ប្រែសម្រួល : កញ្ញាដាលីស ៖ ក្រុមអ្នកជំនាញបានព្រមានថា វីរុសកូរ៉ូណាបំលែងខ្លួនថ្មីបង្កការគំរាមកំហែងយ៉ាងធ្ងន់ធ្ងរដល់បណ្តាប្រទេសដែលមានប្រាក់ចំណូលទាបនិងមធ្យមកន្លែងដែលការទទួលបានវ៉ាក់សាំងនៅមានកម្រិត។
ខណៈបណ្តាប្រទេសភាគច្រើនស្ថិតនៅបន្ទាត់ចាប់ផ្តើមដូចគ្នានៅរលកដំបូងនៃវីរុសកូរ៉ូណាក្នុងពេលដែលជំងឺរាតត្បាតបានបំផ្លាញពិភពលោកក្នុងឆ្នាំ ២០២០ ស្ថានភាពឥឡូវបានផ្លាស់ប្តូរចាប់តាំងពីពេលនោះមក។
ក្នុងពេលដែលគ្មានវ៉ាក់សាំង រដ្ឋាភិបាលនៃប្រទេសដែលមានចំណូលទាបនិងខ្ពស់បានពិចារណាលើអន្តរាគមន៍ដែលមិនមែនជាឱសថស្រដៀងគ្នា ដូចជាការបិទខ្ទប់និងការរក្សាគម្លាតសង្គម។
លោក ដេវីដ ហ្វីដត្ល័រ ជាមន្ត្រីនៅផ្នែកសុខភាពសកលនិងសន្តិសុខតាមអ៊ីនធឺណេតនៅក្រុមប្រឹក្សាទំនាក់ទំនងបរទេសក្នុងសហរដ្ឋអាម៉េរិក បានប្រាប់វេបសាយ VnExpress ថា ឥឡូវនេះដោយហេតុថាប្រទេសអ្នកមាននិងអ្នកដែលមានការផ្គត់ផ្គង់វ៉ាក់សាំងច្រើនដូចជាចិនកំពុងជំរុញយុទ្ធនាការចាក់វ៉ាក់សាំងយ៉ាងខ្លាំងក្លា”អំឡុងរយៈពេលបន្ទាប់ទៀតនៃជំងឺរាតត្បាតនឹងស្តែងឱ្យឃើញពីភាពខុសគ្នាឆ្ងាយនៅក្នុងបណ្តាប្រទេសដែលមានវ៉ាក់សាំងនិងប្រទេសដែលខ្សត់វ៉ាក់សាំង”។
ជំងឺរាតត្បាតជាសកលឥឡូវនេះបង្ហាញពីភាពខុសប្លែកគ្នាយ៉ាងខ្លាំងរវាងប្រទេសដែលមានយុទ្ធនាការចាក់វ៉ាក់សាំងយ៉ាងឈ្មុសឈ្មុលនិងប្រទេសដែលមានវ៉ាក់សាំងទាបឬគ្មានវ៉ាក់សាំងដោយសារតែខ្សត់ធនធាន។ នៅចក្រភពអង់គ្លេសនិងសហរដ្ឋអាម៉េរិក កន្លែងដែលប្រជាជនបានទទួលវ៉ាក់សាំងក្នុងអត្រាខ្ពស់ការឆ្លងវីរុសកូរីដកំពុងធ្លាក់ចុះយ៉ាងខ្លាំងហើយជីវិតទំនងជាវិលត្រឡប់មករកសភាពធម្មតាវិញឆាប់ៗ។ រដ្ឋបាលចំណីអាហារនិងឪសថកាលពីពេលថ្មីៗនេះបានអនុញ្ញាតឱ្យប្រើវ៉ាក់សាំង Pfizer-BioNTech សម្រាប់ក្មេងអាយុពី ១២ ទៅ ១៥ ឆ្នាំដោយជួយបង្កើនលទ្ធភាពទទួលបានវ៉ាក់សាំងដល់ប្រជាជនអាម៉េរិកកាន់តែច្រើន។
ឥណ្ឌាស្ថិតក្នុងស្ថានភាពខុសគ្នាទាំងស្រុង។ រលកទីពីរនៃកូវីដ១៩ ដែលជំរុញការឆ្លងដោយវីរុសបំលែងខ្លួនឈ្មោះ B.1.617បានធ្វើឱ្យប្រព័ន្ធសុខភាពរបស់ឥណ្ឌាចុះខ្សោយជាច្រើនខែបន្ទាប់ពីការបិទខ្ទប់ត្រូវបានបន្ធូរបន្ថយ។ ប្រទេសនៅអាស៊ីខាងត្បូងមួយនេះបានកត់ត្រាករណីឆ្លងជាង ២៣ លាននាក់និងស្លាប់ចំនួន ២៥០.០០០ នាក់ចាប់តាំងពីការចាប់ផ្តើមរលកទីពីររបស់ខ្លួនជាផ្លូវការហើយអ្នកជំនាញជាច្រើនអះអាងថា តួលេខពិតប្រាកដគឺខ្ពស់ជាងនេះ។
លោក តេត្រូស អាដាណុម ហ្គេប្រេយ៉េស៊ូស អគ្គនាយកអង្គការសុខភាពពិភពលោកបានកត់សម្គាល់កាលពីថ្ងៃចន្ទថាបណ្តាប្រទេសនៅអាស៊ីអាគ្នេយ៍មានការកើនឡើងយ៉ាងខ្លាំងទាំងករណីឆ្លងនិងករណីស្លាប់ ជាពិសេសនៅក្នុងប្រទេសកម្ពុជានិងថៃ។ នៅថ្ងៃដដែលនោះ ម៉ាឡេស៊ីក៏បានប្រកាសបិទផងដែរ ពោលគឺ ២ ថ្ងៃបន្ទាប់ពីកត់ត្រាករណីឆ្លងប្រចាំថ្ងៃខ្ពស់បំផុតចាប់តាំងពីខែមករារីឯវៀតណាក៏ហាក់កំពុងទទួលការវាយប្រហារជាថ្មីដោយកូវីដ១៩។
ក្រុមអ្នកជំនាញនិយាយថា អ្វីដែលប្រទេសទាំងនេះមានដូចគ្នាគឺលទ្ធភាពទទួលបានវ៉ាក់សាំងនៅមានកម្រិត រួមផ្សំជាមួយការពិតដែលថាពួកគេបានទទួលជោគជ័យដោយផ្នែកលើជំងឺរាតត្បាតដោយសារតែគោលនយោបាយបិទខ្ទប់យ៉ាងតឹងរ៉ឹង ដោយព្រមានថា វីរុសបំលែងខ្លួននឹងបន្តលេចឡើងប្រសិនបើការរីករាលដាលនៃកូវីដ១៩មិនអាចបញ្ឈប់បាននៅតាមបណ្តាប្រទេសដែលខ្សត់វ៉ាក់សាំងនៅលើពិភពលោក។
វៀតណាម ដែលប្រជាជនខ្លួនតែ ១ ភាគរយបានទទួលវ៉ាក់សាំង កំពុងប្រឈមនឹងរលកទីបួននៃកូវីដ១៩ ដោយមានអ្នកឆ្លងជិត ៧០០ នាក់គិតចាប់តាំងពីចុងខែមេសា។
លោកហ្វីដត្ល័រនិយាយថា “ប្រទេសជាច្រើនប្រឈមមុខនឹងបញ្ហាដ៏គួរឱ្យភ័យខ្លាច ។
វីរុសបំលែងខ្លួនបានកើតឡើងនៅពេលដែលប្រទេសនានាមិនអាចទប់ស្កាត់ជាប់និងកាត់ផ្តាច់ខ្សែសង្វាក់នៃការចម្លងវីរុសបាន។ ទោះយ៉ាងណាបើគ្មានវ៉ាក់សាំងទេការខូចខាតខាងសេដ្ឋកិច្ចនិងសង្គមដែលកើតឡើងដោយសារការធ្វើអន្តរាគមន៍មិនមែនឱសថ នឹងមិនអាចទ្រទ្រង់បានយូរទេដើម្បីកាត់ផ្តាច់ខ្សែសង្វាក់វីរុស មានន័យថាប្រទេសនានាត្រូវតែបន្ធូរបន្ថយវិធានការមិនមែនឱសថមុនពេលវីរុសត្រូវបានបង្ក្រាបដោយប្រសិទ្ធភាព”។
លោកនិយាយថា “ដូច្នេះវីរុសកូរ៉ូណាដើមនិងវីរុសកូរ៉ូណាបំលែងខ្លួននៅតែមាននៅក្នុងចំណោមប្រជាជននិងបន្តរីករាលដាល ដោយបង្ខំឱ្យរដ្ឋាភិបាលពិចារណាឡើងវិញនូវការធ្វើអន្តរាគមន៍មិនមែនឱសថ” ដោយកត់សម្គាល់ថា ការបិទខ្ទប់ជាថ្មីទំនងជាកើតឡើងនៅពេលដែលប្រទេសទាំងនោះខ្វះឬគ្មានវ៉ាក់សាំង។
អ្នកជំនាញផ្នែកជំងឺរាតត្បាត លោក អេរិក ហ្វីហ្គលទីងបច្ចុប្បន្នជាសមាជិកជាន់ខ្ពស់នៃសហព័ន្ធអ្នកវិទ្យាសាស្ត្រអាម៉េរិកនិងជាអតីតសមាជិកមហាវិទ្យាល័យនិងអ្នកស្រាវជ្រាវនៅសាលាជំនាញវេជ្ជសាស្ត្រហាវឺដ បានកត់សម្គាល់ថា វីរុសកូរ៉ូណាបំលែងថ្មីនឹងជះផលប៉ះពាល់ដល់កិច្ចប្រឹងប្រែងក្នុងការគ្រប់គ្រងជំងឺរាតត្បាតនៅតាមប្រទេសនានាតាមវិធីផ្សេងៗគ្នាអាស្រ័យលើប្រភេទនៃវីរុសបំលែងខ្លួន។ វីរុសបំលែងខ្លួនខ្លះអាចចម្លងរាលដាលយ៉ាងលឿន ឆ្លងសាហាវ និងមានអត្រាខ្ពស់នៃការឆ្លងម្តងទៀត។ វ៉ាក់សាំងដែលមានស្រាប់ហាក់មិនសូវមានប្រសិទ្ធភាពប្រឆាំងនឹងពួកវាទេហើយពួកវារឹតតែពិបាករកឃើញសូម្បីតែតាមរយៈការធ្វើតេស្តិ៍ PCR ។
លោកហ្វីហ្គលទីងនិយាយថា “យើងមិនដឹងច្បាស់អំពីវីរុសបំលែងខ្លួនរបស់ឥណ្ឌាឬក៏កូនវីរុសបំលែងរបស់វានោះទេ។ វាអាចនឹងលេចធ្លាយតាមរយៈការធ្វើចត្តាឡីស័កនៅព្រំដែនប្រសិនបើវានៅតែឆ្លងបានយូរឬមានអាយុកាលបង្កាត់ពូជយូរ”៕
បុគ្គលិកពេទ្យកំពុងបូជាសពជនរងគ្រោះដោយកូវីដ១៩នៅក្រុងញូវដេលីកាលពីថ្ងៃទី២៦មេសា