ដោយៈ សុ ផល​/ ភ្នំពេញៈ នៅ​រសៀល​នេះ ក្រសួង​សាធារណៈការ​និង​ដឹកជញ្ជូន បានប្រកាសថា ផែនការ​សកម្មភាព​គ្រប់គ្រង​ប្រព័ន្ធ​ចម្រោះ​ទឹក​កខ្វក់ គឺជា​ការងារ មួយ​ដ៏​ធំ និង​មាន​សំខាន់បំផុត ដែល​ត្រូវតែ​យកចិត្តទុកដាក់​អនុវត្ត​ឱ្យមាន​ប្រសិទ្ធភាព ដើម្បី​លើកកម្ពស់ សុខភាព អនាម័យ សុខុមាលភាព​សាធារណៈ និង​រក្សាបាន នូវ​សោភ័ណភាព​ផងដែរ​។

​ប្រភព​ដដែល​នេះ​បាន​អះអាងថា ការចាប់បដិសន្ធិ​នៃ​រាជាណាចក្រ​កម្ពុជា​លើក​ទី​២ នា​ឆ្នាំ ១៩៩៣ ជា​បរិបទ​មួយ​ដ៏​សំខាន់ នៅក្នុង​ដំណើរការ​ស្តារ និង​កសាង​ប្រទេស ជាតិ​ឡើងវិញ ។ សន្តិភាព និង​ស្ថិរភាព​ពេញ​ផ្ទៃ​ប្រទេស​ចាប់តាំងពី​ឆ្នាំ​១៩៩៨ ដែល​បានមកពី នយោបាយ​ឈ្នះ ឈ្នះ ជា​ប្រវត្តិសាស្ត្រ​របស់​សម្តេច​អគ្គ​មហា សេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​ជា​អគ្គ​មគ្គុទេសក៍​សន្តិភាព បង្រួបបង្រួម​ជាតិ ដែល​បាន​ដឹកនាំ​ប្រទេស​ប្រកប ដោយ​គតិបណ្ឌិត មាន​គោលនយោបាយ​ដឹកនាំ​ជាតិ​ដ៏​ត្រឹមត្រូវ និង​ច្បាស់លាស់ បាន​នាំឱ្យ​ប្រទេស​កម្ពុជា មាន​ឯករាជ្យភាព អធិបតេយ្យភាព និង​បូរណភាព​ទឹកដី ដែល​ធ្វើឱ្យ​ប្រជាជន​កម្ពុជា​ទូទាំងប្រទេស​បាន និង​កំពុង​រស់នៅក្នុង​សុខសន្តិភាព សុខដុមរមនា សំបូរ​សប្បាយ និង​ពោរពេញ​ទៅដោយ​មោទនភាព​ចំពោះ​សមិទ្ធផល យ៉ាងច្រើន​សន្ធឹកសន្ធាប់​រាប់​ពុំ​អស់​។​

​ទន្ទឹម​ជាមួយគ្នានេះ​ផងដែរ ដោយសារតែ​ការអភិវឌ្ឍ​រីកចម្រើន​ឥតឈប់ឈរ ពីមួយថ្ងៃ​ទៅមួយថ្ងៃ ដែល​ក្នុងនោះ​រួមមាន ការអភិវឌ្ឍ​ទីក្រុង​ហេដ្ឋារចនាសម្ព័ន្ធ ផ្លូវថ្នល់ ប្រព័ន្ធ​ប្រឡាយទឹក សំណង់​អាគារ​លំនៅស្ថាន​ព្រមទាំង​កំណើនប្រជាជន ដែល​រស់នៅ​ទីក្រុង និង​ទីប្រជុំជន​ធំៗ​មានការ​កើនឡើង​យ៉ាង​ឆាប់រហ័ស​ដែល​ធ្វើ ឱ្យ​បញ្ហា​ចោទឡើង​ពាក់ព័ន្ធ​ជាមួយនឹង​ការគ្រប់គ្រង​ទឹក​កខ្វក់​សំណល់ គឺជា​កង្វល់ ដ៏​ធំ​មួយ ដែល​ទាមទារ​ឱ្យ​ក្រសួង​សាធារណការ និង​ដឹកជញ្ជូន​ត្រូវ​យកចិត្តទុកដាក់ ខ្ពស់​លើ​ការដោះស្រាយ​ឱ្យ​សមស្រប ទាន់ពេលវេលា និង​ចំ​គោលដៅ​។​

​ប្រភព​ដដែល​បាន​បន្តថា ដើម្បី​ចូលរួមចំណែក​ក្នុងការ​ដោះស្រាយ​បញ្ហា​ខាងលើ ក្រសួង​សាធារណការ និង​ដឹកជញ្ជូន រួមជាមួយ ភាគី​ពាក់ព័ន្ធ​ផ្សេងទៀត​បានដាក់ ចេញ​ផែនការ​សកម្មភាព​ក្នុងការ​គ្រប់គ្រង​ទៅលើ​ទឹក​កខ្វក់ តាមរយៈ​កិច្ចសហការ ជាមួយ​ក្រសួង​-​ស្ថាប័ន​ពាក់ព័ន្ធ​នានា​នៅក្នុង​ការរៀបចំ​ប្រព័ន្ធ​លូទឹកកខ្វក់ និង​ប្រព័ន្ធ លូទឹក​ភ្លៀង​ដាច់ដោយឡែក​ពីគ្នា និង​បង្កើត​អាង​ប្រព្រឹត្តិកម្ម​ទឹក​កខ្វក់​ឱ្យបាន សមស្រប ដើម្បី​ប្រមូល និង​ធ្វើ​ប្រព្រឹត្តិកម្ម​សម្អាត​ទឹក​កខ្វក់​មុននឹង​បង្ហូរ​ចូលទៅក្នុង ប្រភពទឹក​ធម្មជាតិ​។

​ជាមួយគ្នានេះ​ផងដែរ ក្រសួង​សាធារណការ និង​ដឹកជញ្ជូន រួមជាមួយ​ដៃគូ​ពាក់ព័ន្ធ នានា បាន និង​កំពុងតែ​ខិតខំ​ប្រឹងប្រែង​រៀបចំ​សេចក្តីព្រាងច្បាប់​គ​តិ​យុ​ត្តិ បទដ្ឋាន បច្ចេកទេស​ក្នុងការ​សាងសង់ ជួសជុល ថែទាំ ប្រតិបត្តិការ គោលនយោបាយ និង​យុទ្ធសាស្ត្រ​នានា​ទាក់ទង​នឹង​ការគ្រប់គ្រង អភិវឌ្ឍន៍​ប្រព័ន្ធ​ចម្រោះ​ទឹក​កខ្វក់ នៅ​កម្ពុជា​ប្រព្រឹត្ត​ទៅដោយ​រលូន មាន​ប្រសិទ្ធភាព និង​ប្រសិទ្ធ​ផល​ខ្ពស់​ដើម្បី សម្រេច​ឱ្យបាន​នូវ​សោភ័ណភាព​ទីក្រុង (​ទីក្រុង​បៃតង​) និង​ភាព​ទាក់ទាញ​ផងដែរ​៕​/PC