ដោយៈ​តារា​រិ​ទ្ធ​/​ភ្នំពេញៈនៅក្នុង​ឱកាស​ទិវា​ជាតិ​នៃ​ការចងចាំ ២០ ឧសភា ឆ្នាំនេះ​សម្តេច​អគ្គ​មហា​សេ នា​ប​តី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​អំពាវនាវ​ឱ្យ​ជនរួមជាតិ​ចូលរួម​ការពារ​សន្តិភាព​ឱ្យ​គង់វង្ស ដើម្បី​កុំអោយ​របប​វាលពិឃាត​វិលត្រឡប់​មកវិញ ។​

​តាមរយៈ​បណ្តាញ​សង្គម Facebook ផ្លូវការ​នា​ព្រឹក​ថ្ងៃទី ២០ ឧសភា នេះ​សម្តេច​តេ​ជោ ហ៊ុន សែន បាន​ថ្លែងថាៈ​”​ថ្ងៃនេះ ជា​ថ្ងៃ​ទិវា​ជាតិ​នៃ​ការចងចាំ ២០ ឧសភា ដែលជា​ថ្ងៃ​ប្រជាជន​កម្ពុជា​គ្រប់ៗ​រូប​ចងចាំ​មិនអាច​បំភ្លេចបាន ក្នុង​របប​កម្ពុជា​ប្រជាធិបតេយ្យ ឬ​ហៅថា​របប​ប្រល័យពូជសាសន៍ ប៉ុល ពត (១៧ មេសា ១៩៧៥ – ៦ មករា ១៩៧៩) ដែលជា​របប​ដ៏​ឃោរឃៅ និង​ខ្មៅ​ងងឹត ។ ទិវា​នេះ ជាការ​រំលឹក​ដល់​វិញ្ញាណក្ខន្ធ​ដល់​ជនរងគ្រោះ​ជាង​៣​លាន​នាក់ ដែល​បាន​ស្លាប់បាត់​បង់ជីវិត នៅក្នុង​របប​ប្រល័យពូជសាសន៍ ប៉ុល ពត​” ។

​សម្តេច​បាន​បន្តទៀតថាៈ​”​ប្រជា ពលរដ្ឋ​កម្ពុជា​ភាគច្រើន​លើសលប់​បានដឹង និង​បាន​យល់ច្បាស់ អំពី​រឿងរ៉ាវ​សោកនាដកម្ម​ដ៏​ជូរចត់ ដែល​ប្រជាពលរដ្ឋ​ខ្មែរ​បាន​ឆ្លងកាត់​ជិត​៣​ទសវត្សរ៍ ក្នុង​ភ្នក់ភ្លើងសង្គ្រាម និង​ទឹកភ្នែក ការកាប់ សម្លាប់ ការបំផ្លិចបំផ្លាញ ការជម្លៀស​ចេញពី​ទីលំនៅ​របស់ខ្លួន​ដោយ​បង្ខំ និង​ការបង្ខំ​ឱ្យធ្វើ​ការ​ដូច​សត្វ​ធាតុ​ជាដើម​។ មិនតែប៉ុណ្ណោះ ប្រជាពលរដ្ឋ​កម្ពុជា ត្រូវស្លាប់​ដោយ​គ្មាន​ថ្នាំសង្កូវ​ព្យាបាល គ្មាន​អាហារ​បរិភោគ​គ្រប់គ្រាន់ គ្មាន​សិទ្ធិសេរីភាព គ្មាន​លទ្ធិប្រជាធិបតេយ្យ ហើយ​សូម្បីតែ​សិទ្ធិ​រស់រាន​មាន ជីវិត​ដែលជា​សិទ្ធិ​មូលដ្ឋាន​មាន​ពី​កំណើត​របស់​មនុស្ស​ក៏​គ្មាន​ដែរ​”​។

​សម្តេច​បាន​សង្កត់ធ្ងន់​ថាៈ​”​ដើម្បី​កុំអោយ​របប​នេះ​វិល​ត្រឡប់មកវិញ ចូលរួម​ថែរក្សា​ការពារ​សន្តិភាព​ឱ្យបាន​គង់វង្ស ពីព្រោះ​សន្តិភាព​បាន​ផ្តល់ឱកាស​គ្រប់យ៉ាង​ក្នុងកា​រកសា ង​សង្គម​គ្រួសារ សហគមន៍ និង​ប្រទេសជាតិ ឱ្យ​កាន់តែ​រីកចម្រើន​ទៅមុខទៀត​”៕​