ដោយៈ សុផល / ភ្នំពេញៈ អគ្គលេខាធិការ រដ្ឋសភា​កម្ពុជា និង​ស្ថានទូត​វៀតណាម ប្រចាំ​កម្ពុជា កាលពី​ម្សិលមិញ​នេះ បាន​ជួប​ពិភាក្សាគ្នា អំពី​គម្រោង​ជំនួប​រវាង​ថ្នាក់ ដឹកនាំ​រដ្ឋសភា នៃ​ប្រទេស​ទាំងពីរ និង​ការងារ​សំខាន់ៗ មួយចំនួនទៀត នៅ​វិមាន​រដ្ឋសភា​។​

​លោក ឡេង ប៉េងឡុង អគ្គលេខាធិការ រដ្ឋសភា បានអនុញ្ញាត​ឱ្យ លោក ឡាយ ស៊ុន​ជៀន ភារធារី តំណាង​ឯកអគ្គរដ្ឋទូត សាធារណរដ្ឋ​សង្គមនិយម វៀតណាម ប្រចាំ​ព្រះរាជាណាចក្រ​កម្ពុជា និង​សហការី ចូលជួប​ពិភាក្សា​ការងារ នា​ព្រឹក​ថ្ងៃទី​១៩ ខែឧសភា ឆ្នាំ​២០២១ ។​

​នៅក្នុង​ជំនួប​ពិភាក្សា​ការងារ​នេះ គឺ​ផ្តោត​សំខាន់​លើ គម្រោង​ជំនួប​រវាង​ថ្នាក់ដឹកនាំ រដ្ឋសភា នៃ​ប្រទេស​ទាំងពីរ ក្រុម​សមាជិកា​សភា​ស្ត្រី ក្រុមតំណាងរាស្ត្រ​វ័យក្មេង នៃ​រដ្ឋសភា​ប្រទេស​ទាំងពីរ​។​

​ជំនួប​នេះដែរ ក៏បាន​ពិភាក្សា ពី​ដំណើរការ​នៃការអនុវត្ត​ការងារ​សាងសង់ អគារ​រដ្ឋបាល​រដ្ឋសភា ដែលជា​ជំនួយ​របស់ សាធារណរដ្ឋ​សង្គម​វៀតណាម​៕/V​-PC