ដោយ​: ភ្នំ​ស្វាយ / បន្ទាយមានជ័យ​: កសិករ​ដាំ​ដំណាំ​ឈើ​ហូប​ផ្លែ​ភ្ញៀវ​យថាផល​ថា ផល​ភ្ញៀវ​ឆ្នាំនេះ​កើនឡើង លក់​ក៏បាន​ថ្លែ​ជាង​ឆ្នាំមុន គឺ​ឆ្នាំ​ថ្លៃ​៣.០០០​រៀល​/ ១​គ​ក្រ ដល់​ឆ្នាំនេះ ថ្លៃ​៤.០០០​រៀល​/ គ​ក្រ​។

​ម្ចាស់​ចម្ការ​ឈ្មោះ ហម រ៉ា​ឌី បាន​ប្រាប់​កាសែត​រស្មី​កម្ពុជា កាលពី​ថ្ងៃទី​១៣​ខែឧសភា​ឆ្នាំ​២០២១​ថា​៖ ខ្លួន​មាន​ដីចម្ការ​កេរ​ឪពុក​ទំហំ​១​ហិកតា នៅក្រោយ​វត្ត​បុព្វ​សិលា​រាម​ភ​ក្ត​នេស នៅ​ភូមិ​អន្សមចេក ឃុំ​សឿ ស្រុក​មង្គល​បូរី ខេត្តបន្ទាយមានជ័យ​។ ក្នុង​ចម្ការ​ឈើ​ហូប​ផ្លែ​នេះ​មាន​ដាំ​ដើម​ខ្នុរ ល្មុង កំពីងរាជ ដូង ស្វាយ ស្វាយខ្ទិះ ច័ន្ទ​ម៉ាក់​ប្រា​ង ម៉ាក់​យ៉ុង​។ ក្នុងនោះ ក៏មាន​ដើម​ភ្ញៀវ​ចំនួន​៣៥​ដើម​ផងដែរ​។​

​លោក ហម រ៉ា​ឌី បាន​បន្តថា​៖ ដើម​ភ្ញៀវ​នេះ មាន​អាយុ​២០​ឆ្នាំ​ហើយ​។ ដំបូង ដល់​៥​ឆ្នាំ ក៏បាន​ផល​។ ដើម​នេះ បាន​សាក​មែក​ដាំ​បន្ត ហើយ​មិនបាន​ប្រើ​ជី​និង​ថ្នាំ​ឡើយ​។ ហេតុនេះ ពេល​ទុំ​ហើយ ក៏​វា​មាន​រសជាតិ​ជូរអែម មិន​ផ្អែម​ដូច​ភ្ញៀវ​ពី​បរទេស​ដែល​គេ​ប្រើ​ជី​និង​ថ្នាំ​គីមី​ឡើយ​។ កសិករ​បាន​បន្តថា ក្នុង​រយៈពេល​១០​ឆ្នាំ គឺ​លក់​នៅតាម​ផ្សារ​និង​សាលារៀន បោះ​ដុំ​ក្នុង​ថ្លៃ​៣.០០០​រៀល​/​គ​ក្រ ។ ក្នុង​មួយ​ដើម​បាន​ផល​ប្រមាណ​១០០​គ​ក្រ​។ ប៉ុន្តែ​ដោយ​៤-៥​ឆ្នាំ ចុងក្រោយ​នេះ ដោយសារ​មាន​គេ​ថត​បង្ហោះ​តាម​បណ្តាញ​សង្គម ទើប​មាន​ភ្លៀវ​មក​មើល និង​ទិញ​ភ្ញៀវ​ដល់​ចម្ការ​តែម្តង មិនបាច់​បេះ​ទៅ​លក់​ក្រៅ​ចម្ការ​ទៀតឡើយ​។​

​កសិករ​ដដែល​បន្តទៀត​ថា តាំងពី​ផល​ចម្ការ​បាន​ផល ជីវភាព​គ្រួសារ​ប្អូន​បាន​ប្រសើរឡើង ជាង​កាល​ប្អូន​ធ្វើ​តែ​ស្រែ​មួយ​មុខ​៕​