ដោយៈ​សុផល​/​ភ្នំពេញ​៖​ លោក​បណ្ឌិត សុខ សុ​ក្រឹ​ត្យា ទីប្រឹក្សា​ផ្ទាល់​សម្តេច​អគ្គ​មហា សេនាបតី​តេ​ជោ ហ៊ុន សែន និង​ជា​រដ្ឋលេខាធិការ​ក្រសួងទេសចរណ៍ តំណាង​លោក បណ្ឌិត ថោង ខុន រដ្ឋមន្ត្រី​ក្រសួងទេសចរណ៍ នា​រសៀល​ថ្ងៃទី ១៨ ខែឧសភា ឆ្នាំ ២០២១ បាន​ដឹកនាំ​ប្រតិភូ​ក្រសួងទេសចរណ៍ អញ្ជើញ​ចូលរួម​កិច្ចប្រជុំ​តាម​ប្រព័ន្ធ បច្ចេកវិទ្យា Zoom ជាមួយ​ក្រសួង​ប្រៃសណីយ៍ និង​ទូរគមនាគមន៍​ដែល​ដឹកនាំ​ដោយ លោក ម៉ូ​វ ចរិយា រដ្ឋលេខាធិការ​ក្រសួង​ប្រៃសណីយ៍ និង​ទូរគមនាគមន៍​ដើម្បី ពិភាក្សា​ប្រមូល​ធាតុ​ចូល​លើ​សេចក្តីព្រាង​គោលនយោបាយ​រដ្ឋាភិបាល​ឌីជីថល​កម្ពុជា​ឆ្នាំ​២០២១-២០៣០ ។​

​ចក្ខុវិស័យ​នៃ​ការអភិវឌ្ឍ​រដ្ឋាភិបាល​ឌីជីថល គឺ​ការលើកកម្ពស់​គុណភាព​ជីវិត និង​ទំនុកចិត្ត​ប្រជាពលរដ្ឋ​តាមរយៈ​ការបម្រើ​សេវាសាធារណៈ​ឱ្យ​កាន់តែ​ល្អប្រសើរ​។ ដើម្បី​សម្រេចបាន​ចក្ខុ​វិស័យនេះ ឯកសារ​គោលនយោបាយ​រដ្ឋាភិបាល​ឌីជីថល ឆ្នាំ​២០២១ – ២០៣០ បានដាក់​ចេញ​នូវ​យុទ្ធសាស្ត្រ​ចំនួន ០៥ គឺ (១) បទដ្ឋាន​គតិយុត្ត រដ្ឋាភិបាល​ឌីជីថល (២) ហេដ្ឋារចនាសម្ព័ន្ធ​ឌីជីថល (៣) សេវា​រដ្ឋាភិបាល​ឌីជីថល (៤) ការកសាង​សមត្ថភាព ការស្រាវជ្រាវ និង​នវានុវត្តន៍​ឌីជីថល និង (៥) ភាពជា​ដៃគូរ វាង​រដ្ឋ​និង​ឯកជន​។ ក្នុង​ការរៀបចំ​បទដ្ឋាន​គតិយុត្ត​រដ្ឋាភិបាល​ឌីជីថល មាន​វិធាន ការ​គោលនយោបាយ​ចំនួន ០៣ និង​ផែនការ សកម្មភាព​ចំនួន ២៩ ដើម្បី​រៀបចំ​ច្បាប់ និង​បទដ្ឋាន​គតិយុត្ត​ចាំបាច់ ស្តង់ដា​ការងា​រដ្ឋបាល វិស្វកម្ម​សូ​ហ្វ​វែ​រ​និង​ប្រព័ន្ធ​ព័ត៌មាន ឌីជីថល និង​និម្មាបនកម្ម​រដ្ឋាភិបាល​ឌីជីថល​។ គណៈកម្មាធិការ​រដ្ឋាភិបាល​ឌីជីថល នឹងត្រូវ បង្កើត​ដោយ​លិខិតបទដ្ឋាន​គតិយុត្ត​ដោយឡែក ដើម្បី​សម្របសម្រួល រៀបចំ និង​ដឹកនាំ​រដ្ឋាភិបាល​ឌីជីថល​។​

​ចំពោះ​ការកសាង​ហេដ្ឋារចនាសម្ព័ន្ធ​ឌីជីថល មាន​វិធានការ​គោលនយោបាយ​ចំនួន ០៤ និង ផែនការ​សកម្មភាព​ចំនួន ១០ ត្រូវបាន​រៀបចំឡើង​ដើម្បី​កែលម្អ​ហេ​ដ្ឋា រចនាសម្ព័ន្ធ​ព័ត៌មាន​ជាតិ ដូចជា មជ្ឈមណ្ឌល​ទិន្នន័យ​ជាតិ​និង​បណ្តាញ​ត​ភ្ជាប់ ក្រសួង​-​ស្ថាប័ន ហេដ្ឋារចនាសម្ព័ន្ធ​ប្រព័ន្ធ​ទូទាត់​សង​ប្រាក់​ហេដ្ឋារចនាសម្ព័ន្ធ​សន្តិសុខ ឌីជីថល និង​ហេដ្ឋារចនាសម្ព័ន្ធ​ព័ត៌មាន​ភស្តុភា​រកម្ម​ប្រៃសណីយ៍ និង​ការចែក បញ្ញើ​គោលដៅ​ចុងក្រោយ​។​

​សម្រាប់​សេវា​រដ្ឋាភិបាល​ឌីជីថល មាន​វិធានការ​គោលនយោបាយ​ចំនួន ០៣ និង​ផែនការ​សកម្មភាព​ចំនួន ២២ ដើម្បី​ធ្វើ​បរិវត្ត​កម្ម​សេវា​រដ្ឋបាល​ផ្ទៃក្នុង (G2G) បរិវត្ត​កម្ម​សេវាសាធារណៈ​ដើម្បី​ប្រជាពលរដ្ឋ (G4C) និង​បរិវត្ត​កម្ម​សេវាសាធារណៈ សម្រាប់​ធុរកិច្ច (G2B) ។ ទាក់ទង​នឹង​យុទ្ធសាស្ត្រ​ជំរុញ​ការកសាង​សមត្ថភាព ការស្រាវជ្រាវ និង​នវានុវត្តន៍​ឌីជីថល មាន​វិធានការ គោលនយោបាយ​ចំនួន ០៥ និង​ផែនការ​សកម្មភាព​ចំនួន ១៦ ដើម្បី​ពង្រឹង និង​ពង្រីក​សមត្ថភាព​ក្នុងការ​អភិ​វ​ឌ្ឈ ការគ្រប់គ្រង និង​ការប្រើប្រាស់​ប្រព័ន្ធ​រដ្ឋាភិបាល​ឌីជីថល​ការរក្សា​ទុក​ធនធាន មនុស្ស​ជំនាញ​ឌីជីថល ការស្រាវជ្រាវ និង​នវានុវត្តន៍​ឌីជីថល​។​

​ក្នុងឱកាស​នៃ​កិច្ចពិភាក្សា ប្រតិភូ​ក្រសួងទេសចរណ៍​បាន​គាំទ្រ​ទាំងស្រុង​គោល នយោបាយ​រដ្ឋាភិបាល​ឌីជីថល​កម្ពុជា ២០២១ – ២០៣០ នេះ ព្រោះ​វា​គឺជា មធ្យោបាយ​បម្រើឱ្យ​គ្រប់​វិស័យ ពិសេស​ការលើកទឹកចិត្ត​ដល់​ធុរកិច្ច​ថ្មី​ឌីជីថល ដែល​កម្ពុជា​បាន និង​កំពុង​ឈានទៅ​យុគ្គសម័យ​បដិវត្តន៍​ឧ​ស្សហកម្ម ៤.០ ដែល​វិស័យ​ទេសចរណ៍​បាននិងកំពុង​ប្រើប្រាស់​ឌីជីថល​សម្រាប់​ការផ្សព្វផ្សាយ គោលដៅ​ទេសចរណ៍​ក៏ដូចជា​ការចុះបញ្ជី​អាជ្ញាប័ណ្ណ​ទេសចរណ៍​តាម​ប្រព័ន្ធ អន​ឡាញ​ផងដែរ​៕​/PC