​​ដោ​យ: គ្រញូង / បាត់ដំបង​: មន្ទីរ​យុត្តិធម៌ នៃ​បញ្ជាការដ្ឋាន កងរាជអាវុធហត្ថ​ខេត្ត កាលពី​ព្រឹក​ថ្ងៃទី​១៩ ខែឧសភា ឆ្នាំ​២០២១ បាន​កសាង​សំណុំរឿង បញ្ជូន​ជនសង្ស័យ​ម្នាក់ ទៅ​សាលាដំបូង​ខេត្ត ដោយ​ចោទ ពីបទ​ក្លែងបន្លំ ធ្វើជា​គ្រូពេទ្យ ធ្វើ​សកម្មភាព​ចូល​លួច ទូរស័ព្ទ និង​ទ្រព្យសម្បត្តិ​ផ្សេងៗ របស់ អ្នកជំងឺ និង​គ្រូពេទ្យ ស្ទើរតែ​រាល់​យប់ នៅក្នុង​មន្ទីរពេទ្យបង្អែក​ខេត្ត ស្ថិតនៅ​ព្រែក​មហាទេព សង្កាត់​ស្វាយប៉ោ ក្រុង​បាត់ដំបង​។

​លោក សូ ឌី ប្រធាន​មន្ទីរ​យុត្តិធម៌ នៃ​បញ្ជាការដ្ឋាន​ដ្ឋា​ន កងរាជអាវុធហត្ថ​ខេត្ត បាន​ឲ្យ​ដឹងថាៈ ជន សង្ស័យ មានឈ្មោះ សូ ភា​រិ​ទ្ធ អាយុ ២៨ ឆ្នាំ នៅ​ភូមិ​ទូល​តា​ឯក សង្កាត់​ទូល​តា​ឯក ក្រុង​បាត់ដំបង​។ ជននេះ ត្រូវបាន​កម្លាំង​កងរាជអាវុធហត្ថ​ខេត្ត ឃាត់ខ្លួន​បាន កាលពី​វេលា​រំលងអធ្រាត្រ ឈានចូល ថ្ងៃទី​១៧ ឧសភា ខណៈ​ជននេះ បង្ហាញខ្លួន នៅ​ភូមិ​កម្មករ សង្កាត់​ស្វាយប៉ោ ក្រុង​បាត់ដំបង​។

ជនសង្ស័យដែលបន្លំធ្វើជាគ្រូពេទ្យដើរលួចទ្រព្យសម្បត្តិអ្នកជំងឺនិងគ្រូពេទ្យមួយចំនួន

​លោក​ប្រធាន​មន្ទីរ បាន​បន្តថាៈ ជននេះ បាន​បន្លំ​ខ្លួន​ធ្វើជា​គ្រូពេទ្យ ដើរ​ពិនិត្យ​អ្នកជំងឺ តែ​ពេលយប់​ស្ងាត់ ហើយ​ធ្វើ​សកម្មភាព​លួច​ទូរស័ព្ទដៃ និង​ទ្រព្យសម្បត្តិ​មានតម្លៃ​ផ្សេងៗ របស់រ​អ្នកជំងឺ និង​គ្រូពេទ្យ ហើយ​លើកចុងក្រោយ​អស់​ល័​ក្ខ ត្រូវ​កម្លាំង​កងរាជអាវុធហត្ថ​ខេត្ត ស្រាវជ្រាវ​ចាប់ខ្លួនបាន ហើយ​នាំទៅ​សាកសួរ នៅ​ទីបញ្ជាការដ្ឋាន កងរាជអាវុធហត្ថ​ខេត្ត​។​

​លោក សូ ឌី បាន​ឲ្យ​ដឹងថាៈ ជនរងគ្រោះ មានឈ្មោះ ឈិន សុផារ៉ា ភេទ​ស្រី អាយុ​២៣​ឆ្នាំ​។​

​គួរ​រំលឹក​ឲ្យ​ដឹងថា កន្លងមក នៅក្នុង​មន្ទីរពេទ្យ​ខេត្ត មាន​អ្នកជំងឺ និង​គ្រូពេទ្យ​មួយចំនួន តែងតែ​បាត់ ទូរស័ព្ទដៃ និង​ទ្រព្យសម្បត្តិ ជា​ញឹកញាប់ ពិសេស​ពេលយប់​ជ្រៅ​។​

​លោក​សូ ឌី បាន​បញ្ជាក់ថា យោងតាម​រូបភាព ដែល​ថត​បាន ក្នុង​កាមេរ៉ា​សុវត្ថិភាព ដែល​បំពាក់​នៅ តាម​អគារ​នានា នៃ​មន្ទីរពេទ្យ បានបង្ហាញ​រូប​ចោរ​នោះ​ច្បាស់ ទើប​សមត្ថកិច្ច ធ្វើការ​ស្រាវជ្រាវ រហូត​ឈានដល់​ការឃាត់ខ្លួន​តែម្តង​។​

​លោក មាស សុវណ្ណ មេបញ្ជាការ កងរាជអាវុធហត្ថ​ខេត្ត បាន​បញ្ជាក់ថា ក្រោយពេល ជនសង្ស័យ ឆ្លើយ​សារភាព រួចមក លោក​បាន​បញ្ជា​ឲ្យ​កម្លាំង​ជំនាញ កសាង​សំណុំរឿង បញ្ជូនទៅ​តុលាការខេត្ត ដើម្បី​ចាត់ការ​តាមច្បាប់​៕/V