លឺ​ដំបូង​របស់​ជនសង្ស័យ​ដែល​រៀបរាប់​អំពី​វិធី​ភ្លើង​ចាប់ផ្តើម​ឆាបឆេះ​ដំបូង និង​ព្រឹ​ត្ត​ការណ៍​បន្ទាប់ ក៏​មិន​ស៊ីសង្វាក់​ជាមួយ​អ្វីៗ ដែល​យើង​បានឃើញ​។​

​លោក James McCABE ថ្លែងអំណរគុណ​ទៅដល់​មន្ត្រី​ជំនាញ នៅ​ប្រទេស​អូស្ត្រាលី​ដែល​បានផ្តល់​ជា​ជំនួយ​ក្នុងការ វិភាគ​ភស្តុតាង​។ នេះ​គឺជា​ការស៊ើបអង្កេត​ដ៏​ល្អ ដែល​បាន​ធ្វើឡើង ដោយ​មន្ត្រីនគរបាល​ខេត្តកំពង់ឆ្នាំង និង​ក្រសួងមហាផ្ទៃ ដើម្បី​ធ្វើអោយ​ប្រាកដថា កុមារ​រងគ្រោះ និង​ម្តាយ​របស់​ពួកគេ បានទទួល​នូវ​យុត្តិធម៌​។​

​ជុំវិញ​ករណីនេះ ជនដៃដល់ បាន​ឆ្លើយ​សារភាព​ប្រាប់​សមត្ថកិច្ច​ថា រូបគេ​បានសម្លាប់​ប្រពន្ធ​ដោយ​ប្រើ​កន្ត្រៃ នៅពេល​ហូបបាយ មុននឹង​ដុត​ផ្ទះ​សម្លាប់​ទាំង​កូន ៤​នាក់​។​

រូបថតៈបុរសជាប្តីក្នុងពេលកើតហេតុ

​ករណី​ឃាតកម្ម​ដ៏​សាហាវព្រៃផ្សៃ​នេះ ពិតជា​រឿង​នឹកស្មាន​មិន​ដល់​។ មហាជន​ទូទៅ បាន​ថ្កោលទោស​បុរស ជា​ប្តី និង​ជា​ឪពុក​នោះ ថា​មិន​ស្មើនឹង​សត្វ​តិរច្ឆាន​ឡើយ​។

​ទោះបី​ជាមាន​កំហឹង​ប៉ុណ្ណា​ក៏ដោយ ក៏​គួរតែ​អត់អោន​ឲ្យ​គ្នា ហើយ​បើ​ថា ដល់​ថ្នាក់​មិនអាច​អត់អោន អធ្យាស្រ័យ​បាន ក៏​ប្តី ដើរ​ចេញទៅ​។ បុរស​ចិត្ត​តិរច្ឆាន​នោះ បើ​ថា​មិន​អាណិត​ប្រពន្ធ​ទេ ក៏​គួរតែ​អាសូរ​ដល់​កូនតូចៗ ភ្នែក​ខ្មៅ មិនដឹង​អ្វី បែរជា​ត្រូវ​មក​រងគ្រោះ​រហូតដល់​ត្រូវ​ដុត​ទាំង​រស់ ដោយសារតែ​ចិត្តសាហាវ​ឃោរឃៅ​គ្មាន​មេត្តា​ពី​ឪពុក​ដូច្នេះ​។​

​ឯកសារ​បង្ហាញថា ក្នុងនាម​ជា​ឪពុកម្តាយ ត្រូវមាន​កាតព្វកិច្ច​ចំពោះ​កូនចៅ រួមមាន​៖ ត្រូវ​ចិញ្ចឹម​ថែរក្សា​កូន និង​មាន​ព្រហ្មវិហារ​ចំពោះ​កូន​។ អប់រំ​កូន​ឱ្យ​គោរព​សមាជិកគ្រួសារ​តាម​ឋានៈ ចេះ​គោរព​ព្រឹទ្ធ​ចា​រ្យ​។ អប់រំ​កូន​ឱ្យ​ប្រព្រឹត្ត​តែ​អំពើ​សុចរិត​សច្ចៈ​ទៀងត្រង់​។​ត្រូវ​ធ្វើជា​គំរូ​ល្អ​និង​ផ្តល់​ភាពកក់ក្តៅ​ដល់​កូន​ឱ្យមាន​ទំនុកចិត្ត​លើ​យើង​។ ស្វែងរក​អនាគត​ឱ្យ​ពួកគេ (​ផ្តល់​ចំណេះដឹង ទ្រព្យសម្បត្តិ រៀបចំ​គ្រួសារ​) ជាដើម​។​

​ផ្ទុយទៅវិញ បុរស​ខាងលើនេះ មិនបាន​បំពេញ​កា​ត្វ​កិច្ច​ជា​ឪពុក ចំពោះ​កូន​ទេ បែរ​ក្លាយជា​ឃាតក​ឥត​មេត្តា លើ​កូន និង​ប្រពន្ធ​។ ច្បាប់​នឹងដាក់​ទោស​ធ្ងន់ធ្ងរ ហើយ​វិប្បដិសារី រួមទាំង​កម្ម​ពារ​ក៏​តាម​តបស្នង​សង​ដល់​អំពើ​របស់​ប្តី​កំណាច និង​ជា​ឪពុក​ចិត្ត​តិរច្ឆាន​នោះ​ថែមទៀត​៕​សរន