ដោយៈ ទេព មង្គល / ភ្នំពេញៈ អង្គការ អិន​.​ភី​.​អេ ( NPA ) ប្រចាំ​នៅ​កម្ពុជា បានផ្ដល់​អំណោយ​ម៉ាស៊ីន server ជូន​អង្គភាព​ទិន្នន័យ នៃ​អាជ្ញាធរ​មីន សម្រាប់ ការរក្សា​ទុក និង​ចែកចាយ នូវ​ទិន្នន័យ ក្នុង​វិស័យ​មីន ។ ពិធី​ប្រគល់​- ទទួល ម៉ាស៊ីន server នេះ បានធ្វើ​ឡើង នៅ​ព្រឹក​ថ្ងៃទី​១៩ ខែឧសភា ឆ្នាំ​២០២១ នេះ​។ នេះ​បើ​យោង តាម​ប្រភពពី​អាជ្ញាធរ​មីន​។

​លោក ព្រំ សុភមង្គល អគ្គលេខាធិការ អាជ្ញាធរ​មីន បានចាត់ទុក ការទទួលបាន នូវ​ម៉ាស៊ីន server ពី​អង្គការ NPA ប្រចាំ​នៅ​កម្ពុជា ដែល​បាន​ប្រគល់ជូន​ដល់ អាជ្ញាធរ​មីន គឺ​ពិត​ជាមាន​សារៈសំខាន់​ណាស់ សម្រាប់​ផ្ទេរ ទទួល រក្សាទុក និង​ចែកចាយ នូវ​ទិន្នន័យ លើ​វិស័យ​មីន​ថ្នាក់ជាតិ​។

​ក្នុងនាម​លោក​ទេសរដ្ឋមន្ត្រី លី ធុជ អនុប្រធាន​ទី​១ អាជ្ញាធរ​មីន​នោះ លោក ព្រំ សុភមង្គល បាន​ថ្លែងអំណរគុណ ដល់​ប្រជាជន និង​រដ្ឋាភិបាល ប្រទេស​ន័​រវេ​ស តាមរយៈ​អង្គការ NPA ដែល​បាននិងកំពុង​ផ្តល់ជំនួយ ដល់​កម្ពុជា លើ​វិស័យ​បោស សម្អាត សំណល់​ជាតិ​ផ្ទុះ ពី​សង្គ្រាម នៅ​កម្ពុជា ក៏ដូចជា បន្ត​គាំទ្រ​អង្គភាព​ទិន្នន័យ អាជ្ញាធរ​មីន ឱ្យ​បន្ត​ដំណើរការ ឈានទៅ​សម្រេចបាន តាម​ផែនការ​យុទ្ធសាស្ត្រ​ជាតិ សកម្មភាព​មីន ២០១៨-២០២៥​។​

​លោក Rune Kristian Dale Andresen ប្រធាន​អង្គការ NPA ប្រចាំ​នៅ​កម្ពុជា បានលើកឡើង​ថាៈ អង្គការ NPA គឺ​នៅតែ​បន្ត​ការគាំទ្រ អង្គភាព​ទិន្នន័យ និង​សន្យា ជួយ​សម្របសម្រួល ជាមួយ​រដ្ឋាភិបាល ប្រទេស​ន័​រវេ​ស និង​ដៃគូ​អភិវឌ្ឍន៍ ផ្សេងទៀត ក្នុងការ​កៀរគរ​ថវិកា និង​សម្ភារ​បន្ថែម ដើម្បី​ជួយ​ដល់ វិស័យ​បោសសម្អាត​មីន នៅ​កម្ពុជា​៕/V​-PC