ដោយៈ​មុនី​រ័ត្ន​/​ភ្នំពេញ : សម្តេច​អគ្គមហាសេនាបតី​តេ​ជោ ហ៊ុន សែន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​ផ្ញើលិខិត​ជូន​លោក ស៊ី ជីន​ពីង ប្រធានាធិបតី​នៃ​សាធារណរដ្ឋ​ប្រជាមានិត​ចិន​ដោយ​សម្តែង​នូវ​ការ​សាទរ​ជូន ចំពោះ​រដ្ឋាភិបាល​និង​ប្រជាជន​ចិន​ក្នុងឱកាស​ដែល​យានអវកាស​«​ស៊ូ​រ៉ុង​»​បាន​ចុះចត​ដោយ​ជោគជ័យ​លើ​ភព​ព្រះ​អង្គារ​ក្នុង​បេសកកម្ម «​ធាន​វិ​ន​-១» កាលពី​ថ្ងៃទី​១៥ ខែឧសភា ឆ្នាំ​២០២១​។

(រូបថតឯកសារ)

​ក្នុង​សារលិខិត​របស់​សម្តេច​តេ​ជោ ហ៊ុន សែន ផ្ញើជូន​លោក ស៊ី ជីន​ពីង នៅ​ថ្ងៃទី​១៨ ខែឧសភា​នេះ​បានបញ្ជាក់ : ” តាងនាម​រាជរដ្ឋាភិបាល និង​ប្រជាជន​កម្ពុជា ខ្ញុំ​សូម​សម្ដែង​នូវ​អំណរ​សាទរ​យ៉ាង​ស្មោះស្ម័គ្រ ជូន​ចំពោះ ឯកឧត្តម រដ្ឋាភិបាល និង​ប្រជាជន​ចិន ក្នុងឱកាស​ដែល​យានអវកាស «​ស៊ូ​រ៉ុង​»​បាន​ចុះចត​ដោយ​ជោគជ័យ​លើ​ភព​ព្រះ អង្គារ ក្នុង​បេសកកម្ម «​ធាន​វិ​ន​-១» កាលពី​ថ្ងៃទី ១៥ ខែឧសភា ឆ្នាំ​២០២១​។​នេះ​គឺជា​សមិទ្ធផល ដ៏​ធំធេង​មួយ ទៀត ដែល​ឆ្លុះបញ្ចាំង​ពី​ការរីកចម្រើន​ជា​បន្តបន្ទាប់​ក្នុង​កម្មវិធី​អាវ​កាស​និង​ការរុករក​ក្នុង​លំហ​អវកាស របស់​ចិន ” ។​

​សម្តេច​តេ​ជោ​បានបង្ហាញ​នូវ​ការជឿជាក់​យ៉ាង​មុតមាំ​ថា​សមិទ្ធផល​ដ៏​ធំធេង​នេះ​នឹងចូលរួម​ចំណែក​ដ៏​ធំធេង​ដល់​ការស្រាវជ្រាវ​វិទ្យាសាស្ត្រ​នៃ​បេសកកម្ម​ក្នុង​លំហ​អាកាស​របស់​ចិន​ដែល​នឹង​ផ្តល់​ប្រយោជន៍​ដល់​ការអភិវឌ្ឍ​និង​ការរុករក​វិទ្យាសាស្ត្រ របស់ មនុស្សជាតិ​ទាំងមូល​។​

​សម្តេច​តេ​ជោ ហ៊ុន សែន ក៏បាន​សូម​ជូនពរ​លោក ស៊ី ជីន​ពីង ប្រធានាធិបតី នៃ​សាធារណរដ្ឋ​ប្រជាមានិត​ចិន មាន​សុខ​ភាពល្អ សុភមង្គល និង បន្ត​ទទួលបាន​ជោគជ័យ​ក្នុងការ​ដឹកនាំ​ប្រទេស​ឱ្យបាន កាន់តែ​រុងរឿង​ថែមទៀត​។

​សូមជម្រាបថា យានអវកាស​គ្មាន​មនុស្ស​លើក​មួយ​របស់​ចិន បាន ចុះចត ដោយ ជោគជ័យ នៅ លើ ភព អង្គារ កាលពី ថ្ងៃ សៅរ៍ ទី ១៥ ឧសភា​។ ព្រឹត្តិការណ៍ នេះ ធ្វើឱ្យ ចិន ក្លាយជា ប្រទេស ទី ២ បន្ទាប់ ពី អាមេរិក ដែល​បញ្ជា​យាន​ចុះ នៅ​ភព​ក្រហម ។​

​រំលឹកថា យាន ទម្ងន់ ៥ តោន នេះ បានចេញ​ដំណើរ ពី កោះ ហៃ​ណាន់ របស់ ចិន កាលពី ខែ កក្កដា ឆ្នាំមុន ហើយ ក្រោយ​ធ្វើដំណើរ​អស់​ជាង ៦ ខែ វា បាន​ទៅដល់​ភព​ក្រហម​កាលពី​ខែកុម្ភៈ និង បាន​ហោះ​ក្រឡឹង​ជុំវិញ ចាប់តាំងពី​ពេលនោះ​មក ៕​