ប្រជុំ​ពិនិត្យ​ពិភាក្សា ទាក់ទង​នឹង​យន្តការ​ត្រួតពិនិត្យ គម្រោង​ហេដ្ឋារចនាសម្ព័ន្ធ ផ្លូវថ្នល់ តាមរយៈ​កម្មវិធី​ថែទាំ​ផ្លូវ​

ដោយៈ សុផល / ភ្នំពេញៈ ក្រសួង​សាធារណការ និង​ដឹកជញ្ជូន កាលពី​ថ្ងៃទី​២៥ ខែឧសភា ឆ្នាំ​២០២១ បាន​បើក​កិច្ចប្រជុំ​ពិនិត្យ​ពិភាក្សា ទាក់ទង​នឹង​យន្តការ​ត្រួតពិនិត្យ គម្រោង​ហេដ្ឋារចនាសម្ព័ន្ធ​ផ្លូវថ្នល់ តាមរយៈ​កម្មវិធី​ថែទាំ​ផ្លូវ (ROAD CARE Mobile App)​។​

​លោក យិ​ត បុ​ណ្ណា រដ្ឋលេខាធិការ ក្រសួង​សាធារណការ និង​ដឹកជញ្ជូន បាន​ដឹកនាំ​កិច្ចប្រជុំ​នេះ ដោយមាន​ការចូលរួម​ពី​លោក ហ៊ាង វុត្ថា អគ្គនាយក នៃ​អគ្គនាយកដ្ឋាន បច្ចេកទេស លោក​អគ្គនាយករង នៃ​អគ្គនាយកដ្ឋាន បច្ចេកទេស លោក​ប្រធាន​នាយកដ្ឋាន អនុប្រធាននាយកដ្ឋាន និង​ក្រុមការងារ​បច្ចេកទេស ផងដែរ​។​

​ថ្លែង​នាឱកាស​នោះ លោក​រដ្ឋលេខាធិការ បាន​ឯកភាព​ជាគោលការណ៍ លើ​បទ​បង្ហាញ ស្តីពី​ទស្សនទាន ក្នុងការ​បង្កើត​យន្តកា​រ​ត្រួតពិនិត្យ​តាមរយៈ​កម្មវិធី ថែទាំ​ផ្លូវ (ROAD CARE Mobile App) នេះ ដែល​បានរៀបចំ​ដោយ​ក្រុមការងារ បច្ចេកទេស នៃ​អគ្គនាយកដ្ឋាន បច្ចេកទេស​។​

​បន្ថែម​ពីលើ​នេះ លោក​ប្រធាន​អង្គប្រជុំ ក៏បាន​ស្នើឱ្យ​ក្រុមការងារ ជ្រើសរើស​ព័ត៌មាន ចាំបាច់​មួយចំនួន ដាក់​លើ​ទំព័រ​ដើម ដូចជា​វឌ្ឍនភាព​គម្រោង​សម្រាប់​ផ្តល់ជូន​ថ្នាក់ ដឹកនាំ ងាយស្រួល ក្នុងការ​ពិនិត្យ តាមដាន និង​ចាត់វិធានការ ទាន់ពេលវេលា ដើម្បីឱ្យ​គម្រោង​ឈាន ទៅរក​ការបញ្ចប់ តាម​ផែនការ ដែល​បាន​គ្រោងទុក និង​ប្រកបដោយ​គុណភាព​៕/V​-PC